Numbers 12:5-16

⁵me yib bangi manileng nga but’ nib suwon ni bay SOMOL u fithik’, me yib i par nga langan e mab ko fare Tent, me pong ni ga’ar, “Aron! Miriam!” Mi yow yan nga m’on.

⁶Me ga’ar SOMOL, “Mu telmew ko tin ni nggog! Ra bay e profet u fithik’med ma gu ma piliyeg e changar rorad ngar nanged gag, fa gu non ngorad u malik’ay.

⁷Mi Moses ni tapigpig rog e gathi ara’ rogon; ya kug tay ni ir e ke milfan urngin e girdi’ rog ngak ni er yu Israel.

⁸Gu ma non ngak ni gamow ba sabol, thin ni gu ma yog ngak e rib tamilang, ya dagur non ngak u fithik’ e salipow; mus nga fog nike guy! Ere di’in me math’ daguwen romew ngam welthingow nib togopluw ngak e tapigpig rog i Moses?”

⁹Me damumuw SOMOL ngorow ma nap’an ni chuw rorad

¹⁰me chuw fare gi manileng u daken fare Tent, kachingiyal’ nem mi yigi fanay ba m’ar ko biyach downgin Miriam ni ga’ngin me pig ra’en downgin nge polo’ i wech ni bod e ayis. Ma nap’an ni changar Aron ngak ni guy nike fanay e m’ar ko biyach downgin ni polo’,

¹¹me ga’ar ngak Moses, “Wenig ngom, dab mu pagmow nggu gafgowgow ko re gechigney ni fan e balyang romow.

¹²Dab mu pag Miriam nge bod ban’en nni gargeleg nib yam’ ni balay i yang e kan languy kem’ay.”

¹³Me pag Moses laman ngalang nge yor ngak SOMOL ni be ga’ar, “Got, mu golnag Miriam!”

¹⁴Me fulweg SOMOL ni ga’ar, “Fa’an mang e chitamngin e thuw nga lanmit, mra fek tamara’en ni medlip e rran. Ere nga nin’ Miriam nga wuru’ e gin ni be par yu Israel riy ni reb e wik. Ma fin ra m’ay reb e wik mrayag ni ngan fulweg ngalan e gin ni yibe par riy.”

¹⁵Ma aram min tay Miriam ni medlip e rran nga wuru’ fa gin kar n’ufed e Tent riy. Miyad par ni da kur milekaggad nge mada’ ko ngiyal’ ni kan fulweg Miriam ngalan e gin ni yad be par riy.

¹⁶Ma aram mar chuwgad u Hazeroth ngarab ra pired nga daken e ted nu Paran.