Muqâqiŋ Dâŋ 31:5-21

⁵Jaŋe opâ sanaŋ nâhuc sâcmutâc dâŋte nikec‐jopaekac, ehame ŋic qarâ suriŋne hone takirec‐jopaeŋgopieŋ.

⁶Opâ sanaŋ i ŋic ʒâic sâko manahuc hâmozo eŋgopieŋ jaŋere biŋe.

⁷Jaŋe hâcne nâhuc bawaha qaqane â busâqoc faio jueŋgopieŋ irec nikec‐jopazejec.

⁸“Go ŋic nâŋguŋne â ba bititicne jaŋere dâŋ muhuc bafic‐jopazemec.

⁹Go jaŋe bafic‐jopahuc dâŋjeŋic mutiŋnezemec, ehuc ŋic waha qaqane â qarâ suriŋne jaŋere dâŋ fâretiŋ jaha muhuc dopec‐jopazemec.”

¹⁰Mozi ŋokac biaŋne moc sâcne bâfuaocmu? Ŋokac biaŋne moc e qânâ furi sâko irec sâc sirickeekac.

¹¹Ehame ŋowe‐ticnezi erao roweckerâ juhuc batac qatac mi eocmu.

¹²Ŋokac iŋucne e jufeekac sâc ŋowe‐ticne busâqoc moc mi bâfuacnehuc biaŋne jauŋkehuc juekac.

¹³E qâoma moc mi ehuc he fufu â ŋaqi qoruc ɋâɋâtâ gie ʒuʒuhuc jaha baekac.

¹⁴E mafa woke iŋucne nânâ wiac mâreŋ ʒorickonec rome fisiekac.

¹⁵E furic qârurure faharerâ wiacfâc‐ticne jaŋere nânâ rike bâmoc ehuc kiŋaŋ narufâcne giedâŋ mujareekac.

¹⁶E gie hehe mâreŋ moc honerâ e jahac gie bahuc moneŋ hotâckeekac izi furine baocmu.

¹⁷E gie ʒoɋac sasanaŋhec baekac.

¹⁸E wiac ebac ehuc irec maname fârine sasawa eekac, ehame gie bahuc juhame ŋafe ʒâŋiŋkeekac.

¹⁹E he fuocte muc jâmume feekac.

²⁰E ŋic hapetac â qarâ suriŋne jauŋ bacjopaekac.

²¹E wiacfâcne jaŋere ʒoc bocjaha roekacte mâmâteŋ dameŋko jaŋere mana mezac mi eekac.