Muqâqiŋ Dâŋ 13:1-23

¹Motec maŋɋârâŋhec e mamacnezi mu bâtiŋ ecneme dâŋticne manaocmu, â motec ʒaubacnezi ine dâŋticnere takickeme qikiŋneocmu.

²Ŋic biaŋne jaŋe dâŋjeŋicte fârine biaŋne jaha roeŋgopieŋ, â ŋic eeatucne jaŋe ine bâbâʒâic gie baniŋte boc ejareekac.

³Ŋic moc e micticne soŋaŋkeocmuzi juju‐ticne ŋezickeocmu, â moc e ine manabâc mi ehuc dâŋ kosa muocmuzi juju‐ticne sipirickeocmu.

⁴Ŋic ojoŋnezi wiac irec me irec boc ecneha sifu mi bâfuaocmu, â ŋic moc e gie ʒoɋachec baocmuzi ine wiac irec me irec ecneocmu sâc bâfuaocmu.

⁵Ŋic siocmâc jaŋe burecdâŋ qaisockeeŋgopieŋ, â ŋic sindaŋne jaŋe wiac mu bac epie miminehec â mamakâcne eekac.

⁶Tiŋne jujuzi ŋic bahacmâc ŋezic‐jopaekac, sâqocnezi ine ŋic sindaŋne bawahac‐jopaekac.

⁷Ŋic hapetac gâcne jaŋe ŋic moneŋ mafa sâkohec jaŋere hawari eeŋgopieŋ, â ŋic mafa mâririhec gâcne jaŋe wiac‐jeŋic foipieha sifu ŋic hapetac jaŋere hawari jueŋgopieŋ.

⁸Ŋic moneŋ mafa sâkoheczi juju‐ticne ŋezickeocte afeckerâ kiwiric‐ticne râeocmu, â ŋic hapetaczi ine iŋuc eocte eipieocmu.

⁹Ŋic tiŋne jaŋe lambe tatamac sâko iŋucne, â ŋic sindaŋne jaŋe ine lambe tatamac gâkowaekac irec sâc.

¹⁰Ŋic ʒaubacne jaŋe bahac fuŋne fuŋne bâfuaeŋgopieŋ, â ŋic maŋɋârâŋhec jaŋe ine ŋic âgofâc‐jeŋic dâŋko bafic‐jopaniŋte ejareekac.

¹¹Gie fâro faio sawa bahuc moneŋ mafa bâfuaeŋgopeneŋ i biac mocwâc omaeekac, â gie sâko aijakic jaha bahuc bâfuanaŋmuo ine ʒuhuckerâ fua‐nâreocmu.

¹²Mamanac juju‐nâŋeczi fârimâc eme maŋnâŋec wahaocmu, â wiac mocte enâreha fârine fuame mamanac‐nâŋeczi soka ŋedâmârec eocmu.

¹³Ŋic moc e Anuture dâŋ fâri hândâŋne qâsuaocmuzi okacne roocmu, â moc e Anuture sâcmutâc dâŋ araŋ bacneocmuzi ine sâcne juocmu.

¹⁴Ŋic maŋɋârâŋhec jaŋere mu qaqazuc dâŋ izi jujure opâ ʒâŋe iŋucne, dâŋ izi hâcne hâmocte bitiŋko fenʒipeŋte hecke‐nâreekac.

¹⁵Ŋic mamanahec jaŋere manapene fefene eekac, doc bapa ŋic jaŋe ine hâmoc sanaŋte hatao raeŋgopieŋ.

¹⁶Ŋic maŋɋârâŋheczi gie i me i moc baocte qanaŋ mamanasu gie baocmu, â ŋic mutuc matacnezi ine iŋuc moc mi ehuc mutuc‐ticnere fuŋne bataniŋkeocmu.

¹⁷Biŋe mumu ŋic hehesicnezi wiac hâhâwicne bâfuaekac, â kiŋaŋŋic biaŋnezi ine wamadâŋ bafisiekac.

¹⁸Ŋic moc e giedâŋ biaŋne qikiŋneocmuzi ŋic hapetac â wawahane eocmu, â moc e mu bâtiŋ dâŋ mana rereŋ eme ine ere manapene fefene eocmu.

¹⁹Wiac irec me irec aŋac‐nâpome fârine bâfuarâ bubiaŋ manaeŋgopeneŋ, ŋic mutucne jaŋe ine wiac hehesicne râpeckeniŋte takic‐jopaekac.

²⁰Ŋic moc e ŋic maŋɋârâŋhec qâtec‐joparâ juhuc maŋɋârâŋhec jaha eocmu, â ŋic mutuc matacne âgo ejarehuc ine sipirickeocmu.

²¹Sâqocne bapa jaŋe okacne rorozi kikeo kikeo ejareekac, â ŋic tiŋne jaŋe ine katucne jujuhâmo roeŋgopieŋ.

²²Ŋic biaŋnere moneŋ mafa izi naru motec ŋosafâc‐ticne jaŋere biŋe eocmu, â sâqocne bapa jaŋere moneŋ mafazi ine ŋic tiŋne jaŋere biŋe eocmu.

²³Ŋic hapetac jaŋere nânâ wiac i mâreŋ furunao bocjaha fuazac, mâc ŋic hehesicne jaŋe mâreŋ irec aka hejarembiŋ.