Mumutara Ŋic 11:5-37

⁵Ʒika fuŋkerâ qahapie Gileade guru jaŋere soŋaŋfâc jaŋe Jefita jowaniŋte Tobe mâreŋko rambiŋ.

⁶Ra fisirâ Jefita ʒiŋuc âzâcnembiŋ: “Fârâ micne banâretec Amoŋŋic jopanʒepeneŋ.”

⁷Mupie Jefitazi ʒiŋuc jazawec: “Ŋoŋe nore takic‐ŋopame mamac‐nanere fickonec jâpecnumbiŋ. Ʒi ine sipirickezo ehuc wemocte norao wareŋgopieŋ?”

⁸Mume Gileade guru jaŋere soŋaŋfâc jaŋe ʒiŋuc âzâcnembiŋ: “Irec hâcne nâŋehec rarâ Amoŋŋic jaŋehec ʒika qahuc Gileade mâreŋte ŋecjucfâc nâŋere micne jucmurâ jowacguzo wareŋgopeneŋ.”

⁹Eme Jefitazi Gileade guru jaŋere soŋaŋfâc ʒiŋuc jazawec: “Ŋoŋe Amoŋŋic jaŋehec ʒika qapemurâ mocwâc bârisiecnupie Wofuŋzi nore meo râec‐jopaocmuo ine micne‐ŋeŋic jupemu.”

¹⁰Iŋuc mume Gileade guru jaŋere soŋaŋfâc jaŋe ʒiŋuc muhuc âzâcnembiŋ: “Wofuŋzi dâŋnâŋec soŋaŋkeha go mukomec iŋuc ejâmbâŋkenaŋmu.”

¹¹Iŋuc mupie Jefita e Gileade guru jaŋere soŋaŋfâc jaŋehec rambiŋ. Rapie ŋic jaŋe micne bapa‐jeŋic âkendâŋnembiŋ. Eme Jefita e Mizipa wâneŋko dâŋticne sasawa Wofuŋte maio râe‐fârewec.

¹²Iŋuc erâ Jefita e Amoŋŋic jaŋere ŋicwofuŋtao kiŋaŋ sorec‐jopahuc muwec: “Go nore weniŋuc muhuc mâreŋ‐naneo ʒika qazore warekomec?”

¹³Mume Amoŋŋic jaŋere ŋicwofuŋ e Jefita kiŋaŋŋicfâc‐ticne jaŋere dâŋ bâtikie‐jarehuc muwec: “Israe ŋic jaŋe Aigita mâreŋkonec wefuhuc Aronoŋ opâonec raku Jaboko opâo fisirâ raku Jordaŋ opâo fisikac mâreŋ i nowac rombiŋ. Irec miŋecgac ine wamaoa bârisie‐narezo.”

¹⁴Eme Jefita e Amoŋŋic jaŋere ŋicwofuŋtao kiŋaŋ mocwâc sorec‐jopawec.

¹⁵Ehuc âzâcnerâ muwec: “Jefita e kecʒiŋuc mukac: Israe ŋic jaŋe Moabi mâreŋ me Amoŋŋic jaŋere mâreŋ i mi jowac rombiŋ.

¹⁶Jaŋe Aigita mâreŋkonec wefumbiŋ dameŋ ira mâreŋ burocnao rahuc Hâwec Bâbâroŋko fisirâ Kadesi haeo fisimbiŋ.

¹⁷Fisirâ Edom ŋicwofuŋtao kiŋaŋ sorec‐jopahuc kecʒiŋuc mumbiŋ: ‘Nâŋe gore mâreŋko fotâcnezo muŋgopeneŋ, irec sifu mac mana‐nârec.’ Edom ŋicwofuŋ e ine mi mana‐jarewec. Ehame Moabi ŋicwofuŋtao iŋuc jaha dâŋ râepie rawec. Eme e wâc iŋuc jaha mi mana‐jarewec. Iŋuc eme Israe ŋic jaŋe Kadesi haeoa jumbiŋ.

¹⁸Juku mâreŋ burocne fotâcnerâ Edom â Moabi mâreŋ bârârec‐jofahuc Moabi ʒoaŋ wewefunaopec fisimbiŋ. Ehuc Aronoŋ opâ ŋifecnao teuŋ âtembiŋ. Aronoŋ opâzi Moabi mâreŋte ma ewecte jaŋe Moabi mâreŋko mi raʒimbiŋ.

¹⁹Erâ Israe ŋic jaŋe Amori ŋic jaŋere ŋicwofuŋ Sihoŋ, Hesiboŋ ŋicwofuŋ hâcne, erao kiŋaŋ sorec‐jopambiŋ. Ehuc âzâcnerâ mumbiŋ: ‘Nâŋe mâreŋgao fotâcnerâ mâreŋ‐nâŋecko fisinaŋte mana‐nârecmurâ muŋgopeneŋ.’

²⁰Eme Sihoŋ e Israe ŋic jaŋe mâreŋ‐ticnao fotâcnezore mupie maŋjahec ejarewec. Irec Sihoŋ e ŋicfâcticne hetumaŋ‐joparâ Jahazi haeo teuŋ âterâ fohuc Israe ŋic jaŋehec qaqac embiŋ.

²¹Ehame Wofuŋ Anutuzi Sihoŋ â ŋicfâc‐ticne Israe ŋic jaŋere meo râec‐jopame sanaŋke‐jarembiŋ. Sanaŋkerâ Amori ŋic jaŋere mâreŋ sasawa i ro rauc embiŋ.

²²Ehuc Amori ŋic jaŋere mâreŋ Aronoŋ opâonec raku Jaboko opâo fisikac, erâ mâreŋ burocnaonec raku Jordaŋ opâo fisikac i ro rauc efârembiŋ.

²³Ehuc Jefitazi Sihoŋ âzâcnewec: Israere Wofuŋ Anutuzi ŋicfâc‐ticne jaŋere erâ Amori ŋic mâreŋ jowac rowec i goki mocwâc rozo mukic me?

²⁴Go nemuge Kemosizi wiac tahacguwec i sawa mi rauckenʒaŋ? Eme nâŋe wiac sasawa rauckenaŋte Wofuŋ Anutu‐nâŋeczi nâre tahac ewec i nâŋere biŋe eocmu.

²⁵Go Ziporo ŋokâ‐ticne Balake, Moabi jaŋere ŋicwofuŋ, e sirickekomec me? E Isare ŋic jaŋe râsi ejarehuc ʒika moc qawec me?

²⁶Israe ŋic jaŋe Hesiboŋ haeo â hae piic piic gâcne, erâ Aroe hae â hae rârec rârec gâcne erâ Aronoŋ opâ heririŋ hae ŋerawec ira jara 300 jumbiŋ. Eme dameŋ ira wemocte mi romeŋ?

²⁷No gorao bahac moc mi bâfuapo. Goki ine ʒika qahuc norao bahac bâfuakomec. Irec miŋecgac ʒi Mumutara Wofuŋzi Israe ŋic â Amoŋŋic nâŋâcne dâŋ fârine muzejec.”

²⁸Amoŋ ŋicwofuŋ e ine Jefitazi dâŋ râecneme rawec irec hazec moc mi râewec.

²⁹Ehame Wofuŋte Mârozi Jefita neŋgoc ŋecnehame Gileade â Manase mâreŋ fotâcne‐fârerâ Gileade mâreŋko Mizipa haeo fisiwec. Erâ irecnec Amoŋŋic jaŋerao rawec.

³⁰Ehuc Jefitazi Wofuŋtao mupaŋkehuc muwec: “Go Amoŋŋic nore meo râec‐jopacmuo

³¹ine ʒika qatarahuc Amoŋŋic jaŋeraonec risiehape moczi bâbâni ficnaneonec bâfuacnuocte wahaocmu e Wofuŋte biŋe, e hâcne bâzi rikepemu.”

³²Iŋuc murâ Amoŋŋic jaŋehec qaqac eniŋte rawec. Rahame Wofuŋzi Amoŋŋic meticnao râec‐jopawec.

³³Eme e Aroe opâonec raku Miniti haeo fisikac ŋondeŋ irec hae 20 ŋerawec i imacke‐fârerâ Abe‐Keramim mâreŋko fisiwec. Ŋondeŋ ira ŋic afecne mi qâhâmoc‐jopawec. Iŋuc ehuc Israe ŋic jaŋe Amoŋŋic bâuruŋ‐jopambiŋ.

³⁴Eme Jefita e Mizipa hae‐ticnao risiewec. Ehame otâ‐ticne e bâfuaocte gae woŋgâŋhec fisiwec. E ɋâricmac‐ticne mocjaha hâcne. Erao ʒuhuckerâ ŋokâ me otâ gâcne moc mi fuarâ jucnembiŋ.

³⁵Eme Jefitazi e honerâ ŋaqi‐ticne bâsuckehuc muwec: “Jei, otâ‐nane, go iŋuc erâ maŋbahac bâfua‐narehuc herândiŋnukomec. No Wofuŋtao mumupaŋ dâŋ mupo i sâcne mi bârâriepemu.”

³⁶Mume naruzi âzâcnerâ muwec: “Mamac‐nane, go Wofuŋ dâŋ âzâcnemeŋ dameŋ ira Wofuŋzi Amoŋŋic râsifâcge okacne bazu‐jarewecte micgaonec dâŋ wahawec irec sâc jaha fuazejec.”

³⁷Erâ ʒuhuckerâ mamac‐ticne ʒiŋuc âzâcnewec: “Wiac ʒiŋuc sawa enarec: Râecnutec rarâ tikio mosa jajahec âgofâc‐nane jaŋehec rambaŋ juhuc naru ʒeŋoŋ juekopac irec ki busâqoc ezepac.”