Mini Gigabi 8:7-36

⁷I̱na horo bibahendengi bi henenego hangu laga kogoni. Ke̱ holenebi bi yole ko tara tara ngarubi i̱ hame nalagaore kogoni.

⁸I̱na bi laga bialu kogoni bibahende tigabi hanguore lalu kogoni. Bi ke̱ howabi wali agali mo guya holebi mbira nalagaore kogoni.

⁹Wali agali tinaga mitangi bulenebi manda bulenebi wále tigabi karume i̱na bi larogonaga tenego manda biai ka. Tigua i̱na bi larogoni henene laralo manda bulebira.

¹⁰I̱naga bi tíhondo langialu kogoni muni ngolo silibabi ale ndo i̱naga bi ogoni ibu galone daligaore pale ngago tígua ogoni duniniore lowa yamilimu.

¹¹I̱ mini Bayale Gigabi kogoni. Dindini to̱le̱ ale tara tara ngiringarale palido hene duguwa muni milo wabu ngarubi ndo kogoni. Mbirale mbira baya tí hame lagane ale dindini ngarubi ndo i̱ baya gibi daligaore kogoni.

¹²I̱ mini Bayale Gigabi kogoni. Mana bayale wále agua bialu holene nga lalu i̱na manda bidogoni. I̱na mbirale bibahende bayuwaore manda biai howa mbirale baya hangu dabaga bulenego manda bidogoni.

¹³Wali agali Anduane Homogo andaneha howa ibugua laradagua bialu haga karume mana ko bulene handabe manga holebira. Mine holeneru i̱ninaga mini mo yaraga holeneru mana ko tara tara buleneru ke̱ holeneru mana uruni aleru i̱ hame nalagaore kogoni.

¹⁴I̱na mbirale bule lalu manda mandabu wuwa bule ledogonidagua biruli. I̱ mitangi bayuwa tigabiore biaga howa hongo gibihe kogoni.

¹⁵Kini agali karumebi agali haguane karumebi tininaga dindi bayuwa hondo helo i̱na biamogo bialu dindi mo baya holenenaga bi mana bayuwa wabu wilo biamogo biruli.

¹⁶Dindini wali agali hondo haga agali haguane karu damenego bibahendeore ta nabi i̱na biamogo bigi berogome tigua wali agali haru kagoni.

¹⁷Wali agali i̱ hondole lowa hongo howa taya bialu karume i̱ handa walia holebira. Wali agali i̱ gubalini haga karu i̱na ti gubalini timbuniore haga kogoni.

¹⁸I̱na wali agali mo homogo holene mbirale dewaorebi mini mo yaraga holenebi tihondo mule kogoni. Ti mana bayale tigabi bima pialu ti homogo holenenaga mbirale bayale bayale handa walia helo hamelo kogoni.

¹⁹I̱na mbirale tihondo miagane ngogo muni ngolo silibaru emene bayale lowa baya daligaore miaga kogoni.

²⁰Horo bibahendengi i̱na mana tigabi hangu bialu haga kogoni. Dabolene tigabi dege dabaga kogoni.

²¹Wali agali i̱ gubalini haga karu i̱na tihondo homogo holenenaga dewa mialu ti andagani mbirale bayale bayaleme wu to̱lo tagi helaruli.

²²Ala bambaore Anduane Homogohanda mbirale wabule lowa i̱ore ala wabini. Ani buwa mani ibugua mbirale maru maru wabini.

²³Ala bambaore Anduane Homogohanda dindi nawabi howa piganengi i̱ore ala wabiyagola i̱ ala hene.

²⁴Anduane Homogohanda iba solowarabi iba bedaru damene bibahendeorebi nawabi howa i̱ore ala tagira íbu helenego kogoni.

²⁵Hari emene wedarubi timbuni wedarubi nawabi howa i̱ore ala wabu helenego kogoni.

²⁶Dindi bibahende ngarubi mabu wima pedarubi uruni bibahende nawiaha i̱ ala wabini.

²⁷Anduane Homogohanda hari daliga li kago wabialu howa hari ligonime iba solowara mo mabu bupe helayadagoningi i̱ ibula hene.

²⁸Ibugua beraliba li harini ngelalu dindiha howa iba dugu dagadaga bilalu dindi biru namu lalu iba solowara tagira íbu berelayadagoni i̱ hewane dege ani bini.

²⁹Iba solowara ibu birairi helogoria tu bo mialu tu o werogo bolodaga holeni lalu lamiyangi i̱ hene. Dindi timbuni ogoni wabu wulenaga gumuni ala ibu pelayangi i̱ hene.

³⁰Anduane Homogohanda biabe uruni bigi biyangi i̱ ibu heba henego ibugua i̱ mbirale mandabi biabe de hondo haga haradagua helaya. Ibugua mbirale wabigi biyaru hondowa i̱na turu gibiore ho harugome Anduane Homogo ibu mo turu haga biru. I̱na Anduane Homogo ibu deni turu timbuniore ho haru.

³¹Dindi ogo bibahende wabu wiyagobi wali agali dindi ogoriani wabu helayagobi hondowa i̱ turu timbuniore ho haru.

³²Anigo ai mini bayale gigabi ibugua bi agua latago hara. I̱naga waneiginiru-o tígua i̱naga bi larogo baya hangu hale halu i̱na biagane mana ngodagua tígua talialu bilimu. Anidagua birimiyagua tí turuho holeberami.

³³I̱na tí lawai haga berogoni baya hangu hale haga bilimu. Ani birimiyagua tí mini bayale gigabiwi holeberami. Mana ogonidagua bulenego hado wanahalimu.

³⁴Wali agali i̱naga bi larogo hale halu biaga karu ti turu holene nga. I̱na ti horo bibahendengi lawai holiya ibuwa i̱ ubanda tagi biaga anda harabani íbu haabo haga karu ti turu haga kagoni.

³⁵Wali agali i̱ yamu yu karu ti holeneore yu holebira. Ani bialu Anduane Homogo ibugua tihondo turuore ho holebira.

³⁶Wali agali i̱ yamia nabi karu ti tinime tini mo ko halu ka. Mbirali i̱ handabe mangaho kago ibu homolene hamelo kagoni.