Poropepe 8:7-36

⁷Namba pii kinyi angi lenge dokome pii kyambo dupwa epe kanda nange.

⁸Dokona nambame pii letono dupwa peparae kinyiko lenge dee mendepe kyambo lapala mendena kata palyuo pii nange.

⁹Akali mendeme mona kandapala soo walengena palyuo karenge dee mendeme mana poraiyuo nyingi ramo doko baa soo oto karenge.

¹⁰Dokona kana kulingi nyingi doko suu pyao nambana mana pii doko nyelapape. Dee kana golo rao kui kui lasi rombo palyuo nyingi doko suu pyao nambana mona palenge singinya renge doko rombo palyuo nyelapape.

¹¹Namba mona palenge singinya renge doko kamame wakasa ingyapala mamakupi kalya pingi bangepe isa palyingi. Dokona ingyuo emba range nyelana suu pilini doko namba mona palenge singinya rengepa manda manja nara ingyara.

¹²Namba mona palenge singinya renge dokome soo gisinginya renge doko namba keta palenge. Dee soo nyinginya renge palengeko dokome namba kote dupwa rolae ingyuo singi.

¹³Nambame wambu range mupwa wakasa lao suu pyapala pii panga soo karo kata koona penge dupwa kando epe kanda nange. Dokona ingyuo akali mendeme Anatu andakeŋe lao pakao pyuo karara ramo doko baa koo dupwa epe kanda nao kararasa pira.

¹⁴Nambame dopa pyuo piru lao rapa rapa pyuo pipala angi dokona palyuo pyuo penge. Dopa pyuo namba soo nyuo porai ingyuo karenge.

¹⁵Nambame kiŋi dupwa iso karena lao dee gapomane dupwa lowa waso lena lao nambame nyisingi.

¹⁶Isa yuu dakena gapomanena akali kamongope kiŋipi karaminyi dupwa nambame nyisapunu pyuo karaminyi.

¹⁷Mendeme namba kotara ramo dokome namba kando nyera. Nambame wambu namba mona retenge dupwa isingi monako retenge.

¹⁸Namba keta bange aelyamo karenge dokome mainya rae maipala ketae pyambuo maingi. Dopa pyuo namba kapa palyuo kamongapala maiyuo kumakange.

¹⁹Namba keta emba bange soo nyilini dupwa kana golo rao kui kui lasi dokopa manda daa. Dee kana kulingi keyange dokopa kapa daako.

²⁰Namba yulu rolaena kata iki pao kote singi kata angi dokona moko minyuo penge.

²¹Namba mona retenge dupwa bange malu maingi dee bange dupwame nakamana anda dupwa soo ketae penge.

²²Kamongome yuu wamba kanda soo dokopa bange dupwa wasalana karo dokopa namba mona palenge singinya renge doko wambo ingyuo wasiya.

²³Yuu muu dupwa kanda sepa nao karo wambo peparae doko namba kanda soo wasiya.

²⁴Dee namba ipwa kotape ipwa guu lao epengepe dupwa epapa nayamopa namba doko wambo manjo nyiya.

²⁵Namba yuu kyaupi dee yuu manda dupwa silyamuli pyuo sepa nayamopa namba doko wambo mandeya.

²⁶Anatumi isa yuu dakepa yuu isako pulyuo silyamo dupwape yuu sinjimu wambo siya dokope wasepa nayamopa namba doko wambo mandeya.

²⁷Dee yake doko sera panda reteyamo dokopa namba dokona kareyo. Dopa pyuo yake yuupa pakali lao koe pyao peyamo dokopa namba dokona opetae kareyoko.

²⁸Baame yake dokona kopa sinya lao ipwa kota pete dokona piso mee ipwa guu lena lao waso

²⁹dee ipwa kota dokona siyamo dupwa kando baame lao raeyo paa napala silyamuli pyuo sinya lao leyamo dokopa namba kareyo. Dopako pyuo dee yuu kikurenge dupwa waso reteyamo dokopa namba dokona kareyoko.

³⁰Yuu gii dupwa pipya namba akali anda puu rombo minyingi dopale ingyuo baa role kareyo. Yuu peparae nambame baa rae mainyi pyambuo dee namba baa role karapala rae maiyuo piyu.

³¹Wambu isa yuunya enenge sipurao paleyaminyi dupwa kando dee yuu muu peparae dupwana kando pipala rae maiyuo kareyo.

³²Epapu akali parange dupwa nambana pii selapape. Sepala nambame letonoli pyuo pirami ramo doko nakama rae mairami.

³³Nakama mana letono doko selapa. Mona palenge singinya renge doko nyuo kame kame see nalapape.

³⁴Akali mende nambana anda kame kambu konandawame dokona isaro petengepe dee akali mende nambana pii soo nyingipi dupwa rae mairami.

³⁵Akali mendeme namba kotara dokome lete karenge renge doko kando nyera. Nyeramo dokopa Kamongome baa kando rae maira.

³⁶Akali mendeme namba kando nyii nara ramo doko baa range randa nyera. Mendeme namba epe kanda nara ramo doko baa range kumungi renge doko mona reto kararasa pira, leya.