Olcueih 8:7-36

⁷Ka ka loh oltak a thuep tih halangnah te ka hmuilai kah a tueilaehkoi ni.

⁸Ka ka dongkah duengnah olthui boeih he a hloo vilvak moenih.

⁹Aka yakming ham tah boeih langya tih mingnah aka dang ham tah thuem ngawn.

¹⁰Ka thuituennah tangka nen pawt tih, mingnah he sui a coelh lakah khaw lo lah.

¹¹Cueihnah tah lungvang lakah then tih ngaihnah sarhui khaw te nen te vanat sak thai pawh.

¹²Kamah tah cueihnah, khinglangnah neh kho ka sak tih thuepnah dongkah mingnah te ka hmuh.

¹³BOEIPA hinyahnah dongah a thae la koevoeinah te thiinah ham ni hoemdamnah neh a thae longpuei khaw, calaak ol khaw ka hmuhuet.

¹⁴Cilsuep neh lungming cueihnah tah kamah taengah, ka yakmingnah neh, kamah ham thayung thamal la om.

¹⁵Kai rhangneh manghai rhoek loh manghai tih boeica rhoek loh duengnah neh a taem uh.

¹⁶Kai rhangneh mangpa rhoek khaw boei uh tih hlangcong boeih loh duengnah lai a tloek uh.

¹⁷Kai aka lung, aka lungnah te ka lungnah tih kai aka toem rhoek loh kai m'hmuh uh.

¹⁸Khuehtawn neh thangpomnah khaw, aka nguel boeirhaeng neh duengnah khaw kamah taengah om.

¹⁹Sui neh suicilh lakah ka thaih then tih ka cangvuei khaw cak lakah cae.

²⁰Duengnah caehlong ah tiktamnah a hawn khui la ka pongpa.

²¹Kai aka lungnah tah ka koe ka pang sak tih a thakvoh te ka koei pah.

²²Daengrhae daengkhoi lamkah a bibi, hlamat kah a longpuei a tongcuek ah BOEIPA loh kai n'lai coeng.

²³Khosuen lamloh, a lu lamloh, diklai khothoeng lamloh kai n'hloe.

²⁴Kai ka poe vaengah tuidung khaw ana om pawh, tuisih tui ana phul pawh.

²⁵Tlang a buek hlan ah som a tueng hlan ah ka cuen coeng.

²⁶Te vaengah diklai khaw, tollong khaw, lunglai dongkah laipi lamhma khaw ana saii moenih.

²⁷Vaan a soepsoei ham vaengkah, tuidung hman kah a kueluek te a tarhit ham vaengkah khaw kamah ni.

²⁸A sang hmuen kah khomong thah sak ham khaw, tuidung tuiphuet tanglue sak ham vaengah khaw,

²⁹Tuitunli te a rhi suem pah ham vaengah khaw ka om coeng. Te dongah tui loh BOEIPA ol te poe pawh. Diklai kah a yung te a tarhit ham vaengah ka om coeng.

³⁰Amah taengah bibi thai la ka om tih hnin bal hnin bal hlahmaenah neh ka om. A tue boeih dongah amah mikhmuh ah ka luem.

³¹A khohmuen kah lunglai dongah aka luem loh hlang ca te khaw ka hlahmaenah coeng.

³²Te dongah ca rhoek loh kamah taengah hnatun uh lamtah kamah kah yoethen longpuei ngaithuen uh.

³³Thuituennah he hnatun lamtah cueih lamtah hlahpham boeh.

³⁴Kamah taengah aka hnatun Ka thohkhaih taengah a hnin a hnin ah aka hak, ka thohka kah rhungsut aka ngaithuen hlang tah a yoethen pai.

³⁵Kai aka hmu long tah hingnah te a hmuh rhoe a hmuh tih, BOEIPA taengkah kolonah a dang.

³⁶Tedae kai aka hmaang long tah a hinglu a huet, kai aka thiinah boeih loh dueknah te a lungnah.