Text copied!
CopyCompare
Banal na Bibliya - Mga Awit - Mga Awit 119

Mga Awit 119:42-143

Play LogoGoogle Play  APK Logo APK
Click on verse(s) to share them!
42para may itutugon ako sa mga nangungutya sa akin, dahil nagtitiwala ako sa iyong salita.
43Huwag mong alisin sa aking bibig ang salita ng katotohanan, dahil naghintay ako para sa matuwid mong mga utos.
44Patuloy kong susundin ang iyong batas magpakailanpaman.
45Maglalakad ako nang ligtas, dahil hinahanap ko ang iyong mga tagubilin.
46Magsasalita ako tungkol sa mga banal mong utos sa harap ng mga hari at hindi mahihiya.
47Nasisiyahan ako sa iyong mga kautusan, na lubos kong minamahal.
48Itataas ko ang aking mga kamay sa iyong mga kautusan, na aking minamahal. Pag-iisipan kong mabuti ang iyong mga alituntunin. ZAYIN.
49Alalahanin mo ang mga ipinangako mo sa iyong lingkod dahil binigyan mo ako ng pag-asa.
50Ito ang kaaliwan ko sa aking paghihirap: na pinapanatili akong buhay ng pangako mo.
51Hinahamak ako ng mga mapagmalaki, pero hindi ako tumalikod sa iyong batas.
52Inisip ko ang tungkol sa mga matuwid mong utos noong unang panahon, Yahweh, at inaaliw ko ang aking sarili.
53Napuno ako ng matinding galit dahil sa mga masasama na hindi sumusunod sa iyong batas.
54Ang mga alituntunin mo ang naging mga awit ko sa bahay na pansamantala kong tinitirhan.
55Iniisip ko ang pangalan mo sa gabi, Yahweh, at iniingatan ang iyong batas.
56Ito ang naging gawain ko dahil sinunod ko ang mga tagubilin mo. HETH.
57Si Yahweh ang kabahagi ko; napagpasiyahan kong sundin ang kaniyang mga salita.
58Buong puso kong hinihiling ang iyong kagandahang-loob; maging mahabagin ka sa akin gaya ng pinangako ng iyong salita.
59Siniyasat ko ang aking mga pamumuhay at binaling ko ang aking mga paa sa iyong mga utos.
60Nagmamamadali ako at hindi ipinagpaliban ang pagsunod sa iyong mga kautusan.
61Nabitag ako ng lubid ng masasama; hindi ko kinalimutan ang iyong batas.
62Bumabangon ako nang hatinggabi para magpasalamat sa iyo dahil sa matuwid mong mga utos.
63Kasamahan ako ng lahat ng mga nagpaparangal sa iyo, ng lahat ng mga sumusunod sa mga tagubilin mo.
64Ang mundo, Yahweh, ay puno ng katapatan mo sa tipan; ituro mo sa akin ang iyong mga alituntunin. TETH
65Gumawa ka ng kabutihan sa iyong lingkod, Yahweh, sa pamamagitan ng iyong salita.
66Turuan mo ako ng tamang pagpapasya at pang-unawa, dahil naniniwala ako sa mga kautusan mo.
67Bago ako nasaktan, naligaw ako, pero ngayon, sumusunod ako sa salita mo.
68Mabuti ka at ikaw lang ang siyang gumagawa ng kabutihan; ituro mo sa akin ang iyong alituntunin.
69Siniraan ako sa mga kasinungalingan ng mayayabang, pero buong puso kong pinapanatili ang mga tagubilin mo.
70Tumigas ang kanilang mga puso, pero nasisiyahan ako sa batas mo.
71Nakabubuti para sa akin na naghirap ako para matutunan ko ang mga alituntunin mo.
72Mas mahalaga ang mga tagubilin mula sa iyong bibig kaysa sa libo-libong piraso ng ginto at pilak. YOD
73Ang mga kamay mo ang gumawa at humubog sa akin; bigyan mo ako ng pang-unawa para matutunan ko ang mga kautusan mo.
74Matutuwa ang mga nagpaparangal sa iyo kapag nakikita nila ako dahil nakatagpo ako ng pag-asa sa iyong salita.
75Alam ko, Yahweh, na makatarungan ang mga utos mo, at sa katapatang ito, pinahirapan mo ako.
76Hayaan mong aliwin ako ng katapatan mo sa tipan gaya ng ipinangako mo sa iyong lingkod.
77Kahabagan mo ako para mabuhay ako, dahil ang batas mo ang kasiyahan ko.
78Hayaan mong malagay sa kahihiyan ang mga mapagmalaki, dahil siniraan nila ako; pero magninilay ako sa mga tagubilin mo.
79Nawa bumalik sa akin ang mga nagpaparangal sa iyo, silang mga nakakaalam ng mga utos mo sa tipan.
80Maging malinis nawa ang aking puso na may paggalang sa mga alituntunin mo para hindi ako malagay sa kahihiyan. KAPH.
81Nanghihina ako nang may pananabik na ako ay iyong sagipin! Umaasa ako sa iyong salita!
82Nananabik ang aking mga mata na makita ang iyong pinangako; kailan mo kaya ako aaliwin?
83Dahil naging tulad ako ng pinauusukang sisidlan ng alak; hindi ko kinakalimutan ang iyong mga alituntunin.
84Gaano katagal ito pagtitiisan ng iyong lingkod; kailan mo hahatulan ang mga umuusig sa akin?
85Naghukay ng malalim ang mga mapagmalaki para sa akin, na nilalabag ang iyong batas.
86Lahat ng mga kautusan mo ay maaasahan; inuusig ako ng mga tao nang may kamalian; tulungan mo ako.
87Halos tapusin nila ang buhay ko sa mundo, pero hindi ko itinakwil ang mga tagubilin mo.
88Panatilihin mo akong buhay gaya ng ipinangako ng katapatan mo sa tipan, para maingatan ko ang sinabi mo sa mga utos mo sa tipan. LAMEDH.
89Mananatili ang salita mo, Yahweh, magpakailanman; matatag ang salita mo sa kalangitan.
90Mananatili ang katapatan mo sa lahat ng salinlahi; itinatag mo ang mundo, at ito ay mananatili.
91Nagpapatuloy hanggang ngayon ang lahat ng mga bagay, gaya ng sinabi mo sa matuwid mong mga utos, dahil mga lingkod mo ang lahat ng mga bagay.
92Kung hindi ko naging kasiyahan ang iyong batas, namatay na sana ako sa aking paghihirap.
93Hindi ko kailanman makakalimutan ang mga tagubilin mo, dahil sa pamamagitan nito, pinanatili mo akong buhay.
94Ako ay sa iyo; iligtas mo ako, dahil hinahanap ko ang mga tagubilin mo.
95Ang mga masasama ay naghahanda para ako ay sirain, pero uunawain ko ang mga utos mo sa tipan.
96Nakita ko na may hangganan ang lahat ng bagay, pero malawak ang iyong mga kautusan at walang hangganan. MEM.
97O iniibig ko ang iyong batas! Ito ang pinagninilayan ko buong araw.
98Higit akong pinatatalino ng mga kautusan mo kaysa sa mga kaaway ko, dahil lagi kong kasama ang mga kautusan mo.
99Mayroon akong higit na pang-unawa kaysa sa lahat ng aking mga guro, dahil pinagninilayan ko ang mga utos mo sa tipan.
100Higit akong nakauunawa kaysa sa mga nakatatanda sa akin; dahil ito sa pagsunod ko sa iyong mga tagubilin.
101Tumalikod ako mula sa landas ng kasamaan para masunod ko ang salita mo.
102Hindi ako tumalikod mula sa matuwid mong mga utos dahil tinuruan mo ako.
103Napakatamis sa aking panlasa ang iyong mga salita, oo, mas matamis kaysa sa pulot sa aking bibig!
104Sa pamamagitan ng mga tagubilin mo, natamo ko ang tamang pagpapasiya; kaya nga kinapopootan ko ang bawat maling paraan. NUN.
105Ang salita mo ay ilawan ng aking mga paa at liwanag para sa aking landas.
106Nangako ako at pinagtibay ko ito, na susundin ko ang mga utos mo.
107Labis akong nasasaktan; panatilihin mo akong buhay, Yahweh, gaya ng ipinangako mo sa iyong salita.
108Pakiusap, tanggapin mo Yahweh ang kusang-loob na mga alay ng aking bibig, at ituro mo sa akin ang matuwid mong mga utos.
109Nasa kamay ko palagi ang aking buhay, pero hindi ko kinalilimutan ang iyong batas.
110Naglagay ng patibong para sa akin ang mga masasama, pero hindi ako naligaw mula sa mga tagubilin mo.
111Inaangkin ko ang mga utos mo sa tipan bilang aking mana magpakailanman, dahil ito ang kagalakan ng aking puso.
112Nakalaan ang aking puso sa pagsunod sa mga alituntunin mo magpakailanman hanggang sa wakas. SAMEKH.
113Galit ako sa mga walang paninindigan, pero mahal ko ang iyong batas.
114Ikaw ang aking kublihan at kalasag; naghihintay ako para sa iyong salita.
115Lumayo kayo sa akin, kayong mga gumagawa ng masama, para masunod ko ang mga kautusan ng aking Diyos.
116Palakasin mo ako sa pamamagitan ng iyong salita para mabuhay ako at hindi mapahiya sa aking inaasahan.
117Tulungan mo ako at magiging ligtas ako; lagi kong pinagninilayan ang mga alituntunin mo.
118Itinatakwil mo ang lahat ng mga nalilihis mula sa iyong mga alituntunin, dahil mapanlinlang at hindi maaasahan ang mga taong iyon.
119Inaalis mo ang lahat ng masasama sa mundo katulad ng dumi; kaya nga, minamahal ko ang banal mong mga kautusan.
120Nanginginig ang aking katawan sa takot sa iyo, at natatakot ako sa matuwid mong mga utos. AYIN.
121Ginagawa ko kung ano ang makatarungan at matuwid; huwag mo akong iwanan sa mga nang-aapi sa akin.
122Siguraduhin mo ang kapakanan ng iyong lingkod, huwag mong hayaang apihin ako ng mga mapagmalaki.
123Napapagal ang aking mga mata sa paghihintay para sa iyong kaligtasan at sa matuwid mong salita.
124Ipakita mo sa iyong lingkod ang katapatan mo sa tipan, at ituro mo sa akin ang iyong mga alituntunin.
125Ako ay iyong lingkod; bigyan mo ako ng pang-unawa para malaman ko ang mga utos mo sa tipan.
126Oras na para kumilos si Yahweh, dahil nilalabag ng mga tao ang iyong batas.
127Tunay ngang minamahal ko ang iyong mga kautusan higit sa ginto, higit sa purong ginto.
128Kaya nga, sumusunod ako nang mabuti sa lahat ng mga tagubilin mo, at napopoot ako sa bawat landas ng kamalian. PE.
129Kahanga-hanga ang mga patakaran mo, kaya nga sinusunod ko ang mga ito.
130Ang paglalahad ng mga salita mo ay nagbibigay ng liwanag; nagbibigay ito ng pang-unawa sa mga hindi naturuan.
131Binubuksan ko ang aking bibig at humihingal dahil nananabik ako para sa mga kautusan mo.
132Humarap ka sa akin at mahabag, gaya ng lagi mong ginagawa para sa mga nagmamahal sa iyong pangalan.
133Akayin mo ang aking mga yapak sa pamamagitan ng iyong salita; huwag mong hayaang pamunuan ako ng kahit anong kasalanan.
134Tubusin mo ako mula sa pang-aapi ng mga tao para masunod ko ang mga tagubilin mo.
135Hayaan mong magliwanag ang iyong mukha sa iyong lingkod, at ituro mo sa akin ang iyong mga alituntunin.
136Napakaraming mga luha ang umaagos mula sa aking mga mata dahil hindi sinusunod ng mga tao ang iyong batas. TSADHE.
137Matuwid ka, Yahweh, at makatarungan ang mga utos mo.
138Matuwid at matapat mong ibinigay ang mga utos mo sa tipan.
139Winasak ako ng galit dahil kinakalimutan ng mga kalaban ko ang mga salita mo.
140Labis nang nasubok ang iyong salita, at iniibig ito ng iyong lingkod.
141Ako ay walang halaga at inalipusta, pero hindi ko pa rin kinalilimutan ang mga tagubilin mo.
142Ang katarungan mo ay matuwid magpakailanman, at ang batas mo ay mapagkakatiwalaan.
143Kahit na natagpuan ako ng bagabag at paghihirap, ang kautusan mo pa rin ang aking kasiyahan.

Read Mga Awit 119Mga Awit 119
Compare Mga Awit 119:42-143Mga Awit 119:42-143