Menge Ininang 8:12-23

¹²Meneng pegtoladà i Felipe kandan tepad te peglowan te Timanem aw si Jesu Cristo, nemenal dan aw binonyagan dan heman, pengkey meama aw bayi.

¹³Nemenal heman si Simon. Penga te pegbonyag kandin, timaking ki Felipe, aw nepela sikandin diyà te kepelahan ininang i Felipe.

¹⁴Pegketaga-taga te menge sogounun i Cristo doton te Jerusalem te nemenal se tege Samarya te kagi te Timanem, insogò dan si Pedro aw si Juan domoton te Samarya amon megtelaban kandan.

¹⁵Pegdateng dan doton, migtawal-tawal dan diyà te Timanem amon domateng se Espiritu Santo kandan,

¹⁶so pengkey nemenal dan ki Jesus aw binonyagan dan, meneng wedà dateng se Espiritu Santo kandan.

¹⁷Pegpemaed i Pedro aw si Juan kandan, dimateng se Espiritu Santo kandan.

¹⁸Pegkità i Simon te imbegay se Espiritu Santo pineokit te pegpemaed te sogounun i Cristo kandan, imbegay din se kwarta diyà kandan

¹⁹aw minikagi, “Begayi a heman te tolos sìyan amon kebegayan te Espiritu Santo se kedita te otaw pemàdan ko.”

²⁰Minikagi si Pedro, “Kebàtan ka aw kwarta no, so eden no aw kebeyadan se ibowang te Timanem.

²¹Wedad labut no te eg-inangen day, so wedà kelobos se pedowan no diyà te Timanem.

²²Pegselsel ka te salà seini. Pegtawal-tawal ka diyà te Pengolo aw mepakay din pegwedaden se medaet ibeg te pedowan nikaw.

²³Netegahan ko te ontò ka pa miningà, aw neallang ka pa te salà.”