Megwewali 7:5-26

⁵Meupiya pa ke edsewayen ki te metau he etew kenà te edeliǥen ki te tulebung he etew.

⁶Is engit te tulebung he etew ne iring te menge zuǥi he ebpenleleǥetì diyà te hapuy. Wazà kayi pulus.

⁷Is metau he etew egkehimu he tulebung emun ebpenlimbung sikandin wey mekeselapì. Su emun ebpesipsip ka ne paaǥi heeyan te kedezeeti nu te ked-etew nu.

⁸Meupiya pa is kedhimasad kenà te kebpuunà. Meupiya pa is kebmepelevayen kenà te kebpelavew.

⁹Kenè ka melemu he mepauk, su is kegkepauk ne iyan neleyaman he ed-ul-ulahan te menge tulebung he etew.

¹⁰Kenè ka insà te, “Maan is meupiya is nehuna he timpu kenà te ǥuntaan?” Su kenà heeyan hustu he insà.

¹¹Meupiya is ketau, iring heini keupiya te menge vutang he egkepengevilin ta. Ebpeketavang heini kenita kayi te ked-ubpè ta kayi te kelibutan,

¹²wey eputè ta heini iring te selapì. Umbe utew ebpeketavang is keuluwanen; ebpeketavang heini wey ki luǥeyazi te untung.

¹³Isipa nu ke hengkey is mibeelan te Megbevayà. Hentei is ebpeketulid te mibulegkù te Megbevayà?

¹⁴Medlipey ka emun meupiya is kebpekesavuk nu. Piru emun edlised ka, tentenuzi nu he iyan is Megbevayà mibeǥey te meupiya he kebpekesavuk wey te kelised. Umbe kenè ta egketuenan ke hengkey is huziyan he egkehitavù.

¹⁵Kayi te untung ku he wazè din pulus, neehè ku is langun: is menge metazeng ne nemematey zutun te metazeng he kebpengungubpaan wey is menge mezaat ne ebpengungubpaan te meluǥayad dutun te mezaat he kebpengungubpaan dan.

¹⁶Kenè nu pesubrahi is ked-isipa nu te keugelingen nu he metazeng ka etawa metau ka. Su paaǥi heini te kedezeeti nu te keugelingen nu.

¹⁷Kenè nu zaan pesubrahi is kegkezaat nu, wey kenè ka medtinulebung. Su emun ebeelan nu heini egkepenggevuan is umur nu.

¹⁸Kenè nu haazà pesubrahi; kinahanglan he ziyè ke zà te liwezaan, su kenà ebpesubra is etew he edtahud te Megbevayà.

¹⁹Dekelà is egkehimu pinaaǥi te ketau te sevaha he etew kenà te egkehimu te sepulù he pengulu te inged.

²⁰Wazà etew kayi te kelibutan he layun dà metazeng is menge vaal zin wey kenà egkesayep.

²¹Kenè nu siǥipaa is langun he egkeǥiyen te etew, su kela ke mezineg nu he ed-rewakan ka te suluǥuen nu.

²²Su netuenan nu he sikew mismu layun nu ed-rewaki is duma.

²³Migezaman ku te edsavut is langun he nengehitavù kayi te kelibutan pinaaǥi te ketau ku. Ed-is-isipen ku he mesavut ku, piru kenè bes haazà.

²⁴Kenè ku egketegkad is nengehitavù; mereǥen heini he edsevuten. Ne wazà ebpekesavut kayi.

²⁵Piru mibpedayun a he ed-istudyu wey edsusi, su wey a mekaangken te ketau wey tavak te menge insè ku, wey para mesavut ku ke maan is tulebung is etew he ebaal te mezaat ne taleng is etew he edtinulebung.

²⁶Nesusi ku he is meungangen he vahi ne mepait pa te kemetayen. Is arig din ne iring te litag, wey is menge velad din he igkepkep din kenikew ne iring te kedina. Ebpekelikey kandin is ebpenunuat te Megbevayà, iyan, egkelitag din mulà is mekesesalà.