Mbouŋ to Yes Israela 97:1-10

¹Yoova, ye kinik tiina to iŋgin mbeb tisob. Tovenen yam tamtoghon to aneep irau taan, lolomim poia. Ve yam mutua tovene paam, tinimim iza.

²Yoova iŋgozgooz tau ila yaghur tae asosooŋa, ve ndoroom ikaui. Ŋgar deŋia toman ŋgar to ulaaŋ, tauto inim pughu pa pooz toni.

³Ye igham yab ighan imuuŋ pani, ve ighan koia tisob.

⁴Ye igham ndug milia irau taan. Tovenen taan ighita, ve irur.

⁵Yoova, ye tiina to iŋgin taan isob. Sawa to ye inim ve ipatooŋ tapiri, lolooz tisob tireer, ve timbiriis ila nagho.

⁶Mbeb naol to tineep ila sambam paroŋania, tipatooŋ Yoova tighaze ŋgar toni deŋia moghon. Ndug tisob tighita mbeb tonowen, ve tighilaal Yoova tighaze ye iza tiina.

⁷Tamtoghon tisob to timbesmbees pa maaron kaaromŋa anunudi, Yoova igham di mayadi. Pasa, maaron kaaromŋa todi tirau mbeb eta maau. Maaron todi tonowen pale tisob tiput aghedi pa Yoova, ve tipaiti.

⁸Maaron, yes to ndug Zion tilooŋ varum pa uraat to yom ughamghami, le lolodi poia. Ve ndug ndug to Yuda paam, tisob tinidi iza. Pasa, yom uyondyood pa tamtoghon tiom, ve uluul di pa pataŋani todi.

⁹Yoova, yom Maaron Tiina. Tamtoghon tisob to taan tineep ila sambam. Yom izam tiina le tiina kat. Ulib pa ndimaronŋa tisob.

¹⁰Yoova lolo pa yes to tighurghur koi pa ŋgar samia. Tamtoghon toni to lolodi ineep tuŋia ila toni, ve titaghon ataam toni, ye inim sigeu padi, leso mbeb eta iwaghamun di sob. Ve ighamgham mulin di ila ndiran samsamia nimadi.