Sam 97:1-10

¹E Zihova si koa Baṉara, madi koa qetu sari na tinoni pa kasia popoa, mi koa qetu gamu pu koa koa rina nunusa koari na lamana.

²Na lei muho si koa pa vari likohaena, koa Baṉara si Asa pa tinoṉoto meke pa vinilasa toṉotona.

³Garunu va kenue la nia Sa sa nika, pude sulu pani sari Nana kana pa vari likohaena.

⁴Sari na Nana kapi si malara pa kasia popoa, dogoria rina tinoni pa pepeso si asa meke neneqara pa minatagutu.

⁵Sari na toqere si noloro guana oto huda pa kenuna e Zihova, pa kenuna sa Baṉara tana doduruna sa popoa pepeso.

⁶Sari na maṉauru si tozi vura nia sa Nana tinoṉoto, meke sari doduru butubutu si dogoria sa Nana ṉinedala.

⁷Sari doduru pu vahesi beku si tava kurekure, sari doduru tamasa si hoqa todoṉo pa kenuna e Zihova.

⁸Qetu sari na tinoni pa Zaione, meke qetuqetu sari na vasivasileana pa Ziuda, sina koa gua koari na Mua vinilasa Goi Zihova.

⁹Zihova, Tamasa Ululuna Hola, Agoi mo sa Ṉati Baṉara pa doduruna sa kasia popoa. Agoi mo si noma hola koari doduru tamasa.

¹⁰Tataru ni e Zihova sarini pu lopu qetu nia sa kinaleana, kopu ni Sa sari na tinoa tadi na Nana tie pu soto va nabu koa Sa, meke va sarei Sa si arini koari na tie kaleadi.