Kap 97:1-10

¹Yawe uŋun kɨla amɨn madep egɨsak. Mɨktɨm gak kɨsɨk kɨsɨk aki. Mɨktɨm tɨm tap binap toŋ ji but galak nandani.

²Gɨkwem gat ae pɨlɨn gat da aŋgwasamal. Aŋpak kɨlegɨkon da amɨn kɨla asak.

³Kɨndap da mibɨl taŋ ɨmɨŋek uwalni aŋgwasɨŋek ekwaŋ uŋun soŋban pasɨlgaŋ.

⁴Uŋun da malni yopban mɨktɨm teŋteŋosok. Mɨktɨm da kaŋek nɨmnɨmɨkdak.

⁵Yawe apban kaŋek kabap da pakbi dagoŋ. Uŋun mɨktɨm morap kɨsi dakon Amɨn Tagɨ egɨsak.

⁶Kundu da aŋpakni kɨlegɨ do yaŋ teŋteŋok aŋakwan mɨŋat amɨn morapyo da tɨlɨmni koŋ.

⁷Amɨn kokup kɨdat gawak yomɨŋek paŋkɨsaŋ uŋun mayak tok paŋ. Kokup kɨdat, ji Yawe gawak ɨmni.

⁸Saion kokup pap amɨn gat, ae Juda mɨktɨmon kokup pap taŋ aŋaŋ kwaŋ uŋun dakon amɨn gat da uŋun nandaŋek, gen kokwin tagɨsi asal uŋun do but galak nandaŋek kɨsɨk kɨsɨk aŋ.

⁹Nido Yawe gak Piŋkop Wɨkwisi egek mɨktɨm morap kɨsi kɨla asal. Gak piŋkop ŋwakŋwarɨ morap kɨsi yapmaŋek mango wukwisi tosok.

¹⁰Ji Yawe but dasi galak taŋ ɨmaŋ amɨn, ji aŋpak yokwi do nandaba ɨŋanisi asak. Iyɨ dakon telagɨ amɨn kabɨni, yokwi aŋ amɨn da kɨsiron baŋ tɨmɨgek kɨlani asak.