Mbouŋ to Yes Israela 52:2-8

²Yom ŋgeu to kaarom! Moghon moghon, ukalkaal ataam pa uwaghamun tamtoghon. Ve saveeŋ isob to ivotvot ila avom, nene inimale gharghar to mata kat.

³Ŋgar poia ve saveeŋ onoon, yom lolom pani maau. Ve ŋgar samia ve saveeŋ kaarom, ghoro lolom pani kat.

⁴Yom avom kaarom. Ve saveeŋ samsamia naol to iwaghamun tamtoghon, lolom pani kat.

⁵Tovenen Maaron pale iwaghamun ghom le usami kat. Irau umundig muul maau. Pale ilooŋ ila ruum tiom lolo, ve isasaar ghom uvot ula pumuri, ghoro ipas ghom ila yes to matadi iyaryaar ne lolodi, ve ipiyaav ghom uzila ndug to mateeŋa.

⁶Ŋgar to pale Maaron igham payom, ighaze ndiran deŋiadi tighita, nene pale timatughez. Ghoro tiŋiŋ payom, ve tisaav tighaze:

⁷“Aghita. Nene ŋgeu to lolo pa igham ulaaŋ ila to Maaron ve iyooŋ ila toni maau. Ye mbaliiŋ tau kat. Ve inumeer mbeb toni naol tonowen toman ŋgar toni samia ighaze pale ighami ineep pooi.”

⁸Eemoghon you nanimale ai oliv to iyoon ilooŋ ila sirsiir to Rumai to Maaron. Pale nayoon tuŋia, ve naneep mala izi taan, Pasa, you nanumeer Maaron naghaze ye pale lolo ineep tuŋia ila to tamtoghon toni, ve iuul di itaghoni taghoni gha ila.