Buk Song 52:2-8

²Yu man bilong giaman, tok bilong yu i olsem resa i sap moa, na i katim nogut narapela man. Olgeta de yu save tingting long bagarapim ol arapela man.

³Yu no laikim gutpela pasin. Yu laikim pasin nogut tasol. Yu no laikim pasin bilong tok tru. Yu save laikim pasin bilong tok giaman tasol.

⁴Yu man bilong giaman. Yu save laikim tumas tok bilong bagarapim ol arapela man.

⁵Tasol harim. God bai i bagarapim yu olgeta. Em bai i holimpas yu na rausim yu long haus bilong yu. Na bai em i pinisim yu olgeta na yu no ken i stap moa long graun.

⁶Ol stretpela man bai i lukim dispela samting i kamap long yu na bai ol i pret. Bai ol i lap long yu na tok olsem,

⁷“Lukim. Dispela man i no laik bai God i helpim em na strongim em. Em i bilip strong long planti mani samting bilong en, na em i ting pasin nogut bai i mekim em i stap gut.”

⁸Tasol mi no olsem. Mi olsem diwai oliv i stap klostu long haus bilong God. Mi bilip long God i save marimari long mi oltaim oltaim.