Markuj 4:4-21

⁴Ni a kamokamorok akai ap moridi on pon kailan al, manpir ap pirido nam ir ala.

⁵A akai moredi on waja takain, waja pwel petepet; irail ari madan wojada, pweki jota pwel lole.

⁶Ni en katipin dakarada, re ap monela o mela pweki jota kalau ar.

⁷A akai moredi nan tuka teketek; o tuka teketek wojada, kajokiala, re ap jota wa.

⁸A akai moredi nan pwel mau o pwaida wa; akai pan me jileijok; a akai me woneijok, a akai me epuki.

⁹A kotin majani: Me jalon a mia men ron, i en ron!

¹⁰A lao kotin kalapukela, men imp a ianaki ekriamen ap kalelapok re a duen karajeraj pukat.

¹¹A ap kotin majani on irail: A muei on komail, en aja duen me rir en wein Kot. A men liki re pan aja meakaroj jan ni karajeraj akan.

¹²Pwe re kilan, ari jota kilan, o roneron, ap jota dedeki; pwe re de pan wukila o dip ar lapwa jan irail.

¹³A ap kotin majani on irail: Komail jota dedeki karajeraj pot et? A iaduen, omail pan aja karajeraj tei ko?

¹⁴Jaunkamor me kamorok jili majan.

¹⁵A mepukat me mi pon kailan al, waja majan moredi on, a re lao ronadar, Jatan ap madanado, ki jan majan, me kamoremoredi on nan monion arail.

¹⁶O mepukat me moredi on wajan takain, re lao ronadar majan o ap madan peren kida ale.

¹⁷A jota kalaua re ’rail ap dadaur eta ekij, lao jonejon o kamekam wiaui pweki majan o, re ap madan makar kida.

¹⁸A mepukat me moredi on nan tuka teketek, me ronada majan.

¹⁹A anan en pai en jappa o inon kapwa, o norok en okotme pwaida, kajokela majan, ap jota wa.

²⁰A mepukat irail, me moredi on nan pwel mau, me ronada majan o, ale o wa, akai pan me jileijok, a akai me woneijok, a akai me epuki.

²¹A kotin majani on irail: Kandel pan wijikedo, pwen ko on pan kajak de pan men wendi? A jote koda won nin deun kandel?