Mak 4:4-21

⁴Agai tedelalo palio, tama te nai wai ge meba te sunumide tudulaluali. Tama ba dabe asiyu, te nai wai ge tuali.

⁵Tama meba nai wai te masigi elalubo badu tudulaluali, tama te tǫ hauwa meni yai madi. Te tǫ aiyanu igilusiąwai madi weyu, tama te nai wai polo holai.

⁶Tiali goli giliga ugwadu naniyu, tama te giligago ulali. Tama te wit nai aga sele meniama, tama tigidali wa pelama, tama sasia pelama isali.

⁷Tama meba nai wai te sesani bono elalubo tomoba tudulaluai. Tama te sesani bono me holama te mesegelali, tama agai nai me walobeo.

⁸Tiali goli te nai wai meba te wiegi yai tǫ ili yai madiba tudulaluama, tama genuai holama, tama nai du walai. Mebago ge dwasianu te 30 walali, mebago te 60 walali, tama mebago geninama mu tama te 100 walalio.”

⁹Tama agai te po me augwalibolo wali, “Te olo elalubo bidi agai te po odiąo,” te po wai.

¹⁰Te nosali te we bidi hauwa aga dali menibadi, Jisas agaduba naga bididuali, tama aga wali pabo bidi nogo si olama sągągo si badi, te meba Jisas aga dali bidalubo bidi dabe dali, augwaligo agabolo te begelama wali po pagede hanalu wali.

¹¹Tama agai te po augwalibolo wai, “Godigo dagebolo te agai te we bidi dabe tonalubo sę page geme dualaluali po page te dagebolo ola mawai dao. Tiali goli te Godigo po odisąma bulu badu bidibo bidi dabe augwaligo da, te eno pusubo po te po digi po begelama, tama wabogo naga te po odobo dao. Te po page augwaligo odobo menio.

¹²Te Godigo po bukude te gasa we bidide polobadu asęani po, te po page te megi bidalubo we bidide elalubao, te e tiwai dao: ‘Te augwaligo tonono bilibadi, tiali goli te augwaligo te subo nai page hania konegobeo. Te augwaligo po odobadi, tiali goli te po page augwaligo me konesiąwani. Tama augwaligo konegi sogo da, teda augwaligo homu begeleyu, tama Godigo augwaligo dwai sę yali sęgę sela sągi da,’ te po polobadu asęani,” Jisasgo te po wai.

¹³Tama Jisasgo augwalibolo te po hanalu wai, “Dagego te eno po digi po begelama wali po page me konebe dawe? Tama tiyu da, teda dagego mena tama te begelama wabo po page tigidali koneaibawe?

¹⁴Te bidigo nai wai bulai po wali agai te Godigo po haniani we bidibolo pusuyu te bulali tiwai dao.

¹⁵Te sunumide tudulaluali po wali te Godigo po odali we bidi hani dabe, tama te sogo naga Satan asama, te Godigo augwali homude bulali po dagala sąwai.

¹⁶Tama meba we bidi augwali te masigi elaluali tǫba tudulaluali nai wai tiwai yai. Augwaligo Godigo po odama, tama polo augwali kolesaga sali, tama augwali tede wiegi yai homu pemene yali.

¹⁷Tiali goli augwaligo sele te dąų me olalubeo. Augwali te dwasianu sogo naga elaluali. Te nosali Godigo po aiyaba elaluainogo ebo bidi mebago te we bidi augwaliba sęgę dali dene dali mobaso da, teda augwaligo te po wali pabo kolesaga tagalaibao.

¹⁸Tama meba we bidi augwali te sesani yai bono elalubo tomoba tudulaluali nai wai tiwai yai. Te hani augwaligo te Godigo po odali,

¹⁹tiali goli augwaligo homu hauwa te tǫde naide elama, tama augwaligo te mone hauwa sisinabo homu elama, tama haniani doado bagede godola pelama pesa yali. Te doado bage dabede homu ebogo te Godigo po mesegelama, tama tebo we bidi hani augwali te nai du me walisiąwai.

²⁰Tiali goli meba we bidi augwali te wiegi yai tǫba tudulaluali nai wai tiwai gilama yai. Te augwaligo Godigo po odama, tama augwaligo selama tama tolaluali, tama augwaligo nai du walali. Mebago te ge dwasianu walu, te mebago hauwa walu, te mebago geninama mu tama waliyu yalio,” Jisasgo te po wai.

²¹Tama agai te po me augwalibolo wai, “Te bidigo lam sole domonama bogoli ebadi tama sela asama, te baket dologoba ma te pibo sai bet dologoba te mubo dawe? Menio. Agai te tebol sai daiba mubo dao.