Maakakuṉu 9:19-33

¹⁹Yiitjulu tjananya yaṉangu tjuṯangka watjaṉu, “Nyurrangarri ngayuku wangka kulira wantipayi. Rawaṉa nyurranya nintiṉangi. Kuliranyurra ninti nyinamara. Yaalytjingaranyurra pina alytjurarringkula kulilku? Uḻa palatja yaḻṯirra ngalya kati, ngayulakutu!”

²⁰Uḻa palunya Yiitjulakutuya katingu. Yiitjunya nyakula mamu paluru uḻangka yunnguwana nyinarra kuyaṉu. Palulanguru punkara parralayitjirringu. Mantakutu punkara ruularringkula nyunypa yintirra ngarringi.

²¹Uḻa palumpa paapanya Yiitjulu tjapiṉu, “Kuwarri kutju paluru mamutjanu parralayitjirringu?, tjinguru yirriṯi parralayitjirripayi?” Paluru watjaṉu, “Palatja pipirri wiimatjanu rawa parralayitjirripayi.

²²Mamu paluru warungka kapingkaṯarra rawa punkatjingara tjarrpatjunkupayi, iluntankukitjangku.” Wati paluru Yiitjula piyuku tjapiṉu, “Tjingurunu nyuntu ngangkari tiṉatjarra? Tjingurunu kulira yaḻṯururringkula palyalku?”

²³Yiitjulu wati palumpa wangka kulira watjaṉu yalatji, “Nyuntu ngayunya yalatji watjaṉu, ‘Tjingurunu nyuntu ngangkari tiṉatjarra?’ Wiya nyuntu yalatji watjantjaku. Wiya nyuntu ngayunya ngangkariwiya kulintjaku. Nyuntu ngayunya Katutjakuṉu ngangkari tiṉatjarra kulintjaku. Tjinguru nyuntu panyapa kulintjala, ngayulu nyuntupa katjangka mamu payira iyalku.”

²⁴Palulanguru wati paluru yulakitjangku watjaṉu, “Kala, ngayululpi kuliṉi nyuntu ngangkari tiṉatjarra nyinanyi. Kutu ngayunya nintila!, tjukarurruṉa kulintjaku.”

²⁵Yiitjulu nyangu yaṉangu tjuṯa ngalya yankula tjungurrinytjala. Nyakula paluru mamu palunya payira wantirriyaṉu. Payira wantirriyalkitjangku mamungka yalatji watjaṉu, “Nyuntu kuyaṉutja uḻa ngaatjanya paluru wiya wangkanyi, wiya kuliṉi. Uḻa ngaatja wantirra yarra!, piyuku wiya tjarrpanytjaku, kutu yarra!”

²⁶Uḻa palunya kuyantjala tititingarala mirrangu. Yalatji mamungku palunya wantikatingu. Mirri nguwanpa ngarringi. Nyakulaya yaṉangu tjuṯangku watjaṉu, “Mirri paluru ngarrinyi.”

²⁷Yiitjulu palunya mara witira katura ngaratjunu.

²⁸Palulanguru Yiitjunyangarriya yankula waaḻangka tjarrparra nyinangu. Palumpa kutunguḻu tjuṯangkuya tjapiṉu, “Nyaangurulatju mamu palunya puṯu payira wantirriyaṉu?”

²⁹Yiitjulu tjananya watjaṉu, “Mamu palunya nguwanpa Katutjala tjapira kutju, payira wantirriyantjaku.”

³⁰Palulanguru Yiitjunya, palumpa kutunguḻu tjuṯaṯarra yanu yuru Kaliliyilawana tjayiṯiwana. Palulanguru Yiitjulu kuliṉangi, “Ngayuku kutunguḻu tjuṯangka kutjuṉa nintilkitjangku kuliṉi. Nganaṉa tawunu tjuṯangka tjayiṯiwana yanku, yaṉangu tjuṯangkamarra.” Yiitjulu tjananya yalatji nintiṉingi, “Wati kutjungkuṉi yaṉanguku katja tjakultjunku tjananya, kutjupa tjuṯangkuṉiya witira iluntankunytjaku. Ilta tjana ngayunya iluntanku. Munga kutjarraṉa mirri ngarriku, Katutjaluṉi pakaltjingalku.” Yalatji tjananya Yiitjulu nintiṉingi, wangka panyapa.

³²Palumpa kutunguḻu tjuṯangkuyanku puṯu kulira yalatji wangkangu, “Ngaatjanya mayutju tiṉalampa, wiya paluru mirrirriku.” Wiyaya Yiitjunya tjapiṉu ninti nyinakitjangku, kuṉṯarringkulaya wantingu.

³³Tawunu Kapaniyamalalpiya yankula tjarrpangu. Waaḻakutuya yankula tjarrparra yunngu nyinangu. Palulanguru Yiitjulu tjananya tjapiṉu, “Nyaangurunyurra ruutuwana wangkayinangi?”