Mak 9:19-33

¹⁹Jisasgo te po odama, tama agai te we bidi augwalibolo wai, “Te dage hani we bidigo enade konealubo po dąų olama, duga homu enaba tialubo menio! Nisu naga sogo ena dage dali me bididuaibawe? Nisu naga sogo te eno dagego sęgę tolomainogo ebawe? Dagego te ogwa enaba odasa asao,” wali.

²⁰Tama augwaligo te ogwa agaba odasa pali. Te dwai haubogo Jisas sulama, tama polo te ogwa degelainu mu yali, tama te wai te tǫba degasa dulama, tama hogogo bele pelama, tama te dini pesa me deli te aga pedauwalidu pedalali.

²¹Tama Jisasgo aga ayabolo hanalu wali, “Nisu naga sogo aga te tiwai elaluai dawe?” Tama agai te po wai, “Te aga dwasianu elalubadi te tama tiai elaluai dao.

²²Tama hauwa sogo te dwai haubogo aga te siaba sąyu, te węba sąyu yai, tama aga ela muabo homu yai. Tiali goli te nago usu ilabo homu yaiba wida, teda nago da homu dene elama, tama da tau sao!” wali.

²³Jisasgo agabolo te po wali, “Awe, mu da, te nago enade te po wali, ‘Nago usu yaiba wida,’ nago te po wali. Tiali goli te tiwai meni. Te nago enade konealubo po dąų olama, tama nago homu enaba tialubo usu elalu da, te nago tigidali nai sabo te usu yaibao.”

²⁴Tama polo te ogwa aga ayago i weyu, te po wai, “Eno nagede konealubo po dąų wali, tiali goli tede ena te habuge tiwai yai! Nago ena tau sao!”

²⁵Jisasgo te genuai we bidi hani augwali sisinagasobo suali. Tama tibaso agai te dwai haubo bidiba wado iliyu, te po wali, “Nage te pedauwali pania sai, me nage te olo degai haubo bidi, eno nagebolo obe dao, nago te ogwa taga pao! Tama nage aga tomode munu ma bidilamu dao,” te po wai.

²⁶Tama te dwai haubogo te dwai i weyu, tama agai te ogwa degelai sedu genama, tama te dwai haubogo te aga taga peyu tama palio. Tama te ogwa te isai bidi tiwai munaluali. Tama bidi hauwa augwaligo te po weyu, “Aga te isali dao,” wai.

²⁷Tiali goli Jisasgo aga nogo tola selama, tama aga hodolobaso, tama aga doligulalio.

²⁸Nosali Jisas te be tomoba pelama, tama te aga wali pabo bidi dabe naga bidalubadi tama augwaligo agabolo hanalu wali, “Magi baso dago te dwai haubo sela sąwainu yali te usu meni yaniwe?”

²⁹Tama agai te po augwalibolo wai, “Te Godibolo gedu haluasa po wabogo naga te tobage dwai haubo noma bage sela sąbo te usu yaibao. Te gasa sę ebogo da, te usu me egobeo,” te po wai.

³⁰Augwaligo te bidali bulu taga peyu, tama augwali te Galili tǫ tomoba pali. Tama Jisasgo te aga menade bidibo, te we bidi augwaligo aga koneidali homu yai.

³¹Magi baso meni, agai te aga wali pabo bidi dabe ola mabo sę yainogo yai. Tama agai augwalibolo te po wai, “Te augwaligo ena Godigo Bidi Mu te bidi dabego nogoba muaibao. Tama augwaligo ena ela muaibao. Augwaligo ena ela munama, tialima sela sogo bidama nosali te ena ma hodaluaibao,” te po wai.

³²Tiali goli augwaligo te po page konesiąwai. Tama augwaligo agabolo hanalu wabo wi yalio.

³³Tialima, augwali te Kaperneam hanuba sabolali. Augwali te be tomoba pela siali madi, tama Jisasgo aga wali pabo bidi dabeba hanaluyu, te po wai, “Te da asobadi, te sunumide dagego duga hasi mena po miai dawe?”