Luuka 6:7-37

⁷Nde tawnoo jannooɓe fii Sariya on ɓen e Fariisiyaaɓe ɓen no faalaa heɓude ko ɓe lamitora, ɓe tooɲa Iisaa, tawi hiɓe ndaara si o ɲawnday e asewe, ɗun ko ɲalaande fowteteende nden.

⁸Kono tawi Iisaa no andunoo ɗin miijooji maɓɓe. Onsay o wi'i maaya-jungoojo on: «Immo daroɗaa ka hakkunde ɗoo.» On immii, darii.

⁹Onsay Iisaa wi'i ɓe: «Mi landike on, hara no dagii ka goɗɗo waɗa ko moƴƴi maa ko boni, danda wonkii maa wona sabu makki e aseweere?»

¹⁰Onsay o ndaari ɓe fow, o wi'i on neɗɗo: «Fontu jungo maa ngon.» On fonti ngo, jungo makko ngon selli.

¹¹Ɗun tikkini Fariisiyaaɓe ɓen e jannooɓe fii Sariya on ɓen fota, ɓe woni e yeddondirgol ko honɗun ɓe waɗata Iisaa.

¹²E nder ɗen balɗe ɗon, Iisaa yaari ka fello fii toragol Alla, o waali toraade.

¹³Ɓay weetii, o noddi taalibaaɓe makko ɓen, o suɓii sappoo e ɗiɗo e maɓɓe, o toɗɗii ɓe *sahaabaaɓe:

¹⁴ɗun ko Sim'uunu, on mo o jammi Petruusu, e Andaraawu neene-gooto Sim'uunu on, e Yaaquuba e Yuuhanna e Filiipu e Bartolomaawu

¹⁵e Matta e Tooma e Yaaquuba mo Alfaa e Sim'uunu tawdaaɗo e fedde *Zelotiiɓe ɓen,

¹⁶e Yahuuda mo Yaaquuba e Yudaasi Iskariiyu, janfoytooɗo mo on.

¹⁷Iisaa jippodi e ɓen taalibaaɓe ɓe o suɓii, o darii e nokkuure ndeylere ka falo. Tawi taalibaaɓe makko ɗuuɗuɓe no e nden nokkuure, wondude e jamaa moolanaaɗo iwruɗo e cenɗe ɗen fow e diiwal Yahuuda ngal e saare Yerusalaam nden e ɗii baŋŋeeji Tiiri e Siduuna ka daande baharu.

¹⁸Ɓen ko arnooɓe heɗagol mo e fii ɲawndegol ɲabbeeli mun. Ɓe jinna tampinnoo ɓen sellinaa.

¹⁹Awa kadi mo kala e maɓɓe no faalanoo mo meemude, ɓay himo wondunoo e bawgal ɲawndaynoongal ɓe fow.

²⁰O ɓanti gite makko ɗen, o ndaari taalibaaɓe ɓen, o wi'i: «On malii yo onon miskinɓe, ɓay *laamu Alla ngun ko onon wonani.

²¹On malii yo onon weelaaɓe fewndo ɗoo, ɓay on harnoyte. On malii yo onon wullooɓe fewndo ɗoo, ɓay on weltoyto.

²²On wonay malaaɓe nde yimɓe ɓen aɲi on e nde ɓe raɗii on, ɓe yenni on, ɓe ɲiddini inɗe mon ɗen sabu Ɓii-Aaden on.

²³Nden ɲande, weltee, jiɲon welo-welo, ɓay hiɗon maranaa njoddi mawndi ka kammu, ko fii ko nii kadi mawɓe maɓɓe ɓen warraynoo annabaaɓe ɓen.

²⁴Kono bone wonanii on onon alɗuɓe ɓen, ɓay on hendike neweende ko mon kon!

²⁵Bone wonanii on onon ɓee haaruɓe jooni, ɓay on weeloyte. Bone wonanii on onon ɓee jalooɓe hande, ɓay on yoomoyay wullon.

²⁶Bone wonanii on nde yimɓe ɓen fow wowli on ko moƴƴi, ɓay ko non mawɓe maɓɓe ɓen wowliraynoo fii ɓee waɗitiiɓe annabaaɓe.»

²⁷«Kono min mi wi'ay on yo onon ɓee heɗiiɓe lan: Yiɗee ayɓe mon ɓen, moƴƴoɗon e aɲuɓe on ɓen,

²⁸du'anoɗon huɗooɓe on ɓen, toranoɗon tampinooɓe on ɓen.

²⁹Mo bantike ma e waɓɓugo, tuɗan mo ngoya kadi. Mo jattii ma waramba, wota a haɗu mo ƴettude fokiya on kadi.

³⁰Okkor kala toriiɗo ma, hara kadi a ƴantaali ko maa kon e juuɗe jattuɓe ma ɓen.

³¹Waɗanee yimɓe ɓen wano faaliraɗon yo ɓe waɗan on non.

³²«Si on yiɗii yiɗuɓe on ɓen, haray ko moƴƴere honde heɓoyton? Ko fii hay junuubankeeɓe ɓen no yiɗi yiɗuɓe ɓe ɓen.

³³Si on moƴƴike e moƴƴiiɓe e mo'on ɓen, haray ko moƴƴere honde heɓoyton? Hay junuubanke'en ko non warrata.

³⁴Si on ɲawlii ɓe tanƴiniɗon yoɓitay on ɓen, haray ko moƴƴere honde heɓoyton? Hay junuubanke'en ɲawlindiray fii yo ɓe yoɓitindir.

³⁵Kono yiɗee ayɓe mon ɓen, waɗanon ɓe ko moƴƴi, ɲawlon ɓe hara on habbaaki yoɓiteede. Ɗun on heɓoyay njoddi mawndi, wonoyon kadi ɓiɓɓe Jom Ɓural on, sabu himo moƴƴani dulluɓe ɓen e bonɓe ɓen.

³⁶Wonee yurmeteeɓe wano Baaba mon Jom Ɓural on woniri Yurmeteeɗo non.»

³⁷«Wota on ɲaawu, ɗun on ɲaawetaake. Wota on felu, ɗun on feletaake. Yaafee, ɗun on yaafoyte.