Luk 6:7-37

⁷Rut titsa xil te rae na Mosis del rut Farasi xil labit lipus pisi xos Iesu ipol ni he moletin ak mei ihos rilomun e Sabat. Vengan xosxa ipol ni, ma likila lisa sepinien iha xat rin nan vengan xa di nggur xoteh rae xa misikoe xol Siu xil tengan linapol ti e Sabat.

⁸E Iesu mikil nenemien nae, ma biteni mi moletin ak bit, “Amei. Usoh inggak visal inou.” Ma moletin ak mea, ba misoh rute ak pe met moletin xil.

⁹Di, Iesu biteni mi xil bit, “?Nasis xamim, rae na Mosis maen ni tengan ti ripol ni naha e Sabat? ?Ripol ihos, mu ripol isa? ?Ritutou ni meulien na mosav, mu rihas vini?”

¹⁰Iesu miketeh mikapis e xil. Di, biteni mi moletin ak bit, “Te momal ni hem.” E melele xa pol ni, hen mei bos rilomun.

¹¹Xil iexil mikat pupu, e lasep vesi xa lipol ni naha mi Iesu.

¹²Vatei, Iesu be nesao e hu tei tengan ha vasis. Xi misis mi Hi e vongien nen ak ba duxoh makoe.

¹³Melele xa ut milan, xi ba mikes moletin nan xil vus tengan lamei visali. E xi bosei moletin lu e le tei (12) tang tengan mei lave eloheoh nan xil:

¹⁴Saemon (xa Iesu miling hisen teimun be ‘Pita’) del tunali Andru; Temis xal Sion; Pilip xal Batalomiu;

¹⁵Matiu e Tomas; Temis nat Alveas; e Saemon (xa lakesi ni Silixin);

¹⁶Sudas nat Temis; e Sudas Eskariot xa imaen Iesu ihe he ngan xil xa lihasi imat.

¹⁷Melele xa Iesu del moletin nan xil langgo vathu ak e labe tan, labe rute tei xa be motan xa vanut moletin xil holu xa di langgusil Iesu di ladatili. E Iesu pus vanut moletin savsav xil mun lamei: rute xil langgo taon te hal Serusalem e metimal savsav xil xa ladi e provins te hal Sudea, e rut moletin xil mun xa latave Siu xil ti langgo taon te hal Taer xal taon te hal Saedon xa ludi sangas visal Tas Medeterenia.

¹⁸Xil lamei tengan lateong ni Iesu e lasisi tengan ileh rerat mesien nae xil. Ngan xil mun xa ninin tesa xil di purun xil lamei, ma Iesu nggol rerat ninin tesa xil ak ra xil e pol ni xil mei labos rilomun.

¹⁹Moletin xil vus lasak tengan latuxol Iesu, vengan xeihen xa da en di mileh rerat mesien ra moletin xil ngasen e pol ni xil mei labos rilomun.

²⁰Melele xa Iesu da tamu del moletin xil ak, miketeh pus moletin nan xil e biteni bit, “Tuxolxatien iti mi xamim xa holesok namim xil tapin ti, vengan xa holesok xil xa ladi he Hi labe namim.

²¹Tuxolxatien iti mi xamim xa, taxeak, mae di nggat xamim, vengan xa Hi isak ni xamim mupolu kuhi. Tuxolxatien iti mi xamim xa, taxeak, di mudang, vengan xa Hi isak ni xamim mumen.

²²Tuxolxatien iti mi xamim melele xa moletin xil di iexil nggat xamim e di lasin xamim ve nou. Reitin, tuxolxatien iti mi xamim melele xa di lasepsisil xamim e di lapurun hisemim vengan xa di munggusil xat Nat Moletin.

²³Mumaal melele xa xil di lapol ni mak mi xamim e muhutahut itel sien, vengan xa Hi pusi xa mupin tengan muvur huite teni xa ihe eilep e ut nesao. Vengan xa avu nae xil tetiamu latepurun provet xil tetiamu temak tang, e Hi tepus provet xil lamal pe meten.

²⁴“E isa pupu mi xamim xa holesok namim holu taxeak, vengan xa mutehur sen hosien namim ngamu.

²⁵Isa pupu mi xamim xa mupolu kuhi taxeak, vengan xa mae ti iat xamim. Isa pupu mi xamim xa di mumen taxeak, vengan xa ti mumuis e ti mutang.

²⁶E isa pupu mi xamim melele xa moletin xil vus di lapet rat hisemim, vengan xa avu nae xil tetiamu latepol ni temak tang mi provet te luvosen xil.”

²⁷Di, Iesu misa sepinien ak mi moletin xil vus bit, “Nabiteni mak mi xamim vus xa di mulong sepinien navan xil ak: iemim ihei elu namim xil, mupol ni ihos mi ngan xil xa di laketeh misa mi xamim.

²⁸Musis Hi tengan ituxol xat ngan xil xa di lasuhol xamim, e musis ve ngan xil xa di lapurun xamim.

²⁹Xosxa moletin tei mileves vimim, musa ri vimim mun tengan ilevesi. E xosxa moletin tei misil rat kot namim, mumaen ni tengan ileh eising sav namim xil mun.

³⁰Xosxa moletin tei dakes xamim ve neta tei, ma musa ni tang mini. E melele xa moletin tei nggur rat neta tei namim, munasis ti munahit nasa rilomun ni mi xamim.

³¹Mupol ni mi mosav xil ixoni ngan xa xamim iemim bei tengan xil lipol ni minuk.

³²“?Xosxa iemim bei moletin xil kestang xa di iexil bei xamim mun tang, veneh ma di munemi mubit Hi ituxol xat xamim ven? !Moletin tesa xil mun di lapol ni mak!

³³?E xosxa xamim di mupol bos mi moletin xil kestang xa di lapol bos mi xamim, veneh ma Hi ituxol xat xamim ven? !Moletin tesa xil mun di lapol ni mak!

³⁴?E xosxa mumaen mani mi moletin xil kestang xa mukila mubit lisa rilomun ni mi xamim, veneh ma di munemi mubit Hi ituxol xat xamim ven? !Moletin tesa xil mun di lamaen mani nae mi moletin tesa sav xil tengan, ti, lisa xolesi!

³⁵!E xamim, munapol ni ti namak! Eheien namim iti mi ngan xil xa di laketeh misa mi xamim e mupol ihos mi xil. Mumaen mani mi mosav xil e munanemi ti munahit lisa rilomun ni mi xamim. Xosxa mupol ni imak, ma Hi xa de ut nesao isa huite teni xa ihos pupu mi xamim e muhe horamue nan xil. Vengan Hi mun di pol ni bos mi moletin tesa xil xa lakavui e langgur votei ni holesok xil xa di misa ni mi xil.

³⁶Mak, ma esaeen namim iti e mosav xil, ixoni ngan xa esaeen na Hi Tamemim mun di e mosav xil.”

³⁷E Iesu biteni mun bit, “Munaketeh ti nasa mi mosav xil ve tesaen nae xil. Xosxa munapol ni ti, ma Hi naketeh ti nasa mi xamim ve tesaen namim xil. E munasepin ti nasa naha xat mosav xil ve sexien tesa nae. Xosxa munapol ni ti, ma Hi nasepin ti nasa naha xat xamim ve sexien tesa namim xil. E xosxa mosav tei pol misa mi xamim, muketeh ihos tang mini. Mak, ma Hi iketeh ihos mi xamim melele xa di mupol misa.