LUUKA 22:13-41

¹³Dhali uni iikin mo dhali gam a’di me’d jin ṯorkina a’di uni gwo mo, dhali uni thosonki to mo gom Mompe’kup̱anyolos mo be.

¹⁴Dhali ki mo p̱u’dki’d mo tani a’di c̱a’bki’da tharabeesa mo dhali uni gun dhunu ki she/ mo nyaḵki a’di mo be.

¹⁵Dhali a’di ki o uni gwo mo ki: Aha/ dina gwo i bwayi ki nyanye/ mo mmonyaḵ to shwa ki Mompe’kup̱anyolos yan nyaḵki um mo ki aha/ dina is ki ’kosh ka nyor nṯwa/a/ mo be.

¹⁶Haali/ aha/ ṯora um gwo mo ki: Aha/ mina diki shwa a’di mo doḵ/e ntagi a’di minu thim mo e Bampa/ ma Arumgimis mo be.

¹⁷Dhali a’di bu’thki’da ḵubbaaya mo dhali ki a’di c̱iki mom’bor bwa i is mo tani a’di o gwo mo ki: Budhi yansan mo ma dhali ḵwaki a’di bwa e bwam um ki is bum mo ma.

¹⁸Haali/ aha/ ṯora um gwo mo ki ’peni shwane/ mo tani aha/ mina diki p̱i yiman maman cwa mo ntagi Bampa/ ma Arumgimis midi p̱u’du/ mo be.

¹⁹Dhali a’di bu’thki maaŋḵuthu’d mo si’da/ dhali ki a’di c̱iki mom’bor bwa i is mo tani a’di ki ’ce’d a’di mo dhali c̱i uni mo mmo/o gwo mo ki: Yansan ta is pem mo be, a’di jin c̱ikunu mo gom um mo. Miiyi yansan mmoka aha/ e mo.

²⁰Dhali wakan si’da/ ’ko’di tonṯe/ mo tani a’di bu’thki’da ḵubbaaya mo mmo/o gwo mo ki: Ḵubbaaya yan ta ji gi wolo’d ka pije/ gom um mo a’di jin ta gwon this jin gamu me’d ka bas pem mo be.

²¹Hili, hili mo mo ma, me’d gi a’di jin ’ciṯẖi/ aha/ is ki gwo mo a’di nyaḵki di ki aha/ eya tharabeesa mo be.

²²Haali/ Ya/ gi ’Kwani a’di yaki’d mo me’d jin karkunu gom a’di mo. Hili wayyi e wathi/ c̱aan mo ki a’di jin ’ciṯẖki a’di is ki gwo mo be.

²³Dhali uni ṯelki mii ’pen mo mmodoṯ gwondoṯ ka rem ’kup̱ mo ki jana ’peni bwam uni ta a’di jin midi ’taki mii to yansan mo.

²⁴Dhali gwo gi sugu/ si’da/ cuki’d mo e bwam uni mo gom a’dija iminu kar ki ca mo e bwam uni mo?

²⁵Dhali a’di ki o uni gwo mo ki: Imaliḵ gi ’kwani kun ’koki ta ’Kwani Yahuuda/ mo tani mii mo gi tanu tap̱a ap̱o/ uni mo, dhali uni gwansan kun ta gi moshirr mo ap̱o/ uni mo tani yuḵkunu gway ki imanmii ki ’bore/ gom uni mo.

²⁶Hili yansan midi diki di wakan gom um mo. Hili dhalki a’di jin ca’d e bwam um mo dhal mii e i is mo mmowar ki gwa’d mo dhali a’di jin di’di ṯwa/a/ mo ta a’di jin midi ta amanmii to mo be.

²⁷Haali/ a’di jin ca’d mo tani ta a’din ’de/ jin di’da tharabeesa mo ’taa? walla a’di jin ta’da manmii to mo? A’di diki ta a’di jin di’da tharabeesa mo ’taa? Hili aha/ dina mbwam um mo mmota wathin ’de/ jin mii to mo be.

²⁸Um ta uni gwansan kun rashi ’ko nyaḵki aha/ mo e mompal pem mo.

²⁹Me’da Ababa mmoṯorkina a’di aha/ bampa/ i e mo tani wakan si’da/ aha/ ṯorkina um a’di i e mo,

³⁰ki um mini nyaḵ to shwa mo dhali nyaḵ to p̱i eya tharabeesam pem e bampam pem mo dhali mmo’ko ’pena ḵursin tap̱a mo mmodwall ’Kwani ma Israyiil gwo mo uni kun ’kon ma waḵi ’kume’d i’ce’dka su/ mo be.

³¹Simaan, Simaan, hili mo mo ma, Seṯaan dina gwo mbwa mo mmobu’th um mo ki a’di midi ’dash um me’d emen pos mo.

³²Hili aha/ ’thokina mo gom /e mo ki moŋgam gwo is pini midi diki ush me’d mo. Dhali ki /e mini ṯu’k mo doḵ/e tani ’bithi awaḵ pini is mo ma.

³³Dhali a’di ki o a’di gwo mo ki: Tap̱a, aha/ thosonkina is mo mmonyaḵ ya ki /e mo eya sijin mo dhali mmowu mo be.

³⁴Dhali a’di ki o a’di gwo mo ki: Aha/ ṯora /e gwo mo, Buṯerus, ka dhoŋgola ŋwa midi diki ko e ka tee yan mo tani ntagi /e mini waṯ aha/ gway me’di kwara ki /e mishi aha/ kan mo be.

³⁵Dhali a’di ki o uni gwo mo ki: Me’d jin hashkika/ um ka pije/ mo ki dar ga jisilaan mo walla ḵucaŋ mo walla ka p̱p̱a/ isho’k mo tani um harki toŋ kamu/ mo ’taa? Uni thoḵ a’di gwo mo ki: To p̱iyi’d mo be.

³⁶Dhali a’di ki o uni gwo mo ki: Hili shwane/ mo ma. Dhalki a’di jin ta’d ga jisilaan bu’th a’di mo dhali wakan si’da/ a’di jin ta gi ḵucaŋ mo. Dhali dhalki a’di jin dara’d gi gandala turga/ mo tani yol burrinyem p̱om piti mo dhali yol gandala kamu/ mo.

³⁷Haali/ aha/ ṯora um gwo mo ki Gwo ma Arumgimis yansan jin ’kwarkunu mo ki: Dhali a’di karkunu nyaḵki imandhaŋ gwo mo tani a’di naskina/ minu mii thim ki aha/ mo be. Haali/ a’di jin ’kwarkunu gom aha/ mo tani a’di ta mo gi thimkunu a’di mo be.

³⁸Dhali uni ki o gwo mo ki: Hili mo mo ma, Tap̱a, gandala turga/ ’koni su/ imahan mo. Dhali a’di ki o uni gwo mo ki: A’di ’kosh jwa mo.

³⁹Dhali a’di p̱u’dki’d ka pije/ mo dhali ya mo me’d mii jin miina a’di mo mmoya e ’Kuwosh ma Seṯuun mo. Dhali imanciḵ a’di gwo baṯẖki a’di isho’k mo be.

⁴⁰Dhali ki a’di p̱u’dki’d mo e mo c̱aan mo tani a’di ki o uni gwo mo ki: ’Thoyi mo ma, ki um mini ’koki cic̱ mo e mo jin palu mo.

⁴¹Dhali ki a’di thoṯẖki is mo ’peni uni mo me’d ari wosh jin yip̱u kanṯaan mo tani dhali a’di ki c̱a’b ki jiŋ ’kup̱a’dup̱un mo dhali ’tho mo be ki: