Luka 22:13-41

¹³Agêc sêja ma têtap sa kêtôm Jesu kêsôm gêdêŋ êsêagêc ma sêmasaŋ Pasa.

¹⁴Noc mêŋkêsa, tec Jesu jagêŋgôŋ sic ma aposolo jasêwiŋ eŋ.

¹⁵Go kêsôm gêdêŋ êsêac gebe “Ŋoc ŋalêlôm taêc gêjam gedeŋ tôŋgeŋ gebe janiŋ Pasa tonec jawiŋ amac êmuŋ acgom, go jaôc ŋandaŋ.

¹⁶Aê jasôm êndêŋ amac gebe Oc janiŋ êtiam atom jamoa e janiŋ toŋanôgeŋ aŋga Anôtônê gamêŋ.”

¹⁷Go kêkôc laclu gêjam daŋge ma kêsôm gebe “Akôc êwac ma anac sam êndêŋ taôm.

¹⁸Ma aê jasôm êndêŋ amac gebe Galoc janôm wain ŋanô êtiam atom e Anôtônê gamêŋ mêŋêsa acgom.”

¹⁹Go kêkôc polom mêŋgêjam daŋge su, ma kêpô kêkôc jakêkêŋ gêdêŋ êsêac ma kêsôm gebe “Aêŋoc ôlic, taŋ kakêŋ gêjô amacŋa naŋ tonaŋ. Aŋgôm amboac tonaŋ ec taêm ênam aêgeŋ.”

²⁰Seŋ su, go kêkôc laclu amboac tonaŋ ma kêsôm gebe “Laclu tonaŋ kêtu aêŋoc dec jamoatiŋ poac wakucŋa tau, taŋ kêkêc siŋ kêtu amacŋa.

²¹“Alic acgom, ŋac taŋ gebe eoc aê lasê naŋ, lêma gêsac tebo gêwiŋ aêŋoc.

²²Ŋamalacnê Latu tec oc êsa nê lêŋ êna êtôm Anôtô kêmasaŋ, tageŋ ojae ŋac, taŋ eoc eŋ lasê naŋma.”

²³Ma êsêac têtu kênac tauŋ gebe êsêacnêŋ asa oc êŋgôm gêŋ amboac tônê.

²⁴Ŋacseŋomi sêsôm tauŋ gebe nêŋ asa oc êtu ŋac kapôêŋ êlêlêc ŋagêdô su.

²⁵Tec Jesu kêsôm gêdêŋ êsêac gebe “Lau samuc nêŋ kiŋ sêkôniŋ nêŋ lau. Ma êsêac, taŋ sêjam gôliŋ lau toŋaclai naŋ, sêsam êsêac sebe ‘Moasiŋ ŋatau.’

²⁶Amac amboac tonaŋ atom. Mago amacnêm ŋacsêga naŋ êtôm ŋac sauŋ ma kasêga êtôm sakiŋwaga acgom, go ŋajam.

²⁷Ŋac ondoc kêlêlêc ondoc su. Ŋac taŋ gêŋgôŋ gebe êniŋ ŋêŋgeŋ naŋ, me ŋac taŋ gêjam sakiŋ gêŋ gêmoa naŋ. Ŋac taŋ gêŋgôŋ gebe êniŋ gêŋŋa naŋ. Aê tec gamoa amac ŋasawa nec, katôm sakiŋwaga.

²⁸“Amac lau tonaŋ asap aê tôŋ kêtôm ŋoc noc lêtômŋa ŋapaŋ.

²⁹Tamoc gêliŋ ŋagôliŋ su gêdêŋ aê, tec aê jaliŋ su êndêŋ amac.

³⁰Aniŋ to anôm gêŋ aŋga ŋoc tebo amoa ŋoc gamêŋ ma aŋgôŋ lêpôŋ ŋaô, gebe amêtôc Israelnêŋ gôlôac 12 nêŋ biŋ.

³¹“Simon, Simon, ôlic Sadaŋ gebe êkôc amac su, gebe ekoloŋ amac êtôm sekoloŋ lala sêjaliŋ ŋanô to ŋapa saŋa.

³²Ma aê tec kateŋ kêtu aômŋa gebe nêm kôkêŋ gêwiŋ ê su atom. Ma êndêŋ taŋ ônam taôm ôkwi su naŋ, ôpuc lasimi tôŋ.”

³³Tec Petere kêsôm gêdêŋ eŋ gebe “Apômtau, aê gajac ŋawae gabe jasêp kapoacwalô to jamac êndu jawiŋ aôm.”

³⁴Tec Jesu kêsôm gebe “Petere, aê jasôm êndêŋ aôm gebe Êmbêc tonec talec oc êtaŋ atomgeŋ, ma aôm ônsa aê auc êtu dim têlêac gebe gôjam kauc aê.”

³⁵Go Jesu kêsôm gêdêŋ êsêac gebe “Gêdêŋ taŋ kasakiŋ amac aja akôc awa kêsêp ômbiŋkap ŋaatali ma abic atali to asô atapa atom naŋ, gêŋ teŋ gêjô amac me masi.” Ma êsêac sêjô eŋ awa gebe “Masianô, gêŋ teŋ gêjô aêac atom.”

³⁶Tec eŋ kêsôm gêdêŋ êsêac gebe “Mago galoc amboac teŋ. Ŋac taŋ nê awa to atali gêc naŋ, êkôc gêŋ tau. Ma ŋac taŋ kêkôc siŋ atom naŋ, êkêŋ nê ŋakwê êndêŋ lau sênam ôli ma êkôc ŋaawa naênam ôli siŋ teŋ.

³⁷Ma aê jasôm êndêŋ amac gebe Biŋ taŋ teto amboac tonec naŋ, oc êtu tôŋ êpi aê gebe ‘Sêsam eŋ gêwiŋ kêjaŋgowaga.’ Biŋ taŋ teto kêpi aê naŋ, oc ŋanô êsa.”

³⁸Ma êsêac sêsôm gebe “Apômtau, alic acgom, siŋ luagêc tec gêc.” Go eŋ kêsôm gêdêŋ êsêac gebe “Kêtôm su.”

³⁹Go Jesu kêsa gêja ma kêpi Lôckatêkwi amboac gêgôm-gêgôm gêmoa ma ŋacseŋomi têdaguc eŋ.

⁴⁰Sêô lasê gamêŋ tau acgom, go kêsôm gêdêŋ êsêac gebe “Ateŋ mecmaŋ, gebe lêtôm êtap amac sa atom.”

⁴¹Go gêwi êsêac siŋ ma kêsu tau su kêsa gêja ŋasawa kêtôm têtuc poc naêsêpŋa, go kêpôŋ aduc ma keteŋ mec gebe