18Ɗiɗaɓo oo wari, wii: «Kalfaaɗo, mutakal maa ngal tinike mutakal joy.»
19O wii: «Aan duu, mi lamminii ma geelle joy.»
20Caggal ɗum, goɗɗo kasen wari, wii: «Kalfaaɗo, annii mutakal maa, mi piɓunooɗo ngal e fetalaare
21sabi miɗo hule. Sabi a gorko ɲaaɗuɗo, aɗa ɓama ko a resaali, aɗa hetta ɗo a aawaali.»
22O wii ɗum: «Dara! Haalaaji maa jaati cariran-maa-mi, aan kaadime laaliiɗo. Aɗa anndi mi gorko ɲaaɗuɗo, mi ɓaman ko mi resaali, mi hettan ɗo mi aawaali.
23Ko saabii so a waɗaali jawdi am ndii e ley banki, yalla ana daɲa ko keɓu-mi hen so mi wartoyii?»
24Caggal ɗum, kalfaaɗo oo wii kaadime'en mum ɓee: «Teetee mo mutakal ngal, ndokkon ngal jogiiɗo mutakal sappo oo.»
25Ɓe mbii mo: «Kalfaaɗo, kanko, omo jogii mutakal sappo.»
26O wii: «Miɗo haalana on, jogiiɗo fuu ɓeydante, kaa mo walaa, fay seeɗa mo jogii oo teetete.
27Kaa wayɓe am ɓe njiɗaa mi laamoo ɗum'en ɓee, ngaddee ɓe ɗoo, mbaron ɓe yeeso am.»
28Nde Iisaa tilinoo haalde ɗum ndee, ardii woɓɓe ɓee, ŋabbiti fa'i Urusaliima.
29Nde o ɓadinoo Baytifaaji e Baytaniya hedde waamnde haayre wiyeteende Jaytun, o neli taalibaaɓe makko ɗiɗon,
30o wii ɓe: —Njehee, naatoyee e ngeenndi ngonndi yeeso mon ndii, on tawan mola ndakiiwa nga fay gooto waɗɗaaki abada ana haɓɓii. Kumton nga, ngaddon nga ɗoo.
31So won biiɗo on, «Ko saabii so oɗon kumta nga?» mbiyon ɗum hono nii: «Moobbo ana haajaa nga.»
32Nelaaɓe ɓee njehi, tawri no o wiiri ɗum'en nii.
33E ley humtugol maɓɓe mola ngaa, jeyɓe mola ngaa ɓee mbii: —Ko kumtirton mola ngaa?
34Ɓe njaabii, ɓe mbii: —Moobbo ana haajaa nga.
35Nii ɓe naɓani Iisaa mola ngaa, ɓe njappi e magga saayaaji maɓɓe, o waɗɗii.
36No o yaarata nii, ɓe mbeerti saayaaji maɓɓe dow laawol ngol.
37Nde o faandii Urusaliima ndee, hedde jipporde waamnde haayre wiyeteende Jaytun, tawi taalibaaɓe ɓee fuu ana keewi seyo, ndarii ana njetta Laamɗo e daande toownde, saabe deental kaayɗe ɗe ɓe njiinoo ɗee.
38Eɓe mbiya: —Barke woodanii kaananke gardoowo e dow innde Joomiraaɗo! Jam dow kammu. Teddeengal woodanii Laamɗo Toowɗo!
39Yoga e Farisa'en tawaaɓe e jamaa oo ɓee mbii mo: —Moobbo, haja taalibaaɓe maa ɓee!
40O jaabii ɓe, o wii: —Miɗo haalana on, so kamɓe ɓe ndeƴƴii, kaaƴe ɗee ngattata wullude!
Luuka 19
Luuka 19:18-40