SAN LUCAS 19:18-40

¹⁸Juc-caj piyunninnash niran: ‹Tayta, jillayniqui pichga janapayta mirasha.›

¹⁹Auturdänash niran: ‹Jampis allita rurashcanqui. Pichga marcata maquiquiman ćhurashaj.›

²⁰«Juc-caj piyunninnash jamurpar niran: ‹Tayta, catay jillayniqui. Jillayniquita mana yatapashcächu. Jipilläman jatircushcä.

²¹Manchacuypa runa canqui. Jamashalla imatapis ćhasquiyta munanqui. Mana murupacuycarsi, achca-achcata shuntayta munanqui. Chaymi manchacurä.›

²²Chaura auturdä runanash niran: ‹Manacaj runa canqui. Shimillayqui jitarpushcashunqui. Jamashalla imatapis shuyarashäta musyaycar, mana arucuycar achca-achcata shuntayta munashäta musyaycar,

²³jillaynïta jillay mirachijcunallamanpis jutunquiman caran. Cutimur, wawantinta shuntacüman caran.›

²⁴Waquin piyunnintanash niran: ‹Jillay charashallantapis jićhurir, ćhunca janapaypa mirachij-cajta juycuy.›

²⁵«Piyunnincunash niran: ‹Tayta, chay runa ćhunca janapayta jillayta charaycan.›

²⁶Auturdä runanash niran: ‹Wiyacuptin, pitapis Tayta Diosninchi sumaj tantiyachinga. Mana wiyacujcunatam ichanga ichicllata tantiyashallantapis jungaycachinga.

²⁷Auturdä cayman yaycunäta mana munaj runatana apamuy. Ricay ñawïćhu llapanta wañurachiy.› »

²⁸Willapäcuyta ushyarcur, mana jamallar Jerusalén marcaman Jesús aywaycaran.

²⁹Betfagé marcaman, Betania marcaman ćhayaycaran. Chay quinranćhu Ulïbus punta caran. Ishcaj purïshijnincunata caćhar,

³⁰Jesús niran: «Wac chimpa tacsha marcaman aywariycuy. Ćhayar, manta büruta tarinquipaj. Pipis mana muntacunrächu. Watarashanpita pascarir, apacamunqui.

³¹Pascaptiqui pipis mićhäshuptiqui, ninqui: ‹Mandamajnïtash mañanqui.› »

³²Purïshijcunana aywar, Jesúspa shiminman-tupu büruta tariran.

³³Pascapacuycaptin, runacuna niran: «¿Imapätaj bürüta pascaycanqui?»

³⁴Paycuna niran: «Mandamajnï Jesústash mañanqui.»

³⁵Chaura büruta Jesúsman aparan. Jacuncunata shawaparcur Jesústa muntachiran.

³⁶Bürun muntash Jerusalén marcaman Jesús aywaycaptin, runacuna cushicuywan jacuncunatapis caminuman mashtapuran.

³⁷Jerusalén marcaman ricänan Ulïbus punta uranpa yarpuptin, Jesúspa purïshijnincuna llapanmi cushicäriran: «Tayta Diosninchi sumaj munayniyuj. Camacächiptin, Jesús jishyaćhucunata allchacächisha. Supaycunatapis jargusha. Wañushcunatapis cawarachisha» nir.

³⁸Llapallan cushicuywan japarparan: «Tayta Diosninchi caćhamushan mandaj runa alli ricash caycullächun. Maquinćhu allilla purichimächun. Janaj pachaćhüpis jatunpa cushicullächun» nir.

³⁹Runacuna cushicuptinsi, waquin fariseucuna Jesústa piñacuran: «Tayta, purïshijniquicunata upällachiy» nir.

⁴⁰Jesúsna niran: «Upällachiptï, rumicunapis cushicuywan rimarinman.»