San Lucas 19:18-40

¹⁸Chi güe ni rrop mosqui ax guniib: “Dad, mɨly ni bnɨɨdxbiu nare abaanni gan gaay zecti ni náni.”

¹⁹Ziygacza raipy reyqui bnietré: “Liú inabiiu gaay guɨdx.”

²⁰Chiy güe stuby mosqui ax guniib: “Dad, a xmɨlbiuré. Nare guluchuuani láani tuby panit

²¹te pur bdxibia laabiu. Te laabiu quɨt rgátibiu bniety, rcáabiu ni quɨt bsáanbiu ne rcáabiu de guelnazaac rut quɨt guzibinbiu.”

²²Chiyru gunii reyqui: “Mos mal, pur lagac de xtiidxu ningui riáldu castigu. Belati nánldiu dec nare quɨt rgátia bniety ne rcáa ni quɨt bsáana ne rcáa de guelnazaac rut quɨt baania dzɨɨny,

²³¿xínii quɨt nialduu xmɨlia bancu te par chi niecquia ax nicáani cun tod lliinni?”

²⁴Chiyru raipy reyqui de ni zuguaa ruy: “Guldzɨcá mɨlyquɨ lob, guldeedni bniety ni nap tsɨni.”

²⁵Laadeb raipdeb reyqui: “Dad, per laab arápbɨ tsɨ mɨly.”

²⁶Reyqui cuaibbɨ: “Nare rniia laat elquɨ ni nap, ná par icáarub. Per elquɨ ni quɨt cuenzi nap, axt ni napbɨ sbicá.

²⁷Ne de ni rdxichné nare, de ni quɨt rcaaz gaca rey, gultanédeb rurén, ne gultinxúdeb nez luaa.”

²⁸Chi bené Jesús laadeb cuendqui ax güelaa zény par Jerusalén.

²⁹Chi bdzɨngaxdeb de guɨdx Betfagé cun Betania, ne gaxza nii dany ni lá Olivos, chiy bxiaaldny tiop de xpɨnny,

³⁰raipny laadeb: —Gulchia guɨdx ni ná delantquɨ. Chi idzɨntɨ ruy idxialtɨ tuby burreen cá yag, ne ruteete gady tu cueebti laam. Gulxaicquimɨ ax gultaném.

³¹Ne belati chúu ni inabdiidx laat xínii bldátmɨ, gulgatsdeb dec Dad Jesús gunii chonénmɨ.

³²De xpɨnny güedeb ax bdxialdeb irate zectispac ni raipy Jesús laadeb.

³³Ne chi caxaicquideb burreenqui, de bniety ni ná xtenni laam gunabdiidxdeb: —¿Xínii caxaicquitɨ burrquɨ?

³⁴Laadeb cuaibdeb: —Te pur Dad Jesús gunii chonénmɨ.

³⁵Chiyru güenédeb burreenqui rut zuguaa Jesús, ne bzuubdeb xabdeb detsmɨ par gubeeb Jesúsmɨ.

³⁶Chiy chi zeteed Jesús, ax guzulo rguix de bniety xabdeb lo nez.

³⁷Ne chi bdzɨndeb quia dany Olivos par asulo yiatdeb, irate de bniety ni zanald Jesús guzulo rbɨxtiadeb pur tant rzaclaazdeb, ne rniideb de diidx zaac par Dios pur irate de milagrɨ ni agunádeb.

³⁸Laadeb guniideb: —¡Dichos rey ni zéed pur Xtadnɨ Dios! ¡Anuu guelrzaclaaz llayabaa! ¡Xtiosten Dios ni rbez llayabaa!

³⁹Chiy de fariseu ni nuuch glay de bniety ni zanald laany, raipdeb laany: —Maistrɨ, gudildbiu de ni zanald laabiu te quɨtru iniideb zeec.

⁴⁰Per Jesús cuaibny: —Nare rniia laat dec belati laadeb iganydeb, de guia ná ni cuxtia zeec.