Lucas 19:18-40

¹⁸ja kachu jawen dayaxunika betsa juxun yuikin: “Xanen ibuun, min pei jexe ichapa inananankin ana 5tiki binumakin ichapa en mia ichawaxunshinaki”, akaya

¹⁹jadi yuikin: “Jaskakenan, miandi 5 mae jati mekei ea xanen ibuxunyuwe”, adiaya

²⁰janua jawen dayanika betsadi danas inanbainima juxun yuikin: “Xanen ibuun, naki, min peidan. Benukatsi ikama dakutan en mia aduxunimaki.

²¹Min juni meseken miwen datekin min pei benukatsi ikama tadi tuaxwen yabutan en mia aduxunimaki. Dayakin jawa miban banamabia min ichawamiski. Janua jexe sa akamabia min ichawadiamiski”, akaya

²²januxun xanen ibun yuikin: “Min en dayadu chakabu chikish chakamaki. Chanima dayakin jawa miban banaumabia en ichawamiski. Ja inun, jexe sa akamabia en ichawadiamiski. Ja unantan

²³¿jaskakin banco anu cuenta watan inananankin en pei min ea aduxunama ikimamen, janua ibubis juxun en pei xekei ana jaki ichashina en biyuxanunan?” atan

²⁴jawen dayadu betsabu mapuabu jatu yuikin: “Ja chikishin pei mebintan ja 10tiki binumashina ana ichawamakanwen”, iwanan,

²⁵jabun jatun xanen ibu yuikin: “Ma 10 binujaida jayaki. ¿Jaskakin min ana pei inain?” aka

²⁶xanen ibun jatu yuikin: “Tsuada na en dayadu pepa keskatun jawada jaya pe mekea unantan ichapa jayabiaken manakukin ana ichapajaida en inanxanaii, binumakinan. Jakia tsuada na en dayadu chikish keskatun jawada jaya pe mekeama ja eskadabes jaya unantan en mebinxanaii.

²⁷Ja inun, jabu eki sinatakin jau jatun xanen ibu en iyamaxanun, jabun ea bechipaiama danainmabudan, itanxun en besuubi jatu tenankanwen”, jatu akimakiaki— Jesúsun jatu wabaini

²⁸januxun jatu jaska yusinbaini kaya yuda ichapabun Jesús chibanbainaibun Jesús Jerusalénkidi ana kai

²⁹Betfagé inun Betania ja mae dabe anu kemai Olivos Mati tetanbainkin jawen tsuma dabe yunukin

³⁰yuikin: —Ja mae besuudi kayanbis buxun burro nexea tsua jaki katsaumediama bechitan tepetan beyutankanwen.

³¹Ja inun, tsuanda matu yukakin yuikin: “¿Jawakatsi man tepeai?” matu wa yuikin: “Nukun xanen ibun biyukatsis ikikiki”, atankanwen— jatu wa

³²ja dabe buxun burro nexea bai namaki nia bechitan tepeaibun

³³jabianudi burro ibubu manixun jatu yukakin: —¿Jaskakin man burro tepeai?— jatu wa

³⁴jabun yuikin: —Nukun Xanen Ibun biyukatsis ikikiki— akabu —Peki. Buxunditankanwen— jatu wa

³⁵tepetan januxun jatun bemakia tadi burro kamaki kabekanbain Jesús anu butan Jesús jaki tsauanbu

³⁶katsaumekainaya jatun bemakia tadi bai namaki nabekanbainaibun

³⁷Olivos Mati butebidani jaki chiti ika ichapabun Jesús chibankin Jesúsun atimaska betsa betsapa wai uinkubidanshinabuwen taea benimakin jui kushipawen Dios kenwain nawakin

³⁸yuibainkin: —Aichu! Aichu! Ja Xanen Ibu Diosun kena kushipaya juaidan, benimakin kenwanankanwen. Naiudia unanuma jiwea inun kushipa binu keyua unankin jau kenwanunbunwen— ikubainaibun

³⁹jabianudi fariseobu jatube bui sinataibun betsan Jesús jatu yuixunkin: —Yusinaan, miki chiti ikabu jaskaibudan, jatu nemawe— aka

⁴⁰Jesúsun jatu yuikin: —Chanima eki chiti ikabu neseaibun na mishkipan ea kenwain sai itidubuki— jatu wabaini