Luukaṉu 1:59-66

⁵⁹Katja palunya pipirri wiima kanyiṉu, tjiṉṯu tjapanpalangara. Palulanguru walytja palunya tjuṯaya tjungurringu pipirri uḻa watilkitja. Pipirri palunya watira paapawanaya yini watjaṉu, “Tjakarriyatjanya.”

⁶⁰Litjipitalu watjaṉu, “Wiya, yini ngaatjanya Tjaananya.”

⁶¹Watjaṉuya, “Palumpa walytja kutjupa wiya yini palunya nguwanpa nyinanyi. Paapawana yini watjala!”

⁶²Marangkuya nintiṉu Tjakarriyatjala, pipirri yini nintintjaku.

⁶³Tjakarriyatjalu tjananya marangku nintiṉu piipa ngalya katinytjaku, wakantjaku. Piipa palula tjanampa wakaṉu, “Yini palunya, Tjaananya.” Riitarrirraya puntura kuliṉu.

⁶⁴Palulanguru Tjakarriyatjanya tjaa alytjurarrirra palyalpi wangkangu. Paluru Katutjanya puḻkapungu.

⁶⁵Palunya ngurrara tjuṯangkuya tjaa alytjurarrinytja tjakulpa kulira nguḻunguḻurrirra kuliṉu, “Yilta Katutjalu tjaa alytjuranu, Tjakarriyatjanya, tjaa patitjanu.” Litjipitalu yukarrawiyangku wulkuminangku kutju pipirri mantjiṉutjangka, Tjakarriyatjanya tjaa alytjurarringutjangka, yaṉangu tjuṯangku tjakulpa kulira tjakultjurinangiya ngurra tjuṯawana, manta Tjuutiyalawana.

⁶⁶Yaṉangu tjuṯalingkungkuya, Tjuutiyanya ngurrara tjuṯangku tjakultjunkunytja kulira tjapiṉuyanku, “Yilta katja palunya Katutjangka marangka nyinanyi. Pipirri palunya nyaa nguwanpa nyinaku?, tjinguru mayutju tiṉalampa nyinaku?”