Luukaṉu 13:22-29

²²Palulanguru Tjarutjalumalakutu yankukitjangku tjananya Yiitjulu nintirinangi tawunu tjuṯawana.

²³Yiitjula yaṉangu kutjungku tjapiṉu, “Mayutju. Tjinguru Katutjalu tjananya yaṉangu aapa kutju ngulytjura nyinatjunku kana kutu nyinanytjaku.” Yiitjulu kulira yara kutjupa tjananya watjaṉu,

²⁴“Waaḻa alytjura yutjungka, nyurrangarri ngarala paṯanma!, yunngu tjarrpanytjaku. Yaṉangu tjuṯaya tjarrpakitja puṯu ngarala waṉiku, alytjura yutju palula.” Yiitjulu yalatji watjaṉu, “Yaṉangungku ngayuku wangka kulira walytjarringkula tuu yutju palulawana nguwanpa yanku. Paluru ngayuku ngurrangka kutu kana nyinaku.”

²⁵Yiitjulu tjananya piyuku watjaṉu, “Waaḻa ngurrarangku pakara alytjura yutju patintjala, puṯuya yatura watjalku, waaḻa ngurrarangka, ‘Mayutju, alytjurarralampatju!’ Palulanguru tjanala watjalku, ‘Ngayulu nyurrangarrimpa ngurrpa, walytjawiya nyurrangarri ngaranyi.’

²⁶Puṯuya watjalku yalatji, ‘Tjungungkula ngalkura tjikiṉu, ngurra kutjungka. Nyuntu nganaṉanyatju nintiṉingi nganampatju ngurrangka.’

²⁷Waaḻa ngurrarangku tjanala watjalku yalatji, ‘Ngayulu panyapa nyurrangarrinya watjaṉu. Nyurrangarri ngayuku walytjawiya, ngayulu ngurrpa nyurrangarrimpa. Kuya palyalpayi tjuṯaya maa yarra!’

²⁸“Puṯuya tjarrpaku Katutjaku ngurrangka palumpa walytja tjuṯawana nyinakitja. Palunya tjuṯangka wiya tjanalawana tjungu nyinaku. Yurilta tjana nyinarra nyaku, yunngu palya nyinapayi tjuṯa, Yipuramanya, Yatjikanya, Tjikupanyaṯarra, Katutjaku wangka watjalpayi tjuṯaṯarra. Tjana nyakula puṯu tjungurrirra nyinakitja yulamalpa.

²⁹Walytja palunya tjuṯa, Katutjalu yaṉṯayaṉṯaṉingka kutjupa tjuṯa, Tjuwuwiya tjuṯaya yankula tjanalawana tjungurrirra nyinamalpa. Ngurra tjuṯawana nyinanytja tjuṯaya yankula tjungurriku kakarraranguru, yulparirranguru, wilurarranguru, yalinytjarranguru. Paluru tjana tjungurringkula tjungungku ngalkula yunyparriku, Katutjaku walytja tjuṯa.