Luuk 24:9-37

⁹Kaeŋ romoŋgoŋ qasirinoŋga eleema kaŋ iwoi kuuya kolooroti, iikawaa buju qaaya ii gowoko 11 ano tosaaŋa kuuya ii iŋijogi.

¹⁰Qaa ii iŋijogiti, ii Maria Magdalaga, Joana ano Maria Jeimswaa nemuŋa ano emba tosaaŋa yoŋowo laligogiti, iyoŋonoŋ ii kaŋ aposol ii iŋijogi.

¹¹Buju qaa ii iŋijogito, ii mogi qaa omayaaŋ kolooro ii mende moma laarigi.

¹²Mende moma laarigito, Piitonoŋ waama bobogariŋ qasirinoŋ kema jamo kobaawaa uutanoŋ uuro keno opo taaŋa esuugiti, iikayadeeŋ raro iiro. Ii iima iwoi kolooroti, ii aŋodeeŋ romoŋgoŋ waliŋgoŋ mirinoŋ eleeno. Kiaŋ.

¹³Weeŋ iikanondeeŋ Jiisaswaa gowokouruta yoŋoonoŋga woiyanoŋ Jerusalem siti mesaoŋ gomaŋ qata Emeus sewen mail kanoŋ kembojoŋ keni.

¹⁴Kananoŋ kema iwoi kolooroti, ii kuuya iyaŋgarodeeŋ amiŋ mori.

¹⁵Ii amiŋ moma kania jeŋ bimooŋ keni Jiisasnoŋ aŋo kosogaranoŋ keuro motooŋ keŋgi.

¹⁶Keŋgito, jaagara kojaŋgiro ii mende iima kotori.

¹⁷Mende iima kotori kokaeŋ irijoro, “Oro aŋgarodeeŋ naa qaaga kananoŋ amiŋ moma kajao?” Kaeŋ irijoro doroŋ ama wosobiri jaajaa uuŋ iima nani.

¹⁸Iima nama yoroonoŋga moŋ qata Kliopas iinoŋ kokaeŋ qisiŋ muro, “Pasowa kendonoŋ iwoi kolooroti, ii Jerusalem ejemba kuuyanoŋ moju. Gii motooŋgonoŋ wabaga kolooŋ ii mende mojaŋ me?”

¹⁹Qisiŋ muro “Ii naama?” jero moma kokaeŋ ijori, “Nazaret eja Jiisaswaanoŋ iwoi kolooroti, mono ii. Iinoŋ gejatootoo ejaga laligoŋ Anutu ano ejemba kuuya yoŋoo jaagianoŋ nanamemeŋ ku-usuŋawo ama qaa kotakota jeŋ laligoro.

²⁰Kaeŋ laligoro ananaa jigo gawoŋ galenana ano galeŋkoŋkoŋ ejaurunananoŋ ii wama gawanawaa boronoŋ aŋgi komuwaatiwaajoŋ jeŋ tegoro maripoonoŋ qegi komuro.

²¹Iinoŋ Israel kanagesonana kasanoŋga isama dowenana mewaatiwaajoŋ mamboma jejeromoŋromoŋ ama laligoninto, ‘Yei!’ Ii mono qegi komujaa. Iwoi ii kolooro laligoŋ kouniŋ kete somaŋa karooŋ koloodaboroja.

²²“Ii mende sokono kete nonoonoŋga emba tosianoŋ qaanoŋ kuuŋ waliŋgoŋ nonoŋgi laligojoŋ. Yoŋonoŋ gomaamba amandiinoŋ qasirinoŋ kema

²³qamoya mende mokolooŋ eleema kokaeŋ jejuya, ‘Nono Siwe gajoba woiwaa jaameleeŋ uŋa iiniŋ yoronoŋ ‘Jiisasnoŋ gbiliŋ laligoja,’ jeri mojoŋ.

²⁴Qaa ii moma eja nonowo laligojuti, iyoŋoonoŋga tosianoŋ qasirinoŋ kema emba yoŋonoŋ qaa jejuyati, iikawaa so ero iijuya. Roŋ gbameŋa iijuyato, iyaŋa mende iijuya.”

²⁵Qaa ii moma kokaeŋ irijoro, “Yei! Oŋo gejatootoo yoŋonoŋ qaa jegiti, ii kuuya mono naambaajoŋ ataqataŋ ama ajojooŋ gaonjaajaa laligoŋ mende moma laariju?

²⁶Hamoqeqe Toya Kraistnoŋ siimbobolo kaaŋa momago iyaŋaa asamararaŋ uutanoŋ ubaa. Iikawaa so oogita eja me qaago?”

²⁷Kaeŋ irijoŋ Mooses ano gejatootoo ejemba kuuya yoŋonoŋ qaa jegiti, iikanoŋa kanaiŋ iyaŋaa qaa kuuya oogita eji, iikawaa kania jeŋ asariŋ orono.

²⁸Jeŋ asariŋ oroma kema gomaŋ kembojoŋ jeŋ keniti, ii dodowiŋ kanoŋ toroqeŋ kemambaajoŋ moro.

²⁹Kaeŋ moroto, yoronoŋ kaparaŋ koma kokaeŋ ijori, “Gomaŋ mare kolooro weeŋ jaayanoŋ kememambaajoŋ anja. Kawaajoŋ saanoŋ norowo rama ewa.” Kiaŋ ijori yorowo mirinoŋ uma ragi.

³⁰Rama yorowo nene newombaajoŋ ama bered meŋ kotuegoŋ motoŋ oromambaajoŋ ano iwoi kokaeŋ kolooro:

³¹Iikanondeeŋ jaagaranoŋ tooro iima kotori ayayooga kono mombo mende iiri.

³²Kaeŋ kolooro aŋgarodeeŋ kokaeŋ amiŋ mori, “Kana somatanoŋ Buŋa Terewaa qaa jeŋ kania jeŋ asariŋ noronji, kambaŋ iikanondeeŋ mono uunaranoŋ gere jejiwaa so mojo.”

³³Kaeŋ jeŋ iikanondeeŋ waama Jerusalem sitinoŋ eleema keuma gowokouruta 11 ano alaurugia yoŋowo ajorooŋ ragiti, ii mokolooŋ oŋoni.

³⁴Mokolooŋ oŋoni kokaeŋ iŋijori, “Poŋnoŋ mono hoŋa waama Saimombaanoŋ asugijaa.”

³⁵Kaeŋ iŋijori iyaŋgoro kananoŋ iwoi kolooro ano bered motoroti, kambaŋ iikanoŋ uugara tooro moma kotori, iikawaa sunduya meŋ oŋoni. Kiaŋ.

³⁶Gowokouruta yoŋonoŋ qaa ii amiŋ moma ragi iikanondeeŋ Jiisas aŋo batugianoŋ asugiŋ nama kokaeŋ iŋijoro, “Alauruna, luaenoŋ mono oŋowo ewa!”

³⁷Kaeŋ iŋijoro toroko moma jeneŋgia ororo “Ome kokoosuga iijoŋ,” iikaaŋ romoŋgogi.