Ruka 24:9-37

⁹Zonẽtopõpyry poe toytose ropa toto. Emero tynenehpyrykõ poko tokarose eya xine 11mãkomo a, imarõkomo a roropa.

¹⁰Maria Matarena a turuse toto emero, Joana a roropa, Maria a roropa Tiaku eny a. Imehnõ nohpo tomo a roropa Jezu poetory tõ turuse tynenehpyrykõ poko.

¹¹Yrome, —Ajohpe matose, tykase rokẽ toto, zae aomirykõ ehtoh onenetupuhpyra toexirykõke.

¹²Mame Peturu towõse. Tururume toytose ynororo zonẽtopõpyry pona. Toeporehkase tahtao tupueh tykase zaka tõsenuhmatohme. Kamisãpo karimutumã rokẽ tonese eya, Jezu pyra. Morotoino toytose ropa tosaka. Tynenehpyry poko toemynyhmase ynororo yronymyryme. —Otara toehse Jezu ekepyry nae? tykase ynororo tyya rokene.

¹³Mame moro ẽmepyryae ro Jezu poetory asakoro ytõko kynexine Emauso pata esemary ae. Emauso Jerusarẽ poe moe exiry 10 kirometurume kynexine.

¹⁴Oturũko toh kynexine tynenehpyrykõ poko, tynetahpyrykõ poko roropa.

¹⁵Mame autururukohtao ro Jezu toytose eya xine toto maro toytotohme.

¹⁶Enẽko ro toh kynexine repe, ahnome rokẽ ekarõko toh kynexine, imehnõme rokene.

¹⁷Ynara tykase Jezu eya xine, —Oty poko oturũko matou? Oseosezuhnõko oytorykõme? tykase ynororo eya xine. Emytykõ akye pyra kynexine. Mame totypohse toto, toemynyhmarykõke.

¹⁸Mame Kereopa a Jezu tozuhse. Ynara tykase ynororo, —Ko! Jerusarẽpõkõ emero zuaro senohne ehtopõpyry poko. Otarãme omoro rokẽ mase zuaro pyra Jerusarẽpõkõ nyrihpyry poko, tykase ynororo Jezu a.

¹⁹—Otara? tykase ynororo. Mame ynara tykase toto eya, —Jezu Nazarepõ poko oturũko ynanase. Ritonõpo poe urutõme nexiase. Orẽpyra aomiry nexiase Ritonõpo a, ahno a, enara. Orẽpyra inyrityã roropa nexiase.

²⁰Yrome Ritonõpo maro oturuketõ tuisary tomo a taorihmapose. Yna tuisary tomo a roropa wewe pokona toxixihmapose ynororo. Toorihse.

²¹Izyraeu esẽme ynanekaroase repe. Yrome mokyro orihtopõpyry poe oseruao tõmehse.

²²Mame yna marõkõ nohpo tõ yna erehno tõmirykõ ke. Toytose toto pakeimo zonẽtopõpyry pona.

²³Yrome ekepyry onenepyra tokurehse toto. Mame tooehse ropa tahtao xine, “Ritonõpo nenyohtyã ynaneneno,” nykã toto. “‘Tõsemãse ropa mana,’ nykã toto Ritonõpo nenyohtyã yna a,” nykã nohpo tõ yna a.

²⁴Mame yna marõkõ toytose zonẽtopõpyry pona. Nohpo omihpyryae ro emero tonese eya xine. Yrome ekepyry onenepyra tokurehse toto, tykase toto.

²⁵Mame ynara tykase Jezu eya xine, —Tuaro pyra ro rukukuh matohu ipunaka. Oupuhpyrykõ tũpore mana. Okynã urutõkõ omihpyry zae ehtoh onenetupuhpyra matohu.

²⁶Zae nexiase Ritonõpo a tynymenekahpyry etuarimary aporo aorikyry roropa. Zae roropa aunukuru mana kapu aka emero esẽme ehtohme Ritonõpo maro, tykase Jezu eya xine.

²⁷Mame Moeze omihpyry poko, urutõkõ omihpyry poko roropa tamorepase toto eya. Typoko tamorepase toto eya Ritonõpo nymeropohpyry poe.

²⁸Mame eporehkasasaka tahtao xine Emauso pona, ynara tykase Jezu eya xine, —Ỹ ytõko ase myahxo, tykase.

²⁹Yrome anaropopyra toehse toto, —Yna maro exiko. Kohmanõko nase. Ytoto pyra nexino, tykase toto otuhparo eya. Naeroro itapyĩkõ taka toytose Jezu imaro xine.

³⁰Morarame typorohse toto ahtao otuhtoh pona, wyi tapoise Jezu a. Mame, —Kure mase Papa, kaxĩpo tyya wyi tytohkase eya ekarotohme eya xine.

³¹Mame morara kary etaryke tyya xine tonetupuhse ynororo eya xine. —Tee! Jezu hmosero, tykase toh rahkene. Mame Jezu tõtuenikase ropa mokaro maro toehxĩpo. Esahpyry pona rokẽ tõsenuhmase toto.

³²Mame ynara tykase toto oseya rokene, —To! Kure rukuh kynako. Sekese sexi ropa aomiry etaryke kyya. Osemae kuamorepa roropa kuoepyryhtao, Ritonõpo omiry poko, tykase toto.

³³Mame yroromero axĩ towõse ropa toto. Mororomero toeramase ropa toto Jerusarẽ pona. Toeporehkase toto. Moroto 11mãkõ tonese eya xine imehnõ maro.

³⁴Oturũko toh kynexine, —Kuesẽkõ mã tõsemãse ropa rahkene. Tõsenepose Ximão a, tykase toto asakorõkomo a.

³⁵Morara kary etaryke tyya xine, tynenehpyrykõ tokarose roropa eya xine, tynetahpyrykõ roropa, Emauso esemary ae toytotopõpyrykõ poko. Mame ynara tykase toto eya xine, —Jezu waro ynanexi ropa. Wyi apiakaryhtao ynanenetupuhno, tykase toto.

³⁶Mame moro poko autururukohtao ro mõtoino rokẽ tõsenepose esẽkomo, Jezu, oximõmãkõ rãnaka. —Enaromyra ehtoko, tykase ynororo eya xine.

³⁷Yrome tonaroxitapãse toto. Akuaryhpome tokarose eya xine.