Lucas 24:9-37

⁹Tsepita cutirirnam, chunca juc (11) apostolcunata y tsecho llapan quecaqcunata willayarqan sepulturacho ricayanqanta y wiyayanqanta.

¹⁰Tse apostolcunata willaqcunaqa cayarqan Maria Magdalenam, Juanam, Santiagupa mamänin Mariam y mas warmicunam.

¹¹Willacuyanqanta wiyarirninnam, apostolnincuna bufunadapaq churar creyiyarqantsu.

¹²Imano captinpis, Pedroqa sharcurmi coripa ewarqan Jesus pamparashqanman. Sepulturaman chärirnam, puctïcur qawecorqan y ricarerqan Jesus wancurashqan sabanasllatana. Tseta ricarirnam, yarpacachar wayiman mantsacashqa cuticorqan.

¹³Tse tardinam, ishcaq qatiraqnincuna euquicayarqan Emaus nishqan marcaman. Tse marcaqa Jerusalenpita pitsqa quilometruchomi carqan.

¹⁴Euquicarninnam, Jerusalencho llapan pasacushqancunata parlayarqan.

¹⁵Tseno parlar cäyitsinacur ewecayaptinnam, Jesus yurircur pecunawan juntu ewarqan.

¹⁶Peru riquecarpis, manam reqiyarqantsu Jesus canqanta.

¹⁷Tsenam Jesus taporqan: —¿Imata parlartaq euquicayanqui? —nir. Pecunanam llaquishqa shäcuriyarqan.

¹⁸Tsenam Cleofas jutiyoq caqna nerqan: —Qamllachi Jerusalencho quecar, ¿que junaqcuna imapis pasaconqanta musyanquitsu?

¹⁹Jesusnam nerqan: —¿Imataq pasacushqa? Pecunanam niyarqan: —Juc nunam carqan Nazaret marcapita Jesus jutiyoq. Pemi carqan Diosnintsicpa profetan. Rureninwanpis y parleninwanpis allapa puedeqmi carqan Diospa y nunacunapa nopancho.

²⁰Petam saserdoticunapa mandacoqnincuna y autoridacuna entregayarqan condenar cruscho wanutsiyänanpaq.

²¹“Imanomi noqacuna peman marcäcuyarqä, ‘pechi israel nunacunata libramäshun’ nishpa. Peru tseno marcäquicayaptïpis, quima junaqnam peta wanutsiyanqan.

²²Manam tsepis tsellatsu. Noqacunawan pureq warmicunam canan qoya qoyalla Jesus pamparashqanman ewar, espantaquipaqta willacayämushqa.

²³Jesuspa ayanta mana tarirninmi, wayiman cutiyämorqon. Y niyämarqon anjelcunash pecunata yuripur, ‘Jesusqa cawanmi’ niyarqonaq.

²⁴Tseno willayämaptinnam, waquin yanaqicuna ewayarqon sepulturaman, y warmicuna willacuyanqannollash tariyarqonaq. Peru Jesustaqa manash ricayarqonaqtsu” nir.

²⁵Tsenam Jesus nerqan: —¡Qamcunaqa imalaya upataq y rumi shonqutaq cayanqui Diospa profetancuna willacuyanqanta mana creyicuyänequipaq!

²⁶¿Manacu Dios Acrashqan tseno sufrir jipanan presisarqan, manaraq glorianman cuticur! —nir.

²⁷Tseno nirnam, pecunata cäyitserqan Diospa palabran escribirëcaq pepaq willaconqanta. Moises escribishqanpita qallecur, asta Diospa profetancuna escribiyashqanyaq quiquinpaq parlecanqanta cäyitsirnin.

²⁸Emaus marcaman yecurëcayaptinnam, Jesusqa nänipa pasacoqno carqan.

²⁹Peru pecunanam mañepa queno niyarqan: —Noqacunawan quedacushun. Allapa tardinam, patsapis paqasyärinnam. Tsenam Jesus pecunawan quedacorqan.

³⁰Micuyänanpaq mesaman täcuriyaptinnam, tantata Jesus tsarircur, Diosman mañacurir, paquirïcur pecunata qorerqan.

³¹Tse öram nawincuna quichacäreq cuenta reqiriyarqan Jesus cashqanta. Tsenam juclla tsincarerqan.

³²Pecunanam parlayarqan: —Jesus captinchi, nänichoqa shonquntsic allapa cushicorqon, Diospa palabranta willapar cäyitsimashqa —nir.

³³Tsenam jinallacho Jerusalenman cuticuyarqan. Chärirnam, taririyarqan chunca juc (11) apostolcunata y waquin qatiraqnincunatawan ellucashqa quecayaqta.

³⁴Tse ellucashqacunanam niyarqan: —Rasonpam Teyta Jesusqa cawarimushqa. Simontam yuripushqa.

³⁵Tsenam Emauspita ishcan cuteqcunapis willacuyarqan nänicho ima pasayanqanta, y tantata paquenqan öra reqiriyanqanta.

³⁶Tseno parlecayaptinmi, chopincunaman yurircur Jesus napacurerqan queno nishpa: —Alli pasaquicho cayë —nir.

³⁷Tsenam limpu mantsaquecuyarqan “¡Queqa almatsun o imam!” nishpa.