LUKAŠ 24:9-37

⁹Sar gele pale khatar o hrobos, phende savoro le dešujekh (11) učeňikenge the savorenge oklenge.

¹⁰Sas oda e Maria Magdalena, e Johanna, e Maria le Jakoboskeri the okla aver lenca, save oda vakerenas le apoštolenge.

¹¹Ale lenge pes dičholas le džuvľengere lava sar diliňipen a na pačanas lenge.

¹²Ale o Peter ušťiľa a denašelas ko hrobos. Sar banďiľa andre, dikhľa ode ča o lepedi. Geľa het a čudaľinelas pes oleske, so pes ačhiľa.

¹³Andre oda džives džanas duj džene lendar andro foros, so pes vičinel Emaus. Oda foros hino le Jeruzalemostar vaj dešujekh (11) kilometri.

¹⁴On peske vakerenas pal savoreste, so pes ačhiľa.

¹⁵Androda, sar on vakerenas a phučenas jekh avrestar, avľa o Ježiš paš lende a džalas lenca.

¹⁶Ale on les na prindžarde, bo na sas lenge oda mek dino.

¹⁷A phenďa lenge: “Pal soste tumenge vakeren le dromeha?” A on pharipnaha zaačhile.

¹⁸Jekh lendar, savo pes vičinelas Kleofaš, leske phenďa: “So, dural aves andro Jeruzalem, hoj ča tu korkoro na džanes, so pes andre kala dživesa ode ačhiľa?”

¹⁹Ov lendar phučľa: “A so?” On leske phende: “Oda, so pes ačhiľa le Ježišoha andral o Nazaret, savo sas prorokos a sas zoralo andre oda, so kerelas the vakerelas, anglo Del a the anglo savore manuša.

²⁰Les o nekbareder rašaja the amare anglune murša dine te odsudzinel pro meriben a ukrižinde les.

²¹Amen pes zmukľam pre leste, hoj ov zachraňinela le Izrael. Ale oda imar hin trito džives, sar pes kada savoro ačhiľa.

²²A amen predaranďilam olestar, so vakerenas varesave amare džuvľija. Sig tosara gele paš o hrobos

²³a na arakhle leskero ťelos. Avle a vakerenas, hoj dikhle le aňjelen a on lenge phende, hoj dživel.

²⁴Paľis gele varesave džene amarendar ko hrobos a arakhle savoro avke, sar phende ola džuvľa. Ale les na dikhle.”

²⁵O Ježiš lenge phenďa: “Tumen nagoďaver manušale, save polokes pačan savoreske, so vakerenas o Proroka!

²⁶Či na mušinďa o Kristus kada savoro te precerpinel a avke te džal andre peskeri slava?”

²⁷A chudľa lenge te sikavel andral o Zakonos le Mojžišoskero the andral savore Proroka, kaj hin savoro pal leste pisimen andro Pisišagos.

²⁸Avke doavle paš oda foros, andre savo džanas. Ale o Ježiš pes kerelas, hoj džala dureder.

²⁹Ale on les mangle: “Ačh amenca, bo imar zaračol a maj ela kaľipen!” Avke geľa andre a ačhiľa lenca.

³⁰Sar peske lenca bešľa paš o skamind, iľa o maro a paľikerelas, phagerelas a podelas lenge.

³¹Androda pes lenge phundrade o jakha a on les sprindžarde, ale ov lendar našľiľa.

³²Akor phende jekh avreske: “Či na labonas andre amende amare jile, sar amenge pal o drom vakerelas a delas te achaľol o Pisišagos?”

³³Takoj ušťile a gele pale andro Jeruzalem, kaj arakhle le dešujekh (11) učeňiken jekhetane avrenca, so sas lenca.

³⁴Ola phenenas, hoj o Raj čačes ušťiľa a pes sikaďa le Šimonoske.

³⁵Paľis the ola duj vakerenas pal oda, so pes lenge pro drom ačhiľa a sar les sprindžarde, sar phagerelas o maro.

³⁶Sar pal oda vakerenas jekhvareste o Ježiš korkoro ačhiľa maškar lende a phenďa lenge: “Smirom tumenge!”

³⁷Ale on igen predaranďile, bo gondoľinenas peske, hoj dikhen le duchos.