1Yisasia tuelufua (12) anagaamofe ke higeya ageno mukia Kefo Avamuyagama veamogami amakusafiti amanatitalesaya tokiyaene kalima aliya kanale humatesaya tokiyaene amamine.
2Amamiteno Anumaya Kotima kava yagaisia yafe hamapaigahe kalima hamaemainea yana aliya kanale humatesayafe humatene.
3Huneamateno mage huno hamapaiye “Kama visayafena ayopatamiene kutamiene mayatamiene monetamiene alitama oviho. Tole kena oaliho. Alu nopi alu nopi faelitetama ohiho.
4Nago nopima hai falenutamahena ani nopi faetama maitama amataletama alu kumatela viho. Faelitetama ohiho.
5Nagoa kumate veamoya falu falama huotamatesagetamahena ani kumala neataletama ‘Havi kava hae.’ hutama tamaiyafima hanesia kugukege yana aifopo huneataletama viho.” huno hamapaimaine.
6Hamapaitegeya alu kumate kumate neuya mukia kumatela Anumaya Kotina kanale kea hamanepaiya kaliamia aliya kanale huneamateya humainae.
7Ani kanafina Helotia sauve kanogino Yisasia mukiama humainea kavamo avagema haviana nagoa veamoya ani yana ageteya “Yonia falimainefiti ago hetimaine.” huya hageya nagoa veamoya “Ilaiyaa eteno falote humaine.” huya hageya nagoa veamoya “Nayoma Anumaya Kotina aune kanoa falimainefiti hetimaine.” huya haya yafe Helotia ani kea haviteno agu agesamoa anilega vigeno “Hana veamogami kemo tamagea nehafi?” huno humaine.
9Huteno Helotia mage hie “Nagaya aliya vayania humatogeya Yonina ageya ago fakalitalageno falimaine. Naa maa kava nehie huya avagema humainaya kanoa tae?” huno nehuno Yisasima agesia kafena ati ayemaine.
10Aposolo anagala eteya “Naa maa kava huteta neone.” huya Yisasina me hapaigeno Yisasia haviteno ani anagaa amavaleno Petesaita kumatega ugahe katega umainae.
11Nevageya mukia veamoya haviteya akave agaitega ageno Yisasia falu fala humateteno Anumaya Kotima kava yagaisia yafe hamapaiteno kalima nealiya veala alino kanale humatene.
12Une kigeya tuelufua (12) anagaamoya Yisasite mage me hae “Tagaya vaya omai kaiyaga mainonafe mukia veamogamina humatesanageya hanesia kumateene noma hanesilegaene ute ete huya faesaya nofeene nesaya yafeene atiyesae.” huya humainae.
13Hageno Yisasia mage huno hamapaiye “Tamakaitami kavela amamiho.” huno hamapaigeya mage hae “Utama mukia mainaya veamogami kavela miya hiho huka nehano? Tagaipina osi kave kanoa hane faefua (5) mayaene tole noyame kanoagi huno hane.” huya hae.
14Anifima mainaya vayala faefu tausenia (5,000) vayayaga mainayanagi Yisasia agaienema tokaeya nemaiya anagaamogamife mage huno hamapaiye “Hamapaigeya fifitia (50) veane ‘Alitalu hutama maite maite hutama mopale maiho.’ hutama hamapaiho.” huno humaine.
15Hamapaigeya ania hute hute huya mopale mainae.
16Yisasia faefua (5) maya nealino tole noyamene nealino huteno ikapinaga agesaga huno Anumaya Kotitega huno muse huteno ani mayaene noyamene koliteno agaienema tokaeya nemaiya anagaa amamigeya mukia veala amamite amamite humainae.
17Amamite amamite hageya mukia nageno amamu higeya atalaya atupatapaa aliya tuelufua (12) kula aihavatemainae.
18Nago yupa Yisasia agaiage Anumaya Kotitega havinegegeya agaienema tokaeya nemaiya anagaamoya avate mainageno mage huno hamavige “Veamoya nagaifena tae huya nehae?” huno hamavige.
19Hamavigegeya kenonaa mage huya hae “Nagoa veamoya kagaifena ‘Ti faleneamatea Yoni maine.’ huya hageya nagoa veamoya kagaifena ‘Ilaiya maine.’ huya hageya nagoa veamoya ‘Anumaya Koti aune kanoa nayo ago falimainea kano falimainefiti eteno hetimaine.’ huya nehae.” huya hapaimainae.
20Hapaigeno Yisasia amakaifena mage huno hamavige “Tamakaya nagaifena tae hutama nehae?” huno hamavigegeno Pitaa mage huno hie “Kagaya Kalaisigae Anumaya Kotia taugafa aligatigahe hugatenea kano mainane.” huno hie.
21Higeno Yisasia tokiyaage ke huno “Mani kea nagoa veala hamaopaiho.” huno humaine.
22Yisasia mage huno hamapaiye “Soka vayaene mono note kava vayaene kahegi kema havilinaya anagaene nagaila ikapinagati emainoa kanoa vayamo natenea kanomonihena ‘Kahaoteyakae.’ huya hunatesageno tusia nagata aisigeya nahaesagena faligahue. Falisugeya komufi hevainatesagena tole yupa maina tagufa kanale falimainesufiti hetigahue.” huno humaine.
23Alitalu humaiya veanene agaiaene tokaeya nemaiya anagaenefe mage huno hie “Nagoa veamoya nagai nakavema visaya amakesa havinuyahena amaugafama aliya hai yana amakaveno huteteya nakaima nagata aisigena falisua kava hisaya amakesa haviteya yafaga yosa kanaaene kanaaene kofiya nakave aliya visae.
24Nagola veamoya maiyaamima atafa huya ali talakoma hulisayana maiyaamimoa falino afaya hapaegahigi nagoa veamoyama nagaifema hamainageya maiyaamima atalesaya veamoya maiyaamia aligatisugeya agola aliya maigahie.
25Nagola veamoya mukia ma mopale mone fenoyaga aliteya maineya falisagenoa agola maige maige hisaya haimula ago atalenayanagiya alimainaya mone fenoamimoa hanaa huno amaya hugahie? Aao amaya ohugahie.
26Nagoa veamoya keniaene nagaienefema amakaye huya ‘Aoteyamaae.’ huya hunatesayana nagaya ikapinagati emainoa kanoa vayamo natenea kanomona esua kanafina tokiya hale yaniaene Nenafana tokiya hale yamaaene alu aotage ensole anagaamoyaenema etena esuana ania huna ani veanehena nagaye huna ‘Tamahaoteyatamie.’ humategahue.
27Tamagelafa huna tamahanepauve nagoa veala malema hetimainaya veamoya aupaa ofaligahayanagiya hagoteya Anumaya Kotima kava yagaisia kanaamoma efalote hisia yana agegahae.” huno humaine.
28Yisasia mani kea huteno sevenia (7) kana maiteno Pitana Yonina Yemesigamina amavaleno Anumayamotega ke huno havigegahe agoyafi haimainae.
29Haimainageno Yisasia Anumayamotega ke huno havinegegeno augosamoa alino alu augosa kaligeno kenaamoa efeage huno alave alave humaine.
30Tole kanolatana nayo falimainaa kanolatana Moseseene Ilaiyaene tokiya hale yaene maineana Anumaya Kotia Yisasifema “Naa maa huka Yelusalemu faligane.” huno hutenea kehe Yisasiene kea kea humainae.
32Ani kaiyekea nehageya Pitaene anagaamoyaene amaukalokalo higeya faemainafiti aupaa hetiya agayana Yisasia tokiya hale yamaaene avate tokaeana hetimaia kanolataene amakemainae.
33Neamakageana ani lole kanolatana Yisasina ataleana ugahe nehaageno Pitaa Yisasife mage hie “Anumayamoga tagaya male maunana kanale ya hie. Katega nona talia (3) kilamatesune. Kagaila nagolagi Mosesena nagolagi Ilaiyana nagolagi huno hanesie.” huno hianagi agesa havilama ohuno ani kea hapaiye.
34Hanepaigeno nago siamoa evayi huno alino aiso humategeana Mosesegani Ilaiyagania ani siapi falaageya Pitaene anagaamoyaene tusia koli humainae.
35Koli nehageno siapinagati ala kefiti age aino mage huno hie “Mani kanoa nagaini nafane ago hapalina hutenoa nafanegi agai kea haviho.” huno hamapaimaine.
36Hamapaigeya ani kea haviteya agayana Yisasia agaiage mainegeya ageteya ke ohuya mainayanagiya ani kanafina nagoa veala hamaopainae.
37Faeteya kotigeya Yisasiene Pitaene Yoniene Yemesiene ani agoya neataleya elavigeya kasagoya veamoya Yisasi agegahe emainae.
38Aya veanefiti nago kanomoa hetino ala kefiti mage huno hie “Humavenelina kanomoga tusiya huna kahavinegoe. Aiya nagoke ne nafaneniagi mego.
39Kanaaene kanaaene Kefo Avamumoa agusafinaga haimainegeno nafanenimoa ala kegefafiti ke nehigeno Kefo Avamumoa aige hafalege huneategeno avayafitila efeage agalemoa selu selu nehigeno augafa alino haviya nehuno aupaa ataleno ovisia kava nehie.
40Naa higena kagaiene tokaeya nemaiya anagakamogamife ani Kefo Avamula nafanenimo agusafinagati anatitalesae huna hamavige hamavige hugetoana amuha ohunaya yafe anati oatalenae.” huno hie.
41Higeno Yisasia mage huno hamapaiye “Vae tamakaya meni kanafima mainaya veamogatama nagaife havitama tamakupi maletama tametiti ohutama fatago hutama nomaiye. Ania haya yafe kasalo nenahaegi namagi yupa tamakaienena mainesugetama nagaife tamakupi malegahae?” nehuno ani nafanemo nefafe “Nafanekaa avaleka eno.” huno hie.
42Higeno ani nafanea yaufa avaleno neegeno Kefo Avamumoa alino mopafi ailakatitalegeno faemaineno kasegase nehigeno Yisasia ageteno Kefo Avamumofe kemakino “Ataleka hatilavio.” huno hutegeno hatilavigeno ani nafanea alino kanale huteteno nefana amine.
43Amigeya mukia anile mainaya veamoya ageteya Anumaya Kotina tokiya yamaahe tusia atalitalu huya amamayo aiyanagi Yisasia agaienema tokaeya nemaiya anagaamogamife mage huno hie “Menima hisua kea tamakesa havilama hutama haviho. Osi kanaa maitesugeno nago kanomoa nagesi hinageya ikapinagati emainoa kanoa vayamo natenea kanomonia kame vayamogami amayapi navaleya nategahae.” huno hie.
45Higeya ani kemona aepaamoa ago falakimaineafe havilama ohunagi koli huya ani kemo aepaahena haviokenae.
46Yisasiene tokaeya nemaiya anagamoya “Tagaipima uhakotemainea kanotia ta maine?” huya huteya ani yateti ke vaimainae.
47Yisasia amakaipima hanea amaku amakesa ago haviteno nagola osi nafanea avaleno avate hetitene.
48Ateteno mage huno hamapaiye “Nagoa veamoya nagaifema huya ma osi nafane avaleya falu fala hutesayana nagaiene navaleya falu fala hunatae. Nagaima navaleya falu fala hunatesayana hunatenea kanoene avalemainae. Tamakaipina ‘Osia afa kano kana huna mainoe.’ huno hisia kanomoa tamakaila tamakaseno kava kano maine.” huno hamapaiye
49Yonia mage huno hie “Kava kanomoga tagaya agonana nago kanomoa kagai kagi neayeno Kefo Avamula veamogami amakusafinagati amanatigeta ageteta kagaienema kakave nohia yafe ‘Ania ohuo.’ huta nagalu huneatone.” huno hie.
50Higeno Yisasia agaife mage huno hie “Ani kanoa alitama nagalu hu oateho. Vaya nagomo kamema hu otamatesiana nelamafuya mainae.” huno hapaiye.
51Yisasia ikapinaga haisia kanamoa aupa higeno Yelusalemu visia agesa havino tokiya vaiteno katega umaine.
52Nagoa anagaa talo tala hisaya yafe hagoteno humategeya nago Samelia kumate uya vayafe mage huya hae “Yisasia egahigi mukia yana talo tala hiho.” huya mo hamapaimainae.
53Samelia kumate veamoya Yisasia Yelusalemu ugahe hia yafe amakesa haviteya mage huya hae “Tagaya avaleta ali falu fala hu oategahune.” huya hae.
54Agaienema tokaeana nemaia kanolatana Yemesigani Yonigani ani kavama haya kavala ageteana mage hae “Vae Anumayamoga kahaisiana taagaya ikapinagati atahe ke hisuageno ata maleno ani veala asagalisie?” huana hae.
55Haageno Yisasia maiyahae huno keanamakiteno “Aao ania ohio.” huno humaine.
56Huteno anileti neataleya alu kumatega umainae.
57Katega neuya nago kanomoa Yisasifena mage huno humaine “Mukia kumate visanana nagaya kakave ugahue.” huno hie.
58Higeno Yisasia kenonaa mage huno hapaiye “Kepu yagamoya faesaya komuamia mopafinaga hanegi namamogamina noamia haneanagi ikapinagati emainoa kanoa vayamo natenea kanomona faesua nonia omale.” huno hie.
59Nago kanohe mage huno hapaiye “Nakave eno.” huno higeno mage huno humaine “Alanimogae nenafana falisigena alina hevaitetena kakavela ugahue.” huno hie.
60Higeno Yisasia mage huno kenonaa hapaiye “Atalo nagai kea ohavinesaya veala amaku amamemaamo falimainaya veamoya falia kanomona aliya hevaitegahae amakaiami yanagi kagaya neataleka veamogamite Anumaya Koti kava yagaimatesia kaiyekea mukia veamogamina hamapaiyo.” huno hie.
61Nago kanomoa hetino mage huno hapaiye “Alanimogae kagai kakave malegahe huanagi natalegena nenafa nopi mainaya veala nayana amamite amamite hutena kakavela vano.” huno hie.
62Higeno Yisasia kenonaa mage huno hapaiye “Nagoa veamoya avina yama kaligahena amakavelega maiyahae huya moge mege hinuyahena Anumaya Kotia ania hisaya veafena ‘Nagai aliya alitama veamogamite kava yakaisua kea hamapaiho.’ huno ohugahie.”
