1Ani yupa nagoa vayala Kalili vayafe Yisasina kea hapaigahe eya mage hae “Ani Kalili vayamoya Anumaya Koti muse yama amigahena sipi sipi nehageno Pailatia, kava kanomoa, ati vaya humategeya me hamayageya faligeno kolaamiene sipi sipi afuma haya kolaamoene nagopi tavi-maine.” huya hae.
2Hageno Yisasia mage huno hie “Kalili vayama fali-mainaya vayamogami kefo yaamia nagoa Kalili vayamogami kefo yaamimona ago amakaseno hai-mainea yafe fali-mainae hutama tamakesa nehavio?
3Tamahapauve ani vayayaga kefo yaamia ala huno otamakaseneanagi tamakaya kefo yatamihena tamakua aiyahae ohisayana ania hutama faligahae.
4Nago yupa Siloamu kumate ayaaya nona tagape ailavino eitinia (18) vaya hamaegeya fali-mainaya kea havilinao? Na tamakesa nehaviye ani vayamogami kefo yaamimoa nagoa Yelusalemu mainaya veamogami kefo yaami ago amakaseno hai-maineafe fali-mainae hutama tamakesa nehavio?
5Tamahanepauve anima fali-mainaya vayala kefo yaamimoa ala huno otamakasenegi tamakaya kefo yatamihena tamakua aiyahae ohisayana ania hutama faligahae.”
6Yisasia nago avame kea huno mage hie “Nago kanomoa hoyaafina figi yosa hane. Nago yupa alagaa tagigahe vianagi alagaa omale.
7Omalegeno hoyafi aliya nealia kanomofe mage huno hie ‘Havio nagaya talia (3) kafu alaga aligahe ete ete huanagi alaga omalene. Oayeneafe ani yosa atagi-talo. Naa higeno mopamona limaa afaa nenegena alu yosa faisue huna nehue.’ huno hie.
8Higeno hoyafi aliya kanomoa mage hie ‘Musekaa nehugi ma kafuene atalegena hafuyafina aipopoma huna afumo aifa katena malena agano.
9Malesugeno nago kafulema alagaa ayesio? Oayesigeka afaa atagi-talegane.’ huno humaine.”
10Nago Sapati yupa Yisasia nago mono nopi maineno humavenelie.
11Humaveneligeno nagola kali nealia alagino ani nopina maine. Ani amona aguafina Kefo Avamula hai fale-maineno tusia kali neamigeno eitinia (18) kafu ani kalia ali-maineanagino akaveya ayamufamoa fagagigeno hetino fatago huno nomaiyane.
12Yisasia ageteno ke huno mage huno hie “Ma amogae kalikaa ago ali neataloe.” huno hie.
13Nehuno ani amo augafale aya malegeno anile aupaa akaveya aifatago higeno hetino maineno Anumaya Koti agia alisaga humaine.
14Nehigeno ani mono nopi soka kanomoa Yisasima Sapati kanalema hutea yafena aipa kafa heteteno mukia veafe mage huno hamapaiye “Aliya kana sikisia (6) kana hanegi kalitima alino kanale hisie hinutamahena ani aliya kanale eho. Sapati kana kalitami alilino kanale hulamatesia yafena omeho.” huno humaine.
15Higeno Anumayamoa kenonaa mage huno hie “Tamakaya tamakuafina havi omaletama amegati ke nehaya vagala vayamogatama tamakaya mukiamogatama Sapati yupa toki afuene pulamakatamiene noamifina mo kalu hetama ti amigahena amavaletama nevayane.
16Naa nehayanagi ma amona Apalahamu aginagomona Satania eitinia (18) kafu nofi hutegeno kalia ali-maineafe Sapati yupa ani yana ali kalu hetaloa yafe ‘Havi kava hane.’ hutama nehao?” huno humaine.
17Higeya kame vayaamoya tusia amakaye higeya mukia veamoya kanale kava hia yafe tusia muse humainae.
18Yisasia mage huno hie “Anumaya Kotima kava yagaisia kavamoa ma kava humaine? Hanaa huna maa augafa yana hane huna tamahapaisue?
19Ma osi osi alagamoma hia avamete nehie. Ani alagamo agia masatatie. Osi osi alagama nago kanomoa alino hoyafima fai-malegeno hageteno haino haino ala yosagefa hanegeya namayagamoya akopale noamia ki-mainae.” huno hie.
20Nagoene mage huno hie “Anumaya Kotima kava yagaisia kavafena hanaa huna maa yana hane huna tamahapaisue?
21Kaihamema hale negia avamete humaine. Nago amoa ani kaihamema halegisia yana alino talia (3) ala yopafi tanefa falauvaene ali havigu higeno haenagaa mukia tanefa falauvamoa halegi-maine.” huno hie.
22Yisasia Yelusalemu ugahe osiosi kumayagaleene ala kumayagaleene uno humavelie.
23Humaveneligeno nago kanomoa mage huno havige “Anumayamogae Anumaya Kotia namagi veane amaku amamena aligatigahie? Osia veanefi kasagoya veane?” huno higeno Yisasia alitalu humainaya veamogamina mage huno hamapaiye “Anumaya Koti kumatema visaya fiana osi fia kanoa hane. Ani fiapima vinutamahena tamayamufa alitama tokiyaage hutetama hai falegahae. Hai falegahagi kasagoya veamoya ‘Hai falesune.’ huya hugahayanagi amukoamia omaleneanagiya hai ofalegahae.
25Haenagaa ani notema kava yagai-mainea kanomoa hetino fita alino kilamatesigetama fiate heti-mainetama fitale aiko nelitama mage hutama hugahae ‘Anumayamogae fita yakilato.’ hutama hisagenoa mage hugahie ‘Nagaya otamakenoane. Tamakaya hanategati aya veane neae?’ huno hulamategahie.
26Hulamatesigetama mage hutama hugahae ‘Kagaiene kavela nenonane. Tagai kumate kaiyekea tahapai-mainana kano mainane.’ hutama hugahae.
27Hugahayanagi mage huno hulamategahie ‘Ago tamahanepauve tamakaila otamakenoane. Hanategati aya veane neae? Kefo kavakeya ali falote hutama nehaya vealagi nagaitegatila mai-haletama viho.’ huno hulamategahie.
28Tamakaya mogesayana Apalahamuene Aisakiene Yekopuene Anumaya Koti amaune vayaene Anumaya Koti kumatela mainesagetama mogegahayanagi tamakaya anilela ougahayanagitama malaga mainetama tusiya hutama avia neatetama tamakaitami tamaugafahena tusia kalagi aigahae.
29Nagi mukia veamoya yagemoma tavi nefalelegatiene evayi nehilegatiene aluga aluga haupalegatiene Anumaya Koti kumate melitalu huya siale maineya kavela negahae.
30Haviho meni kanafina nagoa veamoya haenagalafa mainaya veamoya uhagoteya maigahae. Hagoteya mainaya veamoya haenagalafa maigahae.” huno hamapaiye.
31Higeya ani kanafina nagoa Falasia vayamoya mage me hae “Ma kumala ataleka alu kumate vuo. Helotia ala kava kanomoa ago kahaegahe nehie.” huya humainae.
32Hageno Yisasia mage hie “Tamakaya utama ani afai kalamona, kesi kate vaiyatete nehia kalamona, nagayama hisua kea mage hutama hapaiho ‘Havio nagaya osi kanaa Kefo Avamula veamogami amakuafiti ali-taletena kali veanene alina kanale humatetena talia (3) kanale aliyania ali avaya ayegahue.’ huna tamahapai-mainoa kea mo hapaiho.” huno hamapaiye
33Hamapaiteno “Anumaya Koti aune kanomona alu kumatela ohaegahayanagiya Yelusalemuge haegahae. Ani yafe nagaya meniene egaene olagaene kate vaiyegahue.
34Vaeha Yelusalemu mainaya veamogatama tamakaya Anumaya Koti amaune vayayaga nehamaetama yafa kayo alitama Anumaya Koti humategeya tamakaitega emainaya vayala yafa kayoteti tavata hamae-mainayanagi nagaya mukia yupa a kokolemoa nafaneama agekonafinagama alitalu nehia avamete huna tamakaila nagaya nagainiale alitalu hulamategahe nehugetama tamakaya ‘Ani kavala ohuo.’ hutama nehae.
35Haviho ma mainaya kumatefena Anumaya Kotia ago ataleno ‘Aoteyamaae.’ huno humaineanagitama menia nagoene onagegahagi ‘Anumayamo aliya aligahe higeno hutenea kanoa Anumaya Koti kanale manu amisie.’ huya hisaya kanafi nagoene nagegahae.” huno humaine.
