Luku 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Yisasia Yeliko kumate uvayi huteno agaseno alulega ugahe vie.

²Nevigeno ani kumatela nago kanomo agia Sakiusia musufaya huno vaya amaugafaleti takisi mone aliyate kava kanogino moneamoa kasago humainea kanoe.

³Ani kanomoa “Yisasia hanaa augafa kano neefigagina agesue.” huno hianagi aupa kanogiya yage yage humainaya veamoya agasageno “Hanaa huna Yisasina agesue?” huno humaine.

⁴Yisasima visia katega aiyayeno uhagoteno nagola fiki yosafi moliteno haimaine.

⁵Haino mainegeno Yisasia ani yosamo aepale neeno agesaga huno ageteno Sakiusifena mage huno hie “Kagaya aupaa elavio menia kagai nopi momaigahue.” huno hie.

⁶Higeno Sakiusia aiyayeno laviteno tusia muse huno Yisasina avaleno nomaalega atene.

⁷Avaleno vigeya veamoya aniama hia yana ageteya Yisasifena kalugalu ke vaiya mage huya hae “Kefo kavakeya maino nehia kanomo nopinaga maigahe viana havi kava hie.” huya hae.

⁸Hayanagi Sakiusia hetino Anumayamofe mage huno hie “Havio Anumayaniamoga menia nagaya afenoyania amunopiti ali fako huna moneamima omale vaya amamigahue. Havigema huna moneamima musufa ali-mainoa monea etena foa (4) malete malete huna amamigahue.” huno humaine.

⁹Higeno Yisasia mage huno hapaiye “Kagaya Apalahamuna aginagomoga mainanagi menia anagakaene kagaiene Anumaya Kotia tamaku tamamena ago alinegatie.

¹⁰Ikapinagati emainoa kanoa vayamo natenea kanomona fanane humainaya veafe amatiyena amaku amame aligatigahe emainoe.” huno hie.

¹¹Yisasia Yelusalemu uvayi hugahe higeya veamoya amaku amakesa mage huya haviye “Anumaya Kotia kava yagaisia kanamoa aupaa falote hugahie.” huya amakesa haviya yafe Yisasia mage huno nago avame kea hamapaiye.

¹²“Nago kava kanomoa kava yagaisia tokiyaa aligahe ‘Ayaaya kotega mo mainena alitena etena egahue.’ huno humaine.

¹³Ayaaya kotega ugahe nehuno tenia (10) aliya vayaamogamife ke higeya ageno monea ali-fako huno tueti (20) kina tueti (20) kina amamite amamite hie. Amamiteno mage huno hamapaiye ‘Mani moneleti aliyana aligeno ali kosa nehenagena nagaya etena ano.’ huno hamapai-maine.

¹⁴Hamapaiteno ataleno umainegeya nagoa vayaamoya ani kava kanomofe amaipa haviya huteteya nagoa aliya vayala humatageya mo humakesa huya ‘Mage hutama hiho. Tagaya mani kanoma kavatima maisia yafena notahaiye hutama hiho.’ huya hae.

¹⁵Hageno ani kava kanomoa kava yagaisia tokiyaa ago moliteno ani kotegati eteno monema fako huno amaminea aliya vayamogamife ‘Namagi mone halaya humalenafi?’ huno havisia yafe amakaife ke hie.

¹⁶Ke higeno hagote kanomoa evayi huno mage hie ‘Ala kanomogae kagaya tueti (20) kinama naminapitila etena nagoene aliya alina kosa hua monene tu hataleti (200) kina alugeno hane.’ huno hie.

¹⁷Higeno ala kanomoa mage huno hie ‘Kagaya kanale kano mainane. Kanaleya huka osi mone kanoa kaminofitila efi efi huka aliyana alinageno ala hiafe kagaila tenia (10) ala kumate kava yagaisane huna hapalinegatoe.’ huno hapaiye.

¹⁸Higeno anile kanoa eno mage huno hapaiye ‘Ala kanomogae kagaya tueti (20) kina naminapitila etena nagoene aliya alina kosa hoa monene vani hataleti (100) kina alugeno hane.’ huno hie.

¹⁹Higeno ani kanomofena ala kanomoa mage huno hapaiye ‘Nagaya faefua (5) kumate kava yagaisane huna hapalinegatoe.’ huno hapaiye.

²⁰Higeno nago aliya kanomoa anile eno mage hie ‘Ala kanomogae tueti (20) kinama naminana monea afaa omanafi haya kina katenoanagina menia ma ma alina me negamue.

²¹Kagaya keage kanoma mainananagina kolikaa hue. Alu veamogami yana alika kaugafa hegeka omai kano mainananagika nago kanomoa hoyaafima kali-malenea yaene alika negeka omai kanogina kolikaa hue.’ huno hie.

²²Higeno kava kanomoa ani aliya kanohena mage hie ‘Kagaya havi aliya kano mainane. Kagaikaa kemo eteno maiyahae huno kaiyekea hugategahie. Kagaya ago havimainane nagaya keage kano mainoe. Alu veamogami yama alina naugafa hegena omai kano mainoanagina nago kanomoma hoyaafima kali-malenea yaene alina negena omai kano mainoanagika kagaya nagaifena ago havimainano?

²³Naa higeka monema nemalaya nopina monenia omaleka afaa malenane. Monema nemalaya nopima malenateasina menia nagaya nagoa ava monene aluleasine.’ huno hie.

²⁴Anile hetiya mainaya vayafe mage huno hie ‘Tueti (20) kinania hafaletama tu hataleti (200) kinama malenea kanomona amiho.’ huno hie.

²⁵Higeya amakaya kava kanomofena mage huya hapaiye ‘Ala kanomogae ani kanomoa tu hataleti (200) kina ago alino malene.’ huya hae.

²⁶Hageno mage hie ‘Tamage huna tamahanepauve nago yama hanesia veamogamina nagoene amamigahigi nago yama omalesaya veamogamina alilinesamaa hanafalegahie.

²⁷Kame veaniamoya nagaifena ‘Kavatima maisia yafena notahaiye.’ huya humainaya veala amavaletama naulagale hamaegeya faliho.’ huno hie.”

²⁸Yisasia anima hia kaiyekea huno hano humaleteno Yelusalemu ugahe uhagoteno katega umaine.

²⁹Petafasiene Petaniene ani kumatalana Olivi yosa hanea agoyamona agegayalega hanegeya aupaa uvayi hugahe hageno Yisasiene tokaeya nemaiya anagapiti tole kanolatana hunateteno mage huno hanapaiye “Atu kumate utana atupa notela hosi kana afumo agia tokigi ani tokimo nafanea ayetenayanagitana agegae. Ani tokimo nafanea vayala oamavalenea tokigi kalu hetana avaletana male eo.

³¹Nagoa vayamoya ‘Naa higetana kalu hetana nevae?’ huya tanahavigesagetana mage hutana hio ‘Kava kanotimoa nago aliya aligahe higetaa neoe.’ hutana hamapaio.” huno hie.

³²Hunatea kanolatamogania mogeteana Yisasima hanapaiya yana ago moge falote humainae.

³³Ani tokimo nafanea kalu nehaageya ani afumo nefaya megeteya mage huya hae “Naa higetana tokimo nafanea kalu nehae?” huya hageana mage huana hae “Kava kanotimoa aliya aligahe higetaa kalu nehoe.” huana hamapaie.

³⁵Huteana Yisasite avaleana evayi huana kenaania anaugafaleti hateana ani afumo agupile yakai-malaageno Yisasia anile haino maine.

³⁶Haino maiteno katega nevigeya veamoya “Ala kanoa neie.” huya amaugafaleti kenaamia hateya visia katela yakaitenae.

³⁷Yisasia viayamo Olivi yosa hanea agoyamona agegayalegati enelavigeya mukiama melitalu humainaya veanene agaienema tokaeya nemaiya anagaaene tokiya avameyama higeya age-mainaya yafe aepa heya ala kefiti Yisasife muse nehuya Anumaya Koti agia alisaga hume hume neuya mage hae

³⁸“Ala kava kanomogae kanaleya huka neane. Anumayamo aliya aligahe hanageno hugategeka emainana kanomoga Anumaya Kotia kanale manu kamiteno kaya humaine. Ikapinaga amaipa falu hisaya yana hanesie. Anafi mainea Anumaya Kotina agai agia alisaga hisune.” huya hae.

³⁹Hageya anima melitalu humainaya veapiti nagoa Falasia vayala anifi maineya Yisasife mage huya hae “Humavenelina kanomogae kagaienema tokaeya nemaiya anagakamogamifena ‘Kea ohutama maiho.’ huka hamapaiyo.” huya hae.

⁴⁰Hageno Yisasia mage hie “Nagaya tamahanepauve ani veamoya kema ohuya maisayana yafayagamoya amakaiami ani kea hugahae.” huno humaine.

⁴¹Yelusalemu kumala aupate hanegeno Yisasia ageteno ani kumate veafe avite-maine.

⁴²Avia ateteno mage hie “Ma kea meni havisae huna nehugi nagaya tamaipamoa falu hisia yana tamamisua kano mainoe. Menima mainogetama ani yana falaki mainegetama noagae.

⁴³Nagola alu kana falote hisigeya kame vayatamimoya esayaamoya kegiya lafi humalenaya kegiyafi me kagi kagi nehuya ali haviya hulamategahae.

⁴⁴Anumaya Kotia tamaya hugahe neegetama agai kema ohaviya yafe kame vayatamimoya tamakaiene nafanetamiene mukia lafifima mainaya veanene falifalutisageya yafatetima kimalenaya nona mukia ani yafamoa mopafi helafilavigahie.” huno hamapaiye.

⁴⁵Yisasia ani kaiyekea huteno ala mono nopi hai faleno ageana ani nopi mainaya veamoya monehe ke huya nealiya veamogamina aepa heno amanatigahe nehuno mage hie “Anumaya Koti autamafina mage huno kae-maleneane ‘Nagai nona mukia veamoya Anumaya Koti agi ayeya ke huya havigesaya no hane.’ huno kae-maleneanagi tamakaya musufa yama hisaya kava hugahena ma nopi emainae.” huno hie.

⁴⁷Mukia kanafina ani ala mono nopi hai faleno huge amavelige nehigeya ani mono note kava vayaene kahegi kema havilinaya anagaene mukia veate kava vayaene Yisasima haesaya kafena atiyemainae.

⁴⁸Ati maiya ayayanagi mukia veamoya agai kehema muse huya agima alisaga haya yafe ala vayamoya haesaya kana ageya ali falote ohunae.