Luku 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Anile Anumayamoa sevetitua (72) vaya hapaliteno “Nagainima visua kumate ali lokaete lokaete hutama uhagotetama neviho.” huno humategahe amakaife mage huno hamapaiye “Nagai kema havisaya veala kasagoya kavema hoyafi afulemailemai hia kava humainegi hoyafima aliya alisaya veala osia veane kanoa mainayafe ani hoyamona nefafe havigegeno nagoa aliya vayala kavema alisayafe humatesie.

³Tamakaya neutama haviho tamakaya sipi sipi nafane kana hutama mainagi nagaila ago amakaveno hunenataya veala afai kala kana kaveage veane mainaya amunopi hulamatesugetama ugahae.

⁴Ugahagi monetamiene kutamiene tamaiya noene alitama oviho. Katega nevisaya veanenena ayaayate maitama kaiyekea ohiho.

⁵Nago nopima hai falenutama hagotetama mage hutama hiho ma nopima mainaya veamogatamina ‘Anumaya Kotia tamaipa falu hisaya tamaku tamakesa tamamisie.’ hutama hiho.

⁶Aipa falu hisia agesaene kano ani nopima mainesiana Anumaya Kotia aipa falu hisia agesa amigahigi ania kana kanoma omainesiana aipa falu hisia yana oaligahie.

⁷Ani nopi mainetama nesaya yama tamamisagetama afaa neho. Nagai aliya alisaya anonaa nesaya yana afaa alisayana kanale hugahie. Alu nopi alu nopi faelitetama ohiho.

⁸Nago kumatema visageno falu fala hulamateteya tamamisaya kavela afaa neho.

⁹Ani kumatema mainesaya kali veala ali kanale humatetama mukia veafe mage hutama hamapaiho ‘Anumaya Kotia kava yagailamatesia kana ago efalote huno aupa humaine.’ hutama hamapaiho.

¹⁰Nago kumatema visageya falu fala hu otamatesagetama ani kumala ataletama veamoyama mainesaya katega utama mage hiho ‘Havi kava hae. Tamakai kumapiti kugukege yana taiyalegati aifopo hutalegahunagi tamakaya havilama hutama haviho Anumaya Kotia kava yagaisia kanamoa ago efalote huno aupa humaine.’ hutama hamapaiho.

¹²Nagaya tamahanepauve Anumaya Kotia kaiyekema hulamatesia kanafina Sotomu mainaya veamogami amaugafa amagata aigahigi tamakaima falu fala hu otamatesaya kumate veamoya tusiya huno amakaseno amaugafa amagata aigahie.”

¹³“Avonio Kolasini mainaya veamogatamaene Petesaita mainaya veamogatamaene tusiya huna tamakaifena nahau nehue. Tamakai kumapi nagaya tokiya avameyana ago huanagi tamaipa aiyahae ohageno ani tokiya avameyana Taiyaene Saitoniene huleasine ani kumate veamoya kefo yaamihena ago amaipa aiyahae huya kefo yama humainaya yafena kayavo kena failiya tanefafi mopale maileasine.

¹⁴Anumaya Kotia kaiyekema humatesia kanafina Taiya mainaya veanene Saitoni mainaya veanene amaugafa amagata yana aligahayanagi tamakaya tusiya hutama nagoene tamaugafa tamagata yana aligahae.

¹⁵Tamakaya Kapaneamu mainaya veamogatama ‘Taugafa alita anale haigahune.’ hutama nehao? Aao afete tavitama tamakaye nehinagetama maigahae.” huno hie.

¹⁶Nagoene humatenea vayamogamife mage huno hamapaiye “Tamakai kema havisaya veamoya ania huya nagai kea havigahae. Tamakaifema ‘Tamahaoteyatamie.’ hisaya veamoya ania huya nagaifena ‘Kahaoteyakae.’ huya hunategahae. Nagaife ‘Kahaoteyakae.’ hisaya veamoya ania huya hunatenea kanomofena ‘Kahaoteyakae.’ huya hutegahae huno hamapaigeya umainae.”

¹⁷Uteyama ayana ani sevetitua (72) vayala muse huya eya mage hae “Anumayamoga tagaya kagai kagileti Kefo Avamua humatonageya tagai ke akave malae.” huya me hae.

¹⁸Hageno Yisasia amakaifena mage huno hie “Nagaya agoana Satania ikateti aulumaya alia kava huno aupaa asaga hunelavigena agoe.

¹⁹Haviho nagaya tokiya ago tamaminoe. Nagoa yamoa tamakaila alino haviya otamahaugahie. Satani tokiyamona agasesaya tokiya ago tamaminoe. Vaya anigeno nefalia osifavene yapaveene tamaiyaleti ayelatapesayana nagaini tokiya ago tamaminoafe otamahaegahie. Nagoa yamoa tamakaila ali haviya otamahaugahie.

²⁰Tokiyania ago tamaminogi Kefo Avamula amakasesaya tokiya tamaminoa yafena musena ohutama Anumaya Kotia tamakima ikapinaga kaemalenea yafena tusia muse hiho.” huno hamapaiye.

²¹Ani kanafina Alu Aotage Avamumoa tusiya huno muse hisia agu agesa amigeno Yisasia muse nehuno mage huno hie “Nenafagae mukia ma mopafi yaene ikapinaga yaene kava yagaimainana Anumayamoga kanale kava nehane. Ma ma hamapauva kea nagoa ‘Mukia yafena havilinoa kano mainoe.’ huya haya veamogamifena ohavisae huka falakimalenane. ‘Ala avo nopi umainona vea mainone.’ huya hisaya veamogamifena ohavisae huka falakimalenanagi ‘Inamu nafane kana huta mainone.’ huya humainaya veala ago huhaleka amavelimainanafe aluya huna musekaa nehue. E, Nenafagae kagai kagu kagesamoa ania humainegeka ani kavala humainane.” huno hie.

²²Veamogamifena mage huno humaine “Nenafaa mukia lokiya ago namine. Mukia veamoya nagaila neamonina aepania ohavinagi Nenafaa agaiage nagai aepaa haviline. Havilinegi mukia veamoya Nenafa aepaa ohavinae. Nagainige neamona havilinena nahaisia veamogamina humavelisugeya Nenafa aepaa havigahae.” huno hie.

²³Yisasiene tokaeya nemaiya anagamoya amahaote mainageno Yisasia mage huno hamapaiye “Anumaya Kotia tamaulagama neagaya yana ago tusia kanale ya ago tamamia yafena tusia muse hutama maiho.

²⁴Tamahapauve nayona mukia mainaya amaune vayaene sauve vayayagaene tamakayama neagaya yana ‘Agesune.’ huya hayanagi oagenae. Havilinaya kea ‘Havisune.’ huya hayanagi ohavinae.” huno hamapaimaine.

²⁵Nagoa kahegi kema havilinea kanomoa hetino Yisasina ayevataga huno mage huno havige “Humavenelina kanomogae nagaya hanaa hutena agola maige maige hisua nahaimula alisue?” huno havige.

²⁶Havigegeno Yisasia mage hie “Anumaya Koti autamafina naane huya kaemalenae? Kagaya hapaliteka ani kemo aepaa naane huka nehavine?” huno havige.

²⁷Havigegeno mage hie “Ani kemoa mage humaine ‘Ala Anumaya Kotikamofena tusiya huno kahaino. Kaguafinagatiene kahaino. Kagu kameene amio. Aliya nealina himamukaene amio. Kagesama nehavina yana amio. Kagaika kaugafahema kahaisia avamete mukia veamogami amaugafahena kahaino.’ huno humaineane.” huno hie.

²⁸Higeno Yisasia mage hie “Kagai kemoa tamage huka nehane mukia kanafina ani kava huge huge hisanana maige maige hisana kahaimula aligane.” huno hapaiye.

²⁹Higeno ani kanomoa agesafinaga mage huno havie “Yisasia nagaife kanale kagesa hanea kano mainane.” huno hisiafene huno havige “Mukia veala tagamife nehane?” huno havige.

³⁰Havigegeno Yisasia mage hie “Nago Yuta kanoa Yelusalemu kumala ataleno Yeliko kumatega ugahe katega nevigeya nagoa musufa vayamoya katega ageteya atafa huya mukia afenomaa hanafaleteya aikolimainae. Aikoliteya ataleya vageno falisia kava huno maine.

³¹Mainegeno ani yupa mono note kava kanoa ani kate taviana ani kanoa mo neageno agaseno ka agegayalega umaine.

³²Umainegeno nago Yuta kanoa Livai nofi kanoa ania huno mo neageno agaseno nago kaiyaga ka agegayalega umaine.

³³Naa haageno nagola Samelia kanoa kame kanoamoa anile neeleti megeteno tusia hau hutene.

³⁴Hau huteteno avate umaineno masave tiene nofi alagamo tiene haemalaya amupina takino haya kiteteno avaleno agaia toki afumo agupifi ateteno avaleno viayamo natu vaya nefayaya nopi moteneno kanale huno kava hutene.

³⁵Kava huteno mainegeno ko tigeno ani nomona nefana tole kina neamino mage huno hapaiye ‘Kagaya kanaleya huka mani kanoa kava huto. Nagoa monekamoma ani kanolema hano hisigena nagaya etena anonakaa kamigahue.’ huno hapaiye.”

³⁶Yisasia anima hia kea hu hano hugahe mage hie “Naa humainagi na kagesa nehavine? Talia (3) vayala agaseya vageno hana kanomo musufa vayamoya hae-malenaya kanomona alino kanapa vayamoya nehaya kavala hu-tene?” huno havige.

³⁷Higeno ani kahegi kema havilinea kanomoa mage hie “Tusia hau hutenea kanomoa kanapa vaya kana kavala hutene.” huno higeno Yisasia agaifena mage hie “Kagaya visanaamoga mukia kanafina aniageya huo.” huno hapai-maine.

³⁸Yisasiene agaiaenema tokaeya nemaiya anagala katega nevageno Yisasia nago kumate vigeno nago amo agia Matae Yisasina avaleno nomaafinaga umaine.

³⁹Umainegeno Matana negana agia Maliae Yisasina aiyafi mopale emaineno Yisasima hia kaiyekea nehavie.

⁴⁰Havino mainegeno nunaamoa, Mataa, mukia kavela talo tala hiana agesamoa tole-lole higeno Yisasite eno mage huno hie “Anumayamogae nagananimoa natalegena nakainige kavela tusiya huna nealugi ani yafena kagesa nohavino? Hapaigeno me naya hino.” huno hie.

⁴¹Higeno Yisasia mage huno hie “Mataga mukia yafena kagesamoa tole-lole huka aliyana nealinana havi kava nehane.

⁴²Nagoke yamaage alisana kagesa havige havige huka maiyo. Maliaa ani yafena agesa havi havi huno atafa nehigi ani yana nago kanomoa hana-ofalegahie.” huno hapaiye.