1Ani kanafina nago kava kanomo agia Sisa Ogasatasie mage huno humaine “Mukia Lomu kamanimoya kava yagaimainesaya kumate veala amaki me ayegeya kaeho.” huno humaine.
2Higeno ani kanafina hagote kanale aepa heya amakia kaemainayane. Ani kanafina nago osi kava mainea kanomo agia Kuiliniusie ani kanoa Silia kotega kava yagaino nemaiya kanoe.
3Mukia vayala amaki aligahe hageya mopa aepaamilega umainae. Yosefena aginagomoa Tevitima maineafe Yosefea Kalili kotega hanea kumala Nasaleti kumaa ataleno Petelehemu, Tevitina atenea kumate umaine.
5Maliana hagemalenaya munala aipaene mainegeana “Taagi alisae.” huno avaleno umaine.
6Ani kumate umainaageno inamu yana alitene.
7Maliaa yage nafanea ne nafane ateteno mukia faesia nona hiya higeno pulamakamo nopi ateteno kupi asaga huno aiteno pulamakamoya kave nenaya yopafi faetene.
8Ani kegela sipi sipi kava vayala talapinaga maineya sipi sipiyagale kava yagaiya mainae.
9Mainageno anile Anumaya Koti ensole kanomoa egeno Anumayamo tokiya hale yamaamoa aivasa hulino egeya ageteya koli humainae.
10Hageno ensole kanomoa mage huno hie “Kolia ohutama mainetama haviho nagaya kanale kaiyekea tamahapaigahe alina neoe. Tusia muse hisaya kea tamahapaisugeya mukia veamoya havigahae.
11Meni kegela Teviti kumatela tamaugafa aligatisia kanoa ago neate. Ani kanomo agia Anumaya Kalaisie, Anumaya Kotima taugafa aligatigahema hutenea kanoe.
12Ani nafanea kupi aiteteno pulamakamo kave nenea yopafi faeteneanagitama mogetetama ‘Ma yafema hia yana ago falote humaine.’ hutama hugahae.” huno hie.
13Higeya mukia ensole vayayaga ani kanomote aupaa melitalu huya Anumaya Koti agia alisaga nehuya mage huya humainae.
14“Anumayatimogae anafinaga mainane huta kagi alisaga nehunageka mopale mainaya veamogamina kaipa falu humatesana veamoya amaipa falu huya kanaleya huya maigahae.” huya humainae.
15Ensole vayamoya neamataleya ikapinaga haigeya sipi sipi kava vayamoya ke mohu mehu huya mage hae “Petelehemu vigetao Anumayamoa tahapaiya yana mogegahune.” huya humainae.
16Amaiyayeya agegahe vaayana Maliagani Yosefegania nafaneania afumo kave nenea yopafi faeteteana mainaageya mogemainae.
17Mogeteya ensole vayamoya ani nafanehema hamapaiya kea mukia veanea hamapaiye.
18Hamapaigeya mukia havimainaya veamoya sipi sipi kava vayamoyama hamapaiya kehena tusia amamayo aimainae.
19Amamayo aiyanagi Maliaa mukia yama humainea kavala aguafi maleneno agesa havino maine.
20Mainegeya sipi sipi kava vayamoya eteya kumaamilega neuya agoma hamapaigeya haviteya agemainaya yafena Anumaya Kotitega muse huya agia alisaga hume hume vae.
21Yisasina atetegeya nago sota maiteya agoya anoya tagama haya kanale agia Yisasie huya malenae. Ani agia oatenegeno itaamoa aipa yana ohunegeno ensole kanomoa ani agia malenea agie.
22Itaamoene nafanene faeana hali hutaageno Mosesema humainea kemo akave maleana Yisasina avaleana Anumaya Kotina amigahe Yelusalemua haimainae.
23Anumaya Koti ke kaemalenaya kefina mage huno humaine “Mukia yage ne nafaneyaga Anumaya Kotina alu aotage nafanea maisie.” huya kaemalenayane.
24Kaemalenayana Anumaya Kotitega muse ya amigahe haimainae. Anumaya Koti ke kaemalenaya kefina mage huno humaine “Tole nama haefatalapi tole ala namalata amigahae.” huya kaemalenayane.
25Ani kanafina nagola Yelusalemu mainea kanomo agia Simionie. Fatago kano maineno Anumaya Koti kea akave nemalea kanoa Isaleli veamogami amaugafa aligatisia kanomo esiafe agava mainegeno Alu Aotage Avamumoa agaiene maineno mage huno hapaiye “Aupaa ofaligananagika Anumaya Kotima amaugafa aligatigahema hutesia kanoa ageteka faligane.” huno hapaimaineane.
27Hapaimaineanagino ala mono nopi avaleno egeno anile mainegeana Yisasina itaafoamogania mono kemo avaya ali hipoya huana avaleana aageno ani kanomoa Yisasina avaleno anukilineno Anumaya Koti agia alisaga humaine.
29Avalelineno Simeonia mage huno hie “Anumayamoga hagoteka nahapaimainana nafanea menia ani nafanemoa tagaila taugafama aligatisia kanoa neagoafe naipamoa kanale hinagena aliya kanokamonia ‘Falio.’ hisanagena falisue.
31Mukia veamogami amaulagafina anima taugafa aligatisia kanoa tavelinanagino ani kanomoa kagaikaa Isaleli veamogamina amakia alisaga huteno Yuta veala omainaya veamogamina aye vasa humateno kagai kea hamapaigahie.” huno hie.
33Yisasina itaafoamogania Simeonia ani nafanehema hia kehena tusi anakesa havi havi humainae.
34Haageno Simeonia kanale manu anamino ani nafanemo itaamoa, Maliafena mage huno hie “Havio Anumaya Kotia mani nafanea huteneafe mukia Isaleli kumate veanea nagoamogamina ali lakatineamataleno nagoamogamina ali hetimategahe hutegeno emaine. Anumaya Kotia nagola alegana ya kana huno hanesiafe hutegeno emaineanagi mukia veamoya agaifena ‘Kahaoteyakae.’ huya hugahae. Hugahayanagi mukia veamoya amaku amakesa haviya kemoa falote humategahie. Maliaga haenagaa kagaila kahaumanamoa tusiya huno halegahie.” huno hapaiye.
36Ani mono nopina nagola Anumaya Koti aune aala maine. Ani amo agia Anae nefa agia Fanuelie. Anakai nofi veanea Asa nofi veane mainae. Ani aala alekano maine. Yauva a mainea kanafina neveene sevenia (7) kafu mainegeno nevea falitegeno megusa heno maino haimainea kafua eiti foa (84) kafu maine. Ani amoa mono nona oataleno anifi mukia kanafina kegeene felugaene Anumaya Koti agia alisaga nehuno kavela mosino Anumaya Kotitega havinegeane.
38Ani amoa anile evayi huno Yisasina megeteno Anumaya Kotifena tusi muse huteteno mukia Yelusalemu veanea amaugafa aligatisia kanohe agava mainaya veala Yisasifena hamapaiye.
39Yisasina itaafoamogania mono kema hamanepaiya kavala hano huteteana Kalili uana kumaanilega Nasaleti umainae.
40Yisasia ala huno tokiyaage nafane maineno kanale agu agesaene nafane mainegeno Anumaya Kotia agaiene maineno kayone hu yana amine.
41Isaleli kotega veanea mukia kafuahena Anumaya Kotima amaugafa aligatimainea yafe amakesa hao hisia imu negigeana Yisasina itaafoamogania mukia kafulema ani imulega Yelusalemuga umainae.
42Vaageno Yisasia tuelufua (12) kafua hanegeana mukia kafule nehaa kava huana Yelusalemu ani imulega haimainae.
43Anima imuma kiya kanamoa hano higeya itaafoamogania noamilega aepa heya ugahe hageno ani nafanea Yisasia ouno afaa Yelusalemu mainegeana maiya yafena ohavinae.
44“Nagoa vayatiene katega nevifi?” huana nago yupa kate uteana kegela agai nofi vayaamogami amunoamifiene nefugami amunoamifiene atiyaana oagenae.
45Oagetafa huteana atiyegahe Yelusalemu alehate eteana umainae.
46Tagufa (3) feluga atiyegetaana oageana ala mono nopi haiana mogaana anile ala humaveli vayaene mopale maineno amakai ke haviteno anonaamia hamavige.
47Hamavigegeya mukia ani kema haviya vayamoya kenonaahena tokiyaage agesama hanea yafena tusiya huya amamayoa aimainae.
48Amamayoa neaigeno itaafoamogania mogeteana anamayo neaiana itaamoa mage hie “Nenimoga naa higeka ma kavala hu nelaatane? Negafaene taaipa havitaa kanaage hutaa kagaifena katineayoe.” huno hie.
49Higeno Yisasia anakaifena “Naa higetana nagaifena natineayae? Nagaya Nenafa nopina aliya alisua yafe nenahaiye huna hua kea nohaviafio?” huno hie.
50Higeana agayama hia kea havilama ohunae.
51Havilama ohaageno Yisasia anakaiene tavino Nasaleti umaineno anakai ke haviteno akave malegeno itaamoa mukia humainea kavala alino aguafi malene.
52Malegeno Yisasia ala hutegeno kanale aku agesamoa ala higeno Anumaya Kotiene veamoyaene tusia muse hutenae.
