Luku 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Yisasia agaiaene tokaeya nemaiya anagafe mage huno hamapaiye nagola tusia monea hanea kanomoa ani afenomaale kava nehea aliya kanoamoa mainegeya nagoa vayala ayaamoya ani aliya kanomofe akavelaga ke huya mage hae “Kagai aliyate kava kanomoa mukia yakaa alino motale metale humaine” huya hae.

²Hageno moneama hanea kanomoa kava nehea aliya kanoamofena ke higeno egeno mage hie “Naane huya kagaifena nahanepaiye? Kagaila kava hisana tokiya ago kaminoafe kagaya hanaa huka kava humainane? Huyogiteka menahapaiyo. Nagoene kagaya mani aliyana oaligane.” huno humaine.

³Higeno ani aliya kanomona agu agesamoa mage hie “Aliyania nahafalegahe higi hanaa hisue? Hoya aliya alisua tokiyania omaleneanagina aukaya hisugenoa nagaye hugahianagina hanaa hisue?

⁴Hisua yafena menia nagesa havue. Ani kava humatesugeno aliyaniama nahafalesigeya anonaa ani vayamoya ‘Notifi emaiyo.’ huya hugahae.” huno havimaine.

⁵Nagoa ala kanoamoteti nofi humainaya veafe amahaote amahaote ke higeya ageno hagote kanomofena mage huno havige “Nagai kava kanomoa namagi ya nofila hugatene?” huno havige.

⁶Havigegeno mage hie “Nagaya vani hataletia (100) kalasini talamu nofila huanagi anonaa oaminoe.” huno higeno aliya kanoamoa mage hie “Anima kae-malenea autama ma hanegi ani vani hataletie (100) huno hanea avona ayehananeka fifitiae (50) huka kao.” huno hapaiye.

⁷Nago kanomofena mage hie “Nofima humainana yana namagi ali-mainane?” huno higeno “Vani hataletia (100) alaisi kula nofi huanagi anonaa oaminoe.” huno higeno aliya kanoamoa mage hie “Anima kae-malenea autama ma hanegi ani vani hataletia (100) ayehananeka eitiae (80) huka kao.” huno humaine. Ani kavama hia yamoa ma agesa havie “Haenagaa aliyaniama nahafalesigeya ani vayamoya mage hugahae ‘Notifi emaiyo.’ huya hisayafenagina naa kava hugahue.” huno hie.

⁸Ani musufaage aliya kanomoa agesa havi havi huno ani kava humainea yafe ala moneama hanea kanomoa mage hie “Kanale kagu kagesa hane.” huno humainegeno Yisasia mage huno hie “Ma mopale yafema muse nehaya veamoya mone alisaya yafe amakesa havi havi huteya aliyama aliyana hale yapi mainaya veala ago amakaseya amakesaene veane mainae.

⁹Nagaya tamakaitamige tamahanepauve tamakaya ma mopale monea alitama veamogami amamisageya nelamafuya maisagetama falisaya yupa ani monea hano hisigeno Anumaya Kotia maige maige hisaya nopina tamavaleno ali falu fala hulamategahie.

¹⁰Nagoa veamoya osi osi yate kanaleya huya yagaisayana ala yakefalela ania huya kanaleya huya yagaigahayanagi nagoa veamoya osi osi yatema kanaleya huya oyagaisayana ala yakefalela ania huya kanaleya huya oyagaigahae.

¹¹Tamakaya ma mopale monema kanaleya hutama kava oyagaisayana ikapinaga tama afenoyatema yagaisae huno otamamigahie.

¹²Tamakaya alu veamogami yatema kanaleya hutama kavama oyagaisayana tamakaitami afenona otamamigahie.

¹³Nagoke aliya kanomoa ‘Tole kava kanolatamogani aliya kanoania maisue.’ huno ohisie. Ania hisiana nagoke kava kanomofe ‘Haivaino naipa nagata aiya kano mainane.’ huno hugahianagi nago kava kanomofena ‘Nahaiya kano mainane.’ huno hugahie. Nago kava kanomona aipa amiteno nago kava kanomofe ‘Falote onahaiya kava hana kano mainane.’ huno hugahie. Tamakaya ania hutama Anumaya Kotienefe ma mopale mone fenoenefe ‘Ali lokaetana kava yagailateo.’ hutama hisayana haviya hugahie.” huno humaine.

¹⁴Falasia vayamoya ani kea haviteya mone fenofema nehamaiya yafena tusiya huya kigia nehuya kamuge hatageya vaitenae.

¹⁵Kigi hutayanagi Yisasia amakaifena mage hie “Tamakaya veamogami amaulagafina ‘Fatago anaga mainone.’ hutama nehayanagi Anumaya Kotia tamakupina ago agelama huno agemaine. Age-maineanagiya tamakaifema veamoya tamakeya ‘Tusia kanalenale kava nehae.’ huya nehaya kavafena Anumaya Koti aulagafina himanaage hia kava nehae.

¹⁶Mukia kanafina vayamoya Moseseene Anumaya Koti amaune vayaene humainaya kea haviyanagi Yonima falote humainea kanaleti aepa hena Anumaya Koti kava yagailamatesia kanale mono kea tamahapaugetama mukia veamogatama ‘Anumaya Kotia kava yagailatesie.’ hutama hugahe tamayamufa aitama tusi ya maitama nehae.

¹⁷Ikaene mopaene hano hugahianagi Anumaya Koti kema kae-malenaya kemoa nagoke kanoa afa ya kanala ohugahie.”

¹⁸Nago kanomoma aama neataleno alu ama alisiana kumai kava humaine. Nagi nago ama anauamoa atalesigenoma mainesia ama alu kanomoma alisayana ania huno kumai kava humaine.

¹⁹Nago kanoa tusia monea hanea kanomoa mukia kanafina kanalenale siotaaene kava vayamoya nehaya kava huno haesa kenaaene failino maineno kanalenale kavekeya neneane.

²⁰Neneanagino no fiamaalela nago kanoa afenomaa omale kanomona amumoa augafa alino hayagi-mainea kanoa mopale nemaiyane. Ani kanomo agia Lasalusie.

²¹Ani kanomoa agesa mage huno havimaine “Afenomaa hanea kanomo nea kavemo atupa-napaa yogina nesue.” huno huteno emainegeya kalayagamoya amutetila me haene haene humainae.

²²Naa hageno maineno haenagaa afenomaa omale kanoa faligeya ensole anagamoya mevaleya Apalahamu mainele motageno maine. Mainegeno moneama hanea kanoa ania huno faligeya aliya mo hevaitenae.

²³Mo hevaitageno haniki-mainea kumapi umaineno augafa agata tusiya huno aigeno maineno agesaga huno anafinaga ageana amuga aluafi Apalahamuene Lasalusiene mainaageno anakemaine.

²⁴Anaketeno mage huno ke hie “Vae Apalahamuga naginagomogae kagaya tusiya huka kahauna hunato. Kahau hunateka Lasalusina hutegeno eno aya aginagoleti tipina ayeteno navefunale malesigeno tani tani nahaisie. Nagaya tusia atafi mainogeno tusia nagata neaiye.” huno hie.

²⁵Hianagi Apalahamua mage huno hie “Nafanenimoga kagaya nayona mopalema kanaleya huka mainana kanafina mukia kanalenale yakaa ago ali-mainananagi Lasalusia mukia havi yamaage ali-maine. Ani yafe kagesamoa aikalo hinageka havio. Menia Lasalusia ma kumate egenoa aipamoa kanale huno yasi yasi higeno mainegeka kagaya kaugafa kagataenena mainane.

²⁶Nago yana tagaya mauna kaiyagaene tamakaya mainaya kaiyagaene amunotifina Anumaya Kotia tusia ayo omale komugefa kafi-maleneanagiya ma kumate mainaya veamoya tamakaitega visaya amakesa haviya usaga humaiya ougahae. Ania huya kagaiene mainaya veanea esaga humaiya ma kaiyaga omegahae.” huno hie.

²⁷Higeno ani kanomoa mage hie “Naginagomogae nagaya tusiya huna tutu hugatena kalagi neauve. Lasalusina hutesanageno nenafa notega visie.

²⁸Visigeya faefua (5) nagananimoya mainagena nagaya tusia nagata aiya kumate emainoafe kagaya Lasalusina hutegeno visiaamo ala kefiti mage huno hisie ‘Tamaipama aiyahae ohinutamahena nagayama mainoa kumatela egahae.’ huno hamapaisie.” huno hie.

²⁹Higeno Apalahamua mage hie “Amakaya Mosesea humainea kene Anumaya Koti amaune vayamogami kene hanegi ani kemona hapaliya havisae.” huno hie.

³⁰Higeno moneama hanea kanomoa mage hie “Aao, naginagomogae, Apalahamuga, nani kea ohavinayanagino nagola fali-mainea kanoma komufiti hetino amakaitega mo hamapaisigeya kefo yaamia ataleteya amakaye huya aigagiya Anumaya Kotina amakua amigahae.” huno hie.

³¹Higeno Apalahamua agaifena mage hie “Mosesema humainea kene Anumaya Koti amaune vayamoya humainaya kene amakupima omalenesayana nagola fali-mainea kanomoa komufitila hetino mo hamapaisiana ani kea haviya amakupina omalegahae.” huno humaine.