1Nago Sapati yupa Yisasia Falasia vayate kava humainea kanomo nopi kave mo nenegeya nagoa Falasia vayamoya Yisasina ageya mainae.
2Mainageno nagola augafa halegimai kanoa, faligahe nehia kanoa, anile maine.
3Mainegeno Yisasia ani kanoa ageteno ani nopi mainaya Falasia vayaene kahegi kema havilinaya vayaene mage huno hamavige “Sapati kanafina kaliamia alino kanale hutesia yana kanale yapi havi yane? Tamakai mono kemoa naane nehie?” huno hamavige.
4Hamavigegeya ani vayamoya nagola osi ke kanoa ohuya afaa mainageno Yisasia ani kali kanoa atafa hulineno kalia alino kanale huteteno atalegeno umaine.
5Vigeno Yisasia mage huno hamavige “Hana kanomoga Sapati kanafima nafanekafi pulumakafi komufima tavi-mainesigetama ‘Sapati yupae.’ hutama anifinaga atalesafi ifi aupaa amavayu hugahae?” huno hamavige.
6Hamavigegeya mukia vayamoya kenonaa kea ohuya mainae.
7“Kavema me neho.” huno ke higeya emainaya vayamoya “Ala kanomo nemaiya siale emaisune.” huyama nehaya kavala Yisasia ageteno ani kavama nehaya yafena mage huno hamapaiye.
8“Nago kanomoa kagaifema ‘Ala imulema eno.’ huno kema hinageka vinukahena ala kanomo nemaiya sialela uomaiyo. Havigu anile mainesanageno nago kanoa kagaseno mainesia ala kanomofe ke hinagenoma emainesigeno kava kanomoa kagaifena mage me hugahie ‘He-tio. Ala kanomo sialelagi kagaya omaiyo.’ huno hugatesigeka kagaye nehinageka akavelaga mo maigane.
10Nago kanomoma kagaifema ‘Ala kave meno.’ huno kema hinageka vinukahena osi kanomo mainesile mo maiyo. Mopale mainesanageno kagaifema ke humainesia kanomoa megagesiana hinagenoa mage huno hugahie ‘Nenafugae malela omaika neataleka ala kanomo siale haisaga humaika maiyo.’ huno hugategahie. Ani kema hisigeya mukia anile mainesaya veamoya kagai kagi alisaga hugahae.
11Nagoa veamoya ‘Ala vaya mainonanagita tagia alisaga hugahune.’ huya hisagenoa Anumaya Kotia ‘Afa vaya mainae.’ huno humategahigi nagoa veamoya ‘Tagia omale veane mainone.’ huya hisagenoa Anumaya Kotia ani veamogami amakia alisaga hugahie.” huno hie.
12“Kavela me neho.” huno ke humainea kanomofe Yisasia mage huno hie “Ala imuma kigahena mukia kameta negafuene kafukaganaene kagaika nofi vayaene moneamima hanesia veaneheke ‘Kave me nesae.’ huka kea hu oamato. Haenagaa kagaife ‘Kave meno.’ huya hisagekama mo nesanana anonakaa hai ali-mainane.
13Hai ali-mainanagi ala imuma kigahena maa veafe kea huo moneamima omale veanegi amaugafa haviya humai veanegi amaiya haviya humai veanegi amaulaga asu humai veanegi huka ke hisanageno Anumaya Kotia muse yana kamigahie. Ani veamoya anonaa kavekale kamisaya amakula omalenea yafe kagaya muse hisanageno fatago humainaya veanema fali-mainesafiti hetisaya kanafina Anumaya Kotia agaia anonakaa kamisigeka muse hugane.”
15Nago kanomoa Yisasiene maineno kave neneno Yisasi kea haviteno mage hie “Nagoa veamoya Anumaya Koti kava yagaisia kumate haiya maineya kavela neneya tusia muse hugahae.” huno hie.
16Higeno Yisasia mage huno hapaiye “Nago kanomoa ala imu kigahe mukia veaneyaga ‘Meneho.’ huno ke humaine.
17Ke humateteno imua ago kimaleteno aliya kanoamona hutegeno viayamo kema humatenea veanehe ‘Tamakaya eho. Mukia nesaya yana ago talo tala humalene.’ huno hamapai-maine.
18Hamapaigeya ani mukia veala nagoke nagokemoya mage hae ‘Tagaya ougahune.’ huya hae. Hageno nagoke kanomoa mage hie ‘Nagola hoya yaufa miya humalenoanagina mogegahe nehue. Museka nehugi nagaya ougahue.’ huno hie.
19Higeno nago kanomoa mage hie ‘Nagaya tenia (10) aliya alisia pulumaka miya humalenena nehuanagina kanale aliya nealifi agegahe neue. Museka nehugi nagaya ougahue.’ huno hie.
20Higeno nago kanomoa mage huno hie ‘Menia nagaya yaufa ania alitenoanagina museka nehugi nagaya ougahue.’ huno hie.
21Nage hageno eteno ani aliya kanomoa kava kanomona mo hapaigeno ani kava kanomona aipamoa haviya higeno aliya kanoamofe mage huno hapaiye ‘Kagaya aupaa eteka uka kumate mainaya veanegi moneamia omale veanegi aiya haviya humai veanegi aulaga asu humai veanegi aumiya haviya humai veanegi amavaleka eno.’ huno hie.
22Higeno ani aliya kanomoa ani kava huteno eteno mage huno kava kanomona me hapaiye ‘Kagai kavaya ali hipoya huanagi nagoa siale maisaya yana afaa hanegeno nokaafina hiyala ohune.’ huno hie.
23Higeno ala kanomoa aliya kanoahena mage huno hapaiye ‘Kagaya kumala neataleka ala katega neuka tala agegayalega nemaiya veanea ke huka amavayu huka amavaleka noniafina memategeya hiya hiho.
24Nagaya kahanepauve hagotena kema nehugeyama omenaya veanea mukiamoya menia kavela meliya onegahae.’ huno hie.” huno hamapaiye.
25Kasagoya veamoya Yisasiene nevageno maiyahae huno hamapaiye “Nagoa veamoya nagai nakavema egahena nefaene itaamoene aamoene nafaneamoene nepuamoene asaamoene aganaamofeenena ‘Afa vaya mainagi Yisasia tamakase-mainea yafe nagua aminoa kano mainoe.’ huno ohisia kanomoa nagai kea havino akave omale kano maine.
26‘Kanaleya huna maisua nahaimula afa ya hanegi Yisasia agasemai kanogina nagua aminoe.’ huno ohisia kanomoa nagai kea havino akave omale kano maine.
27Nagaila nagatama aisigena falisua yafema nago kanomoa ‘Ani kava hugahue.’ huno agaia yafaga yosa kofino nakave visia agesa ohavisia kanomoa nagai kea havino akave omale kano maine.
28Tamakaipiti nago kanomoga ‘Ala nokefa kigahue.’ kagesa havinukahena hagoteka ‘Ani nonia kina avaya ayesua monenia hanefi?’ huka kagesa havi havi hugane. ‘Mukia kisua monea hane.’ huteka ani nona aepa heka kigane.
29Hagotekama naa ohinuka aepa heka amalagu aiteka posia ayesanageno monekaa hano hisigeka ani no kika avaya ayesana amukoka omalesigeya mukia agesaya veamoya kigika hugateya ‘Ma kanomoa nona aepa heno kianagi ani nona hivi huno ki hano hisia amukoa omalene.’ huya hugahae.
31Nagi nagola sauve kanomoa ‘Nago sauve kanoenema aepa hena tu hugahue.’ huno agesama havinunofena hagoteno mage huno agesa havisie ‘Nagaya teni tausenia (10,000) ati vayania mainagi nago sauve kanomoa tueti tausenia (20,000) ati vayaa mainayanagina tuma hisua himamunia haneo?’ huno agesa havigahie.
32Agesa haviteno ‘Aao tuma hisua himamunia omalene.’ hunoma hinunofena agaiene tuma hisaya vayamoya ayaayate mainesageno nagoa vayala humateno mage huno hugahie ‘Mage hutama mo havigeho ‘Hanaa hutaa taaipa ali falu hutaa maisue.’ hutama mo havigeho.’ huno hamapaisigeya mo havigegahae.
33Mo havigegahagi tamakaipitila nagoa veamoya mukia yaamima amakaveno hu oatesayana nagai kea ohavi veane maigahae.”
34Tamakaya havilinae solea kanale ya haneanagi hagama nehia yamaa hanoma hisigetama hanaa hutama hagama nehia yamaa ali falote hugahae?
35Hagama nehia yamaa omalesiana afa ya hanegi afumo aifaene aliya ituyaene hoyafi malesayana afovaage ohugahigi veamoya afaa hagayu hutalegahae. Tamakesama hanesiana havilama hutama haviho.
