Luku 2:10-27

¹⁰Dopa piaminopa enjele dokome dokaita lamaiyoo, “Nyakama paka nakayalapape! Nambame wai pii epe mende minao nyakama langya epelyona salapape! Wai pii epe dokome endakali pitakanya mona etete yaepaseta.

¹¹Indupa kuka gii dakepa enda mendeme Dapitinya taono dokonya nyakamanya Pyoo Nyingi Akali doko mandipilyamo. Baa Kataisa. Baa Kamongo doko.

¹²Wane doko dapa petae silyamona, nyakamame kandatala baa lamo lao masalamino. Endangi dokome wane doko lapalapa mendeme ambo pyapala mena pulumakawanya nee nenge tapoko mendenya palelyamona kutao pao kanjaminona,” lea-pyaa.

¹³Enjele dokome dopa lateamopa dee kaitinya enjele kambu etete andake mendeme yapa ipao baa-pipa tole katapala dokaitame dapa lao Gote tama pyoo wee leami-pyaa:

¹⁴“Gote kaitinya katenge doko lao tama pilyamanona pyepape! Baame isa endakali dupa etete auu kayao masilyamona, nyakama mona lyuu lao kalyepape!” lao wee leami-pyaa.

¹⁵Dopa latala kaiti-kisa pateaminopa, sipisipi setao katenge akali dupame lao pituu, “Mende pyomo lao Kamongome naima langyomo doko Beteleme dokonya yapa kanja muaa,” lao mende lamai lamai piami-pyaa.

¹⁶Dopa petala dupame Beteleme dokonya yapa pupala Matia Josepepa dolapopi dee wane doko mena pulumakawanya nee nenge tapoko mendenya siamo dokopi dutupa kutao pao kandeami-pyaa.

¹⁷Dupame kandatala enjele dokome wane dokonya lao pii lamaiyamo siamino dupa lao paneami-pyaa.

¹⁸Lao paneaminopa pii doko siamino endakali dupa pitaka mona andeami-pyaa.

¹⁹Dopaka doko, Matiame sepala pii dutupa pitaka baanya monanya nene yapao masoo petea-pyaa.

²⁰Wamba enjele dokome akali mena sipisipi setao katenge dutupa kandao lamaiyamoli pyoo angi kandatala siamino dupapi kandeamino dupapi dutupa pitaka lao masetala Gote lao lalyoo tama pyoo pilyiami-pyaa.

²¹Koto gii tukulapo dokonya wane dokonya elya pingi kambu kepakamaipenge gii doko epea-pyaa. Dokopa wane dokonya elya pingi kambu kepatakamaitala wane doko kenge Jisasa leami-pyaa. Wamba Matianya inginya wane napeteamopa enjele mendeme kenge lena leamo dokoaka leami-pyaa.

²²Kamongonya mana setapae dupanya dapa lao pepa pyapae singi-pyaa: “Enda mendeme wane mupa doko ane mende mandea kandeno doko, Kamongo dokonyana lao manjepape!” latae singi-pyaa. Dopa lapae singili pyoo Jisasanya endangi takangepame Kamongome mana setapae Mosese maiyamo dupa watao minao wane endangipa dolaponya kaimala pipae walya pyao nepala pupenge gii doko epeamopa, dolapome wane Jisasa doko Kamongo doko maiyanya mandyuu Jetusaleme yuu dokonya peambi-pyaa.

²⁴Dee Kamongonya mana setapae dupanya dapa lapae singi-pyaa: “Yaka imi lapoma maiyepape! Daa tamo kandao doko, yaka maileo yakane mendalapo maiyepape!” lapae singi-pyaa. Dopa lapae singiliaka pyoo dolapome Kamongo lao tama pyoo epe mendalapo kundi joo maiyanyaka peambi-pyaa.

²⁵Gii dokopa akali Simione lenge mende Jetusaleme yuu dokonya katea-pyaa. Baa akali epe tolatae joo katao Gote lao tama pyoo katenge-pyaa. Akali mendeme Isataele endakali dupa mona yaepasoo kii tamao nyala ipatana lao malisoo katelyamopa Oli Sipitisa doko baa-kisa katenge-pyaa.

²⁶Oli Sipitisa dokome wambao Simione doko kandao dapa lamaiya-pyaa: “Emba yapa kumala nayate. Kamongo dokonya Kataisa doko kandatala kumatena,” lea-pyaa.

²⁷Yuu mende Oli Sipitisa dokome akali Simione dokonya mona sakatasiamopa baa losuu anda andake dokonya pea-pyaa. Gii dokopa Jisasanya endangi takangepame Kamongonya mana seteamoli pyoo losuu anda andake dokonya wane doko mandyuu peambiaka-pyaa.