Luku 22:3-32

³Ana nehzageno, Jisasima amage'manentaza 12fu'a disaipol nagapinti, mago zmimofo Judasinku, Iskarioti'e nehaza ne' agu'afi Sata'a ufrene.

⁴Hagi ana ne'mo prisi vahe'ene, ra mono nonte kegva nehaza vahe'mokizmi kva vahetaminte vuno, Jisasima komoru huno avare zamisige'za ahesaza kea ome retro hu'naze.

⁵Zamagra muse nehu'za, mago zmarimpa hu'za zgo amisaza naneke hu'naze.

⁶Judasi'a mago rimpa ana kerera huteno, Jisasima Agraku mni'nenigeno, komoru huno avrezamisia kankamunku hakre'ne.

⁷Anantera zo'ore bretima nenaza kna ege'za, ese knazupa sipisipi anenta ahe'za kre sramna (Pasova) nevaza kna fore hu'ne.

⁸Anante Jisasi'a Pitane Jonigizni amanage huno huznante'ne, Isareli vahe Anumzamo ozmahe zmagaterenea zanku antahimiza nenaza ne'za retro hinketa ome namneno.

⁹Zanagra anage hu'na'e, inante ome retro hanu'egu nehane? huke hakeno,

¹⁰Jisasi'a anage huno znasami'ne, tanagra rankumapi ufresakeno'a, mago ne'mo kavofi tina afino afunte nevnigetna ome kesnutna, avaririta umarerisia nompi ufre'o.

¹¹Ana nomofo nefana anage huta asami'o, Rempi hurami ne'mo'a anage kagrikura hu'ne. Anumzamo Israeli vahe ozmahe zamagatere'negu zmagesa antahimiza nenaza ne'zana, inantega namage nentaza disaipol nagani'anena negahune hune huta ome asami'o?

¹²Anagema hanakeno'a, agofetu nomofona, ra kankamu hunaragintenefinka ko retro hunteneakino, tanaveri hanigeta, anante nezana retro hugaha'e.

¹³Higene znagra vune ome ka'ana, kehiaza huno makazana fore higene, ana nezana ome retro hu'na'e.

¹⁴Ana ne'za nesnaza kna egeno, Jisasi'ene aposol nagamo'za, ne'za nenaku trate zmaza tununte magopi mani'naze.

¹⁵Anante anage huno zmasami'ne, Nagra knazampina uofrenena, Anumzamo ozmaheno zmagaterenea zanku antahimiza nenaza ne'za tamagrane nesuazankura tusiza huno navesie.

¹⁶Na'ankure Nagra anage hu'na neramasamue, Nagra mago'ene amanahu ne'za onenesugeno, henka Anumzamofo Kumapi avufa'a fore hugahie.

¹⁷Anagema huteno, waini ti me'nea kapu erino Anumzamofo susu hunteteno, anage huno hu'ne,

¹⁸ama'i waini tina eriomi ami hutma magopinti neho. Na'ankure Nagra anage huna neramasamue, Nagra magore hu'na waini tina onena maninenugeno, Anumzamofo Kumara egahie.

¹⁹Hagi Jisasi'a bretima erino Anumzamofo susu hunteteno korino nezamino anage hu'ne. Ama'i Nagri navufa tamagrikure huno tami'neanki, nenesutma tamagesa antahinamiho.

²⁰Ne'zama netageno'a, anahukna huno kapu erino anage huno zamasmi'ne, ama'i korani'afi kasefa huvempage hagerafita maninunku tamagritera tagitroe.

²¹Hu'neanagi keho, komoru huno ha' vahe zmazampi navrentesnia ne'mo, nagrane magote mni'neno neza nene.

²²Tamage hu'na neramasamue, Anumzamo hu'nea kante anteno, Vahe'mofo Mofavre'mofontera fore hugahianagi, ha' vahe vahe'mofo zmazampima avrentesimofona, nasunku huntoe!

²³Anage hige'za zamagra zamagra ontahige antahige hu'za, iza e'inahu'zana hu'naku higeno nehie? hu'za hu'naze.

²⁴Jisasima amage'ma nentaza disaipol nagamo'za, zamagra zamagra kehakare hu'za, i'za amu'nontifina ra vahera manigahie hu'za nehazageno,

²⁵Jisasi'a anage huno zmasami'ne, megi'a vahe'mokizmi kinimo'za zmagra'a vahe'a kegva krineza huzmantaza kea amage'nentaze. Hankve kva mni'noe haza vahe'mo'za, maka vahe'mokizmi rone mani'none hu'za nehaze.

²⁶Hianagi tamagra anara osugahaze. Hanki mago'moma rama amu'nontamifima mni'naku hanimo'a, osi'tfa maniho. Kva vahe maniku amu'nontamifi hanimo'a, eri'za vahetami manigahie.

²⁷Hanki i'za rankvama manigahie. Nezane trate aza tununte maninemopi? Nezama retroma nehimo'e? Hianagi tamagri amu'nompina, Nagra ne'zama refkoma nehia vahekna hu'na mani'noe.

²⁸Miko knazama e'nerugeta, tamagra nonatraze.

²⁹Nenfama kuma'ama nami'neaza hu'na, Anumzamofo kumara neramuankita,

³⁰anahukna hutma tamagra Nagri kumapina, Nagrane kini trate maninetma, tine nezane nenetma, Israeli vahe'mokizmi 12fu'a naga nofimofona kini trate maninetma refko huzmantegahaze.

³¹Saimonivoe Saimonivoe, Kagra antahio, witi rgamofo anoma'a hareankna huno Sata'a regaheno kenaku nehie.

³²Hianagi Saimoniga kagrikura nunamu hugantenoankino, kamentintimo'a evu oramigahie. Hanki henkama rukrahe'ma hanunka, kagra kafuhe'ina zamazeri hanavetio.