Luke 1:34-40

³⁴Mary-el antyerl ayernew, “Aleyak ayeng, akwerrp-antey. Nthakenh atha ampa akely atnyeneman?”

³⁵Antyerlan ikwer angkew, “Inweng Mwerr-angker irrwerl-arenyan ngkweng-warl apetyeyenh, rap ngenh kwenpayel-apeny arteyenh. Awey akely renh atnyenentyel, akngerrelanap renh Alerikw Akngey-wenh ileyenh.

³⁶Ntwa arelhampw Elizabeth iterl-areyel. Ingwer-rnem alakenh angkerrenh, ‘Elizabeth-el nthakenh ampa akely atnyeney-angenh, arrangkw!’ Ranap mpwelheyel-anemarl. Alkent irrpety-penhel ra awey akely atnyeneyenh.

³⁷Inngarlap ra! Akngeyel ilek-ilek anthey-angker!” Alakenh-anyem antyerl angkew Mary-ew.

³⁸Mary-an antyerlew angkew, “Inngarlap alakenhan, ngarl atyeng angkeyel. Ayengan Akngeyewant-anem aneyenh. Ayengan ikwer mpwelheyew, Ingkartel ampa akely atyeng antheyew-atety.” Antyerlan alpew-anem, Mary-an iwerlelpew-anem.

³⁹Ikwer-penhan ingwer-ingwer Mary-el apmer ikwerenh iwerl-alhew, Elizabeth arerl-alpeyew. Rap anamerl-antey apmer akely ikwer-warl alhew apwert ilkwangketyarr-warl, Judea-ampeny-itwew.

⁴⁰Rap Zechariah-wenh apmer-warl alhew, Elizabeth-ew arlkew-anem. Rap kwen aylpenhew, Elizabeth-anem atnyeney-alheyew.