Luke 13:30-35

³⁰Ke sokudi ri pu mumudi kamahire, si kote tava kekenu, ba arini pu kekenu kamahire, si kote tava mumudi,” gua se Zisu.

³¹Meke pa totoso tugo asa si mae zama ia ri kaiqa Parese se Zisu, meke zama guahe si arini, “Mu ture taloa si Agoi, Mu rizu la pa kaiqa votiki vasina, sina korapa hiva va mate igo e Herodi,” gua si arini.

³²Ba olaṉa se Zisu, “Mi la tozi nia sa tie sekesekeina sana, sapu Arau si hipuru palae tomate kaleadi, meke salaṉa tie Qua ṉinoroi, meke vugo, meke pa rane vina ṉeta si kote tiqe va hokotia Rau sa Qua tinavete.

³³Ba leana, maqu ene la si Rau ṉinoroi, vugo, meke repere, sina lopu toṉoto pude tava mate sa poropita pa keke votiki vasina, ba kaqu pa Zerusalema mo.

³⁴Kei, gamu kasa na tinoni pa Zerusalema, gamu pu va matedi sari na poropita, meke gona ni patu saripu garunu atu ni sa Tamasa koa gamu! Soku totoso si ele podekia Rau pude varigara ni gamu koa Rau, guana kokorako pu va aqori sari na tuna pa kauru tatapuruna, ba koromia si gamu.

³⁵Gua ke kote ta huara sa mia Zelepade. Tozi va hinokarani gamu Rau sapu lopu kaqu hite dogoro Au gamu si Rau, osolae kaqu kamo tu sa totoso sapu kote zama si gamu, ‘Tamanae si Asa pu mae pa korapa pozana sa Baṉara,’ ” gua si Asa.