Lukas 7:19-30

¹⁹Doya amu Johanes nug nuhiḵud ip̱uniṯak awak danab aḏit onilahp̱a e, gumidya doeh, a goya Jesus inam oḏ meṯaglahnu aum. “Danab laa uḏiḵunu aeg doomut am na aaḵute o iiṯa ig laate ameg meḵunig?” Nug anam amelahp̱a anana, nug he gopiḏ.

²⁰Anam a amu danab aḏit amu Jesus gumidya goya, a apiḏ. “Layaṯak Johanes nug he, i na oḏ meṯagnihnu gumidḏa uḏimuḏ. Oḏ mak am inam. Danab laa uḏiḵunu aeg doomut am na aaḵute o iiṯa, ig laate ameg meḵunig?” aoya apiḏ.

²¹Haen amup̱anab Jesus Nug danab ah kuḏum ag oḏe diigdiig ele amu he ena daaegeg, Nug ouḏi nau kuḏum lamaṯaṯa, ameg gaḏuak kuḏum Nug he, ag amelag op̱ate ag neegp̱ig.

²²Amunu Jesus Nug ahilah nai amu eḏua nob ma amelahp̱a aum. “A goya, keeke oh gemu a anidya doopiḏ, aaḵude Johanes apeḏ doyaḏ! ‘Danab ag amelag gaḏuak amu gemu ag eḏun neegṯeb. Diḏilag aḏak amu ag ena oiṯeb. Amu gaḏalag oḏe ele amu oḏe amu iiṯa meṯe, daulag ituak ele ag eḏun, nai dooṯeb, danab mauhp̱ig ele amu ag eḏun bau daaṯeb, daḏek danab ag ele Nai Ena dooṯeb.’

²³Amu danab aun nug nuhig oop̱a genab doyak dahilnu ii paḏe neṯe ele amu, Kayak Nug danab amu itiṯak medaṯe,” awa aum.

²⁴Am danab aḏit Johanesnu nai aoya uḏipiḏ ele amu, a eḏuya uḵaeheh, Jesus Nug Johanesnu danab ah amelagp̱a inam aum. “Ag anuḵa ag Johanes gumidna atu taḏakp̱a gop̱ig amu ag aḏi keeke anidḵulagnu gop̱ig? Ag keeke gai iiṯa, qaiṯobṯob bia, ulah he uḏalṯe amu anidḵulagnu gop̱igte?

²⁵Iiṯa, ag gop̱ig am aḏi keeke anidḵulagnu gop̱ig? Ag gona danab laa lamen enanagnab, kobol ele taḵom amu anidḵulagnu gop̱igte? Iiṯa. Danab ag lamen enanagnab, kobol ele tagaṯeb amu ag king laugp̱a daaṯeb.

²⁶Amge ag aḏi keeke anidḵulagnu gop̱ig? Ag propet laa anidḵulagnu gop̱igte? Da ag amelagp̱a aṯem, ao, ag am propet anidḵulagnu gop̱ig. Nug am propet amge propetib iiṯa. Nug amu propet laa oh eḏaṯak.

²⁷Nug am laa, Kayak Nug nuhignu a, propet laa nug Kayak oḏe awa, Kayak naip̱a yom daaṯe. Nai am inam. ‘Anṯe! Da hep̱i, dahil nai awa uḵa maṯiaknu danab laa nug na noom awa, nahip ib bap̱aidḵu.’”

²⁸Jesus Nug anam awowa, Nug nai tuḏiṯa aum. “Da ag amelagp̱a aṯem. Layaṯak Johanes nug danab anuḵa propet daap̱ig amu oh eḏaṯom amge danab laa nug Kayaknu ḏo maḏoḏ oop̱a danab nakokib daaṯe, nug nuhig itiṯak amu Johanesnu eḏidṯe.

²⁹Danab ah oh am takis awak danab ele ag Johanesnu nai doop̱ig amunu ag, ‘Kayak Nug tutuḵuib heṯe,’ aon anana, ag Johanes ep̱egp̱a layaṯak aop̱ig.

³⁰Amge Juda dilag ḏo mehuqak danab amu ḏo gumak danab-Parasia ele ag amu ag Kayak Nug ib ena ipuanaṯom amu ag uun, di meṯaeg, Johanes nug ag ii layaṯom,” awa aum.