Lukas 3:2-30

²Be ngan rai toa oa pade, Anas ga Kaiapas timan madidnga kapeipei tenainga ad. Be tutui ngan taun toaiua, Deo ele posanga iuot pan Sekaraia inat Ioanes toa imamado ngan tibur modamodanga.

³Tota ila ngan tibur toa ngada oa boloma ngan eau Iordan ta ipaola posanga pagid ipom ngan gid manta tipul lolod ga tibada paliliunga, ta Deo isamum led kadonga sasat.

⁴Kadonga toa ne iuot lalaede mambe laulau ton Aisaia, eaba toa ibada Deo iaoa mugaeai ikeo ngan ga bedane, “Ngan tibur modamodanga, eaba ede ipotalae ta ikeo ga, ‘Manta asaoa Maron ele edap ga apatutui kemi!

⁵Gid bereo toa ngada oa, manta aket gid ga tisulug, ta apaon gid baba dubuiai. Be gid edap ikonggekongge, manta apatutui, ga edap isaoa idio ga idae, manta aris ga iuot kemi.

⁶Tota gid panua toa ngada ne ga tigera saoa danga Deo ikado ngan badanga gid mulian.’”

⁷Be Ioanes ikado posanga ga ila pagid panua toa tinam pan ngan badanga paliliunga ta ikeo, “Gimi mota ele gergeu! Sai ipabib lemi ta aoangga abada paliliunga sapaean ta aeaoa ngan Deo ele kadonga lolo bake aea toa teta pade ga iuot? Irangrang ngan akado toa bedaoa mao.

⁸Tota oangga apul lolomi, manta apatutui lemi kadonga pade, ta ipasolan mambe gimi apul lolomi tautaunga. Be kado apakaka gimi mulian ta aoangga gimi iaoa kelede pan Abraam, ta ngan ipu toaine Deo ga ipanas gimi mao. Eine mao. Ngansa gau nakeo pagimi, Deo irangrang ngan ikado gid patpat toa ne ga tiuot iaoa kelede pan Abraam.

⁹Be kabasi ienono motean abei ipuiai. Ta abei isaoa toa itautau kemikemi mao, eine ga iged ta itado ga idae dingaeai.”

¹⁰Idio ta gid ipom tibeta ei bedane, “Be gai ga akado mado?”

¹¹Ta ikoli led posanga bedane, “Oangga sai aea barikia rua, manta ipan iuae ede pade, toa ei aea mao. Be oangga sai aea annga ienono, manta ikado toa bedaoa pade.”

¹²Be gid panua takis ad pade tinam ngan badanga paliliunga ta tikeo, “Eaba paoatainga am, gai ga akado mado?”

¹³Ta ikeo ga, “Irangrang ngan adada sapaean gid panua led pat mao. Be manta abada pat ianun isaoa gid madidnga tikeo pagimi ngan.”

¹⁴Be gid panua paraunga ad pade tibeta ei bedane, “Be gai ga akado mado?” Ta ikeo pagid, “Irangrang ngan apamataud gid panua ngan badanga sapaean led pat mao ga apamadid gid ngan posanga sapaean mao pade. Be saoa olnga toa gimi abada, manta lolomi kelede ngan.”

¹⁵Be panua toa ngada oa lolod iminmin ngan Deo ibada gid mulian ad isat bagedeai ta tigaga matad alele. Be lolod ede ga ede ngan Ioanes ta tikeo lolodeai bedane, “Kado eaba toa ne eine Kristus?”

¹⁶Ta Ioanes ikoli panua toa ngada oa led posanga bedane, “Gau napaliliu gimi ngan eau, be eaba ede inam muriai ngan gau, ei iura kapei ngan gau. Ei iasal gau tau, ta irangrang ngan nalua ei ngan ele su aea polanga mao. Ei ga ipaliliu gimi ngan Itautau Tutui ga dinga.

¹⁷Ei mambe eaba ikisi ele duduinga kapei, ta ilelean sakirkir toa ngada oa ienono ngan wit. Ei ga isuk gid wit itautau ta idol ngan ele luma wit aea. Be wit aea sakirkir, ei ga itado ga idae dingaeai. Dinga toa oa irangrang ngan imate mao.”

¹⁸Be Ioanes idada gid ipom lolod ngan posanga padengada busa, ta ipapaola Deo ele ato kemi pagid.

¹⁹Be Ioanes idaba madidnga kapei Erot, ngansa ei iuai ele kadenge Erodias ga ikado kadonga sasat padengada.

²⁰Tota gadae ngan gid kadonga sasat toa ne, Erot ikado kadonga sat ede pade ga bedane: Idol Ioanes ga idudunga ngan luma panasnga aea.

²¹Be ngan taun toaiua gid ipom tibabada paliliunga pan Ioanes maitne, Iesus pade inam ta ibada paliliunga. Ei irararing, be bubur ipokakai,

²²ta Itautau Tutui ipul ei ga iuot mambe man barur ta isulug ga inam pan. Be babanga ede isulug buburiai ga inam ta ikeo, “Eao gau Natug. Gau nakim go tau. Tinig igelgel ngan eao.”

²³Iesus aea rai mambe sangaul tol ngan ado toaiua ipei ele naurata. Gid panua tiuangga ei Iosep inat. Be Iosep ei Eli inat.

²⁴Eli ei Matat inat. Matat ei Livai inat. Livai ei Melki inat. Melki ei Ianai inat. Ianai ei Iosep inat.

²⁵Iosep ei Matatias inat. Matatias ei Amos inat. Amos ei Naum inat. Naum ei Esli inat. Esli ei Nagai inat.

²⁶Nagai ei Mat inat. Mat ei Matatias inat. Matatias ei Semen inat. Semen ei Iosek inat. Iosek ei Ioda inat.

²⁷Ioda ei Ioanan inat. Ioanan ei Resa inat. Resa ei Serubabel inat. Serubabel ei Sealtiel inat. Sealtiel ei Neri inat.

²⁸Neri ei Melki inat. Melki ei Adi inat. Adi ei Kosam inat. Kosam ei Elmadam inat. Elmadam ei Er inat.

²⁹Er ei Iosua inat. Iosua ei Elieser inat. Elieser ei Iorim inat. Iorim ei Matat inat. Matat ei Livai inat.

³⁰Livai ei Simeon inat. Simeon ei Iuda inat. Iuda ei Iosep inat. Iosep ei Ionam inat. Ionam ei Eliakim inat.