Luk 3:2-30

²aan Anas ni Kayafas mu ye Uwumbɔr aatotoorninkpiib na, n‑yoonn ngbaan le Jɔnn u ye Sekaria aajapɔɔn na nan bi nteersakpiin ni. Le Uwumbɔr len u chee tibɔr nima.

³Le u bɔ dii Jɔɔdann aamɔɔl aatingbaan ni, ki mooni ke, “Kpeln nimi aabimbin man, aan m muin nimi nnyun ni, le Uwumbɔr ga di cha nimi aatunwanbir pinn nimi.”

⁴Waah ŋa kina na, le ni gbiin Uwumbɔr aabɔnabr Aisaya aah nan ŋmee pu Uwumbɔr Aagbaŋ ni na ke, “Unii ubaa bi nteersakpiin ni ki tar, ‘Toor Uwumbɔr aasan man ki ŋa waasan mu li tok ki tii u.

⁵Bi ga di titan gbiin tifatann mɔmɔk, ki ber ŋijoo ni ŋigongon mɔmɔk lii taab, ki naar isan imɔk gɔr na, ki ŋa isan imɔk kaa joon na, i li joon tii u.

⁶Binib mɔmɔk ga kan Uwumbɔr aah ga gaa bi lii pu na.’”

⁷Le kinipaak nan dan Jɔnn chee, ki ban ke u muin bi nnyun ni. Le u baa bi, “Nimi ijagen aabim, ŋma sur nimi ke ni nya ntafadaan mu choo na ni?

⁸Ni li tun lituln li ga mɔk ke ni sil kpeln nimi aabimbin na, ki taa bui ke niyaaja aah ye Abraham na, nima le ga cha ni nyan ntafadaan ni. M tuk nimi la, Uwumbɔr ga ŋmaa di ŋitakpal ŋimina kpaln Abraham aayaabitiib.

⁹Dandana wee Uwumbɔr toor kichɔk ke u ti gaa isui imɔk kaa lu ŋisubil ŋi ŋan na, ki di ŋa mmii ni.”

¹⁰Le kinipaak ngbaan baa u, “Kina kan, ti ga ŋa kinye?”

¹¹Le u bui bi, “Unii u kpa ŋibɔkul ŋilee na, u tii unii u kaa kpa libaa na. Unii u mu kpa tijikaar na, u yakr tii unii u kaa kpa na.”

¹²Bilampoogaab mu nan dan u chee, ki ban ke u muin bi nnyun ni, le ki baa u, “Umɔmɔkr, ti mu ga ŋa kinye?”

¹³Le u bui bi, “Ni taa gaa ŋimombil ki jer baah siin nimi pu na.”

¹⁴Le butɔb aajab mu baa u, “Ti mu ga ŋa kinye?” Le u bui bi, “Ni taa gaa unii ubaa aamombil mpɔɔn man, ki taa galn unii u kaa kpa taani na. Cha ninimbil gbiin nimi aapal.”

¹⁵Jɔnn pu, le binib aalandak fii. Bi mɔmɔk baa bisui ni ke, “U ye Kristo u ga gaa timi lii na aan waa ye?”

¹⁶Le Jɔnn bui bi mɔmɔk, “Mma muin nimi nnyun ni la. Tɔ, unii u jer mi na mu choo. Maa ŋeer ke m gbiln waanaatak aaŋmin ki tii u. Uma le ga muin nimi Uwumbɔr Aafuur Nyaan, ni mmii ni.

¹⁷U joo waayikpimbik uŋaal ni, u ti chaar waajikaar, ki di njikaabim ŋa lipil ni, ki di tigbengbir see mmii mu kaan junn na ni.”

¹⁸Kina le Jɔnn nan sur binib ngbaan, ki di ŋimɔbon aabɔŋ kpee ki sur bi, ki mooni tibɔnyaan ngbaan.

¹⁹U nan sur Ubɔr Herod mu. Herod nan gaa unaal aapuu Herodias, ki ki tun titunwanbir sakpen ki kpee. Nima le cha Jɔnn nan sur u.

²⁰Le Herod ki tun titunwanbir tiken ki kpee, ki chuu Jɔnn laŋ kiyondiik ni.

²¹Jɔnn aah nan muin binib nnyun ni na, le u muin Yesu mu nnyun ni. Le Yesu mee Uwumbɔr. Waah bi mee Uwumbɔr na, le kitaapaak chuu piir.

²²Le Uwumbɔr Aafuur Nyaan sunn ni, ki nan tɔŋ u pu, ki naahn linanjel. Le nneel nyan ni paacham ki len, “Aa ye Njapɔɔn u m gee si na la. Nnimbil gbiin si.”

²³Buyoonn Yesu naahn ke waah ŋa ŋibin piitaa aanii na, le u piin ki tuk binib Uwumbɔr aabɔr. Binib nan dak ke u ye Josef aajapɔɔn la. Josef nan ye Heli aajapɔɔn,

²⁴Heli mu nan ye Matat aajapɔɔn, Matat mu nan ye Liifai aajapɔɔn, Liifai mu nan ye Melki aajapɔɔn, Melki mu nan ye Janai aajapɔɔn, Janai mu nan ye Josef aajapɔɔn,

²⁵Josef mu nan ye Matatias aajapɔɔn, Matatias mu nan ye Amos aajapɔɔn, Amos mu nan ye Nahum aajapɔɔn, Nahum mu nan ye Esli aajapɔɔn, Esli mu nan ye Nagai aajapɔɔn,

²⁶Nagai mu nan ye Maaf aajapɔɔn, Maaf mu nan ye Matatias aajapɔɔn, Matatias mu nan ye Semeinn aajapɔɔn, Semeinn mu nan ye Josek aajapɔɔn, Josek mu nan ye Joda aajapɔɔn,

²⁷Joda mu nan ye Joanann aajapɔɔn, Joanann mu nan ye Resa aajapɔɔn, Resa mu nan ye Serubabel aajapɔɔn, Serubabel mu nan ye Sealtiel aajapɔɔn, Sealtiel mu nan ye Neri aajapɔɔn,

²⁸Neri mu nan ye Melki aajapɔɔn, Melki mu nan ye Adi aajapɔɔn, Adi mu nan ye Kosam aajapɔɔn, Kosam mu nan ye Elmadam aajapɔɔn, Elmadam mu nan ye Er aajapɔɔn,

²⁹Er mu nan ye Josua aajapɔɔn, Josua mu nan ye Elieser aajapɔɔn, Elieser mu nan ye Jorim aajapɔɔn, Jorim mu nan ye Matat aajapɔɔn, Matat mu nan ye Liifai aajapɔɔn,

³⁰Liifai mu nan ye Simeonn aajapɔɔn, Simeonn mu nan ye Juda aajapɔɔn, Juda mu nan ye Josef aajapɔɔn, Josef mu nan ye Jonam aajapɔɔn, Jonam mu nan ye Eliakim aajapɔɔn,