Luka 3:2-30

²Anasi na Kaifasi mbali akulu aanyantsembe. Ndi caka ceneco cidalonga Mbuya n'thando kuna Juwau mwana Zakariya.

³Juwau afamba cisa consene dhuzi na nyanza ya Djorodani, mbakhamwaza mphangwa izi: “Tambirani batixmu, ninga cidzindikiro ca kuchunyuka toera kulekererwa kudawa.”

⁴Ipi pyacitika ninga mudapilembera mporofeta Izaiya m'bukhu mwace mbalonga tenepa: “Alipo anakhuwa n'thando kuti: ‘Sasanyirani njira toera Mbuya apite nayo. Nfungulireni miseu ya kulungama.

⁵Magowa onsene anatutirwa. Mapiri na nthunda zonsene zinazerezwa. Miseu ya magurayi inalungamiswa, njira za makolong'ondo zinazerezwa.

⁶Anthu onsene anati aone kupulumusa kwa Mulungu.’”

⁷Juwau akhapanga mwinji wa anthu ukhabwera katambira Batixmu kuna iye, mbalonga tenepa: “Dzindza ya nyoka! Mbani akupangani kuti muthawe nyatwa zinafuna kudza?

⁸Citani pinthu pinapangiza kuti imwe mwachunyukadi. Lekani kunyerezera mbamulonga mwekhene m'bodzi na m'bodzi kuti: ‘Ife ndife ana a dzindza ya Abharaamu.’ Thangwi ine ndisakupangani kuti Mulungu ana mphambvu za kusanduza myala iyi, kuti ikhale ana a dzindza ya Abharaamu!

⁹Mbadzo yamala kusasanyirwa toera kugwanda nayo miti na michici ene. Na tenepo, muti onsene unakhonda kubala misapu yadidi, unagwandiwa mbuponyiwa pa moto.”

¹⁰Penepo mbumba ikhabvundzisa Juwau Bhatixta mbilonga kuti: “Mphapo tisatongwa ticitenji?”

¹¹Apo Juwau aatawira tenepa: “Ana nguwo ziwiri, mbapasembo ibodzi ndzace adaisowa. Pontho ule ana ca kudya mbagawirane na ule adasowa ca kudya.”

¹²Penepo, anango anyakukumbusa misonkho afikambo kuna Juwau toera kutambira batixmu, mbambvundza kuti: “Mpfundzisi, ndi ninji pinatongwa ife kucita?”

¹³Juwau aatawira tenepa: “Kumbusani ntengo unalonga mwambo basi.”

¹⁴Na tenepo, anyakhondo anango akhabvundzisambo kuti: “Kodi ife, tisatongwa ticitenji?” Penepo Juwau aatawira kuti: “Lekani kukwatira munthu kobiri yace na mphambvu, peno kumulongera pya uthambi. Mbwenye komerwani na ntengo wanu unatambira imwe.”

¹⁵Na tenepo, mbumba yatoma kukhala na cidikhiro cikulu, mbakhanyerezera kuti panango Juwau Bhatixta ndiye Kirixtu.

¹⁶Penepo Juwau aapanga anthu onsene kuti: “Ine ndisakutambirisani batixmu na madzi, mbwenye ali kubwera munthu wa mphambvu ya utongi kakamwe kupita ine. Pontho ine sine munthu kuti ndinakwanisa kunsudzula mithambo ya ntsapato zace. Unowu anakutambirisani batixmu na Nzimu wa Mulungu na moto.

¹⁷Iye ana foxolo m'manja mwace toera kucenesa pa mbuwa, na kuikha tirigu n'cikwa. Mbwenye anapisa maudzu na moto wakukhonda kuthima.”

¹⁸Juwau akhalanga mbumba na mafala anango mazinji, na kuapanga Mphangwa Zadidi.

¹⁹Mbwenye iye asandika Herodhi na thangwi ya Herodhiya, nkazi wa m'bale wace Herodhi, pontho na thangwi ya pyonsene pya kuipa pikhacita iye.

²⁰Pontho Herodhi adza kathimiza kucita pya kuipa pikulu kakamwe, pa kupitisa Juwau n'kaidi.

²¹Pidamala mbumba yonsene kutambira batixmu, Yezu aendambo katambira batixmu. Apo penepo, Yezu pikhaphembera iye, thambo yafunguka.

²²Na tenepo, Nzimu wa Mulungu waoneka mbuchita buluka kudzulu ninga nkhangaiwa, mbumphamira. Penepo, kudzulu kwabuluka fala, mbilonga tenepa: “Iwe ndiwe Mwana wanga wakufunika, ananditsandzaisa.”

²³Yezu pidatoma Iye kuphata basa, akhatamangira pyaka makumatatu pya kubalwa. Iye akhali mwana wa Zuze, ninga mukhanyerezera anthu. Zuze akhali mwana wa Eli,

²⁴Eli akhali mwana wa Matati, Matati mwana wa Levi, Levi mwana wa Meliki, Meliki mwana wa Djanai, Djanai mwana wa Zuze,

²⁵Zuze akhali mwana wa Matatiya, Matatiya mwana wa Amosi, Amosi mwana wa Naumi, Naumi mwana wa Esili, Esili mwana wa Nagai,

²⁶Nagai akhali mwana wa Maate, Maate mwana wa Matatiya, Matatiya mwana wa Semeyi, Semeyi mwana wa Zuze, Zuze mwana wa Djuda,

²⁷Djuda akhali mwana wa Juwanaa, Juwanaa mwana wa Resa, Resa mwana wa Zorobhabheli, Zorobhabheli mwana wa Salatiyeli, Salatiyeli mwana wa Neri,

²⁸Neri akhali mwana wa Meliki, Meliki mwana wa Adhi, Adhi mwana wa Koza, Koza mwana wa Elimadha, Elimadha mwana wa Eri,

²⁹Eri akhali mwana wa Djoswee, Djoswee mwana wa Eliyezeri, Eliyezeri mwana wa Djorimi, Djorimi mwana wa Matati, Matati mwana wa Levi,

³⁰Levi akhali mwana wa Simiyau, Simiyau mwana wa Djuda, Djuda mwana wa Zuze, Zuze mwana wa Djonani, Djonani mwana wa Eliakimu,