Lokasu 3:2-30

²Sasertotene gitsrukatene potu rixanatinna Ganasu ga wa Kaygwasu, Goyakalu tokanu ginyegitlu Gwa, Sakariya wgene, yineru mwiyawakanuya.

³Psoluko Gorta Gapgasretchijne yamta. Runkakletananumtlu katlupirana renshinikanutinripna yine, ga wa kaspukmukochiretikolupna.

⁴Wane rixa chinyongatyawaka Gisayiya tokanchi geneklewatachri kirukate: Yineru mwiyawakanu saplewatyachri tokanu: Galpokotanru Gitsrukaachi gatnugapote. Mpotukatanru gigapkaka.

⁵Pejnuruko magkachpalkaka tsepotkalurupni. Pejnuruko magkamriji ga wa mturu magka patenkaklutkalurupni. Ga wa katpagapkakalu potukatgapotkalurupni. Ga wa kamlojgapolu pgayamta rixgapotko.

⁶Ga wa pejnuruko yineru getanru gognewatikaluru Goyakalunu.

⁷Ga wa Gwa wane chinna gixolune yine gishpakamtachine wale katyapna, “Gimnu pixkalungi. ¿Katu ginkakgi gasukyegityawaklu Goyakalu jgekanupa?

⁸Giyagni gkamrutanru genshinikanrewlu gimuknu kamrure. Gi wa gyinuwaka wane chinkakletanu, ‘Waneywu wutsrukatni Gawrani.’ Gi rixanu gita wane chingi, Goyakalu gimkata gipgujewnakakletanna Gawraklopishanemka tyekaka sotlukakaya.

⁹Xani koxa gagmunasko rapokatka gepchi. Pejnuruko gagmuna kiglejiru mwanutu kayiikalurni. Xirnachri ruknookona. Waneko pixka rixko yineru kigleru kamrurchi ma kamrutkanupa.”

¹⁰Ga wa gixolune yine gepomgalu. Wane chinruna, “Giyagni ¿klu wkamrutanu?”

¹¹Rugita Gwa. Wane chinna, “Wa gepi mkachri waneyalutu, renekanru waneyamigjetu. Ga wa nikchi waneyalutu waneko pixka rixanu.”

¹²Runkoxna gijgawenutachine katikolupna. Wane chinruna, “Yimaklewatachri, ¿klu wkamrutanu?”

¹³Wale wane chinna, “Gi wa gitaakaluru pnute gijganu.”

¹⁴Solalone koxa gepomgalu. Wane chinruna, “¿Ga wa wixa klu wkamrutanu?” Wane chinna wanna, “Gi satuna mpiikakanu sroschi gijginriya. Gi koxa gapatlewatanu. Mpoyagnutanru gwenutikolu.”

¹⁵Kagwakanatna yine. Pejnuruneko rajiyna gishinikanuwyegitlu Gwa, gikta Kristoni.

¹⁶Pejnuruneko rugita Gwa. Wane chinna, “Gita galikakni katgi gonuya. Ga wa runa gita pnute muchkonurutu. Gi wa gita gimuluni nkoshpirokyaplu yoshmaklejixitsa. Wale katangi Giwekikaluru Kpashiriya ga wa xirnachriya.

¹⁷Ruplokapre gimyo gwa. Triko powratpotutanru giylakaajetikowaka. Rapatjetanru trikneji rumretyawakaplu, ga wa yoxikanru gichicha xirniywaka gike rixiniko muwnakatupa. Waneko pixka rixanunna yinepni. Genshinikanutachine rumretanu, ga wa menshinikanutkane xirnachri ruknokanu.”

¹⁸Giyagni gixo giykolu ga wa pimripirana giykolu kigleru galikakni runkakletna yine.

¹⁹Giyagni Gwa gijretlu Girore pasreta girukotlewatyachri wa Giroryana repuru Wilipi gnunro chinanu, ga wa pejnuruko mugletu kamrutanru Girore chinanu.

²⁰Pejnuruko tyekaka pnute potu rixyatka. Yoshmakikowaka rushyayegitlu Gwa.

²¹Ma yoshmaakonuwa Gwa wane rixatka. Pejnuruneko yine katkatka, ga wa Geso koxa katkatka. Ga wa ragjigognetini tengogne kotpuuka.

²²Wale yegi Giwekikaluru Kpashiri gijrukatka, kamanemnuru. Motkoko pixka rixmanemta. Waneylu tokanchi tengogneya wane chinachri, “Pixni Noturyi nalukanruyi. Pixa gigletanshinikanutno.”

²³Waleko Geso mapamole walapustsitka. Gosi wgene kagwakikaluru.

²⁴Ga wa Gosni wa Gili wgene. Walenwa Mata wgene. Walenwa Rewi wgene. Walenwa Melchi wgene. Walenwa Ganasu wgene. Walenwa Gosi wgene.

²⁵Walenwa Matati wgene. Walenwa Gamo wgene. Walenwa Nawomo wgene. Walenwa Gesli wgene. Walenwa Naaka wgene.

²⁶Walenwa Mati wgene. Walenwa Matati wgene. Walenwa Simi wgene. Walenwa Gosi wgene. Walenwa Gota wgene.

²⁷Walenwa Gowana wgene. Walenwa Resa wgene. Walenwa Sorowawil wgene. Walenwa Salatili wgene. Walenwa Neri wgene.

²⁸Walenwa Melchi wgene. Walenwa Gawti wgene. Walenwa Kosami wgene. Walenwa Gelmotami wgene. Walenwa Geri wgene.

²⁹Walenwa Geso wgene. Walenwa Giliyase wgene. Walenwa Goreyi wgene. Walenwa Matati wgene. Walenwa Rewi wgene.

³⁰Walenwa Simo wgene. Walenwa Gota wgene. Walenwa Gosi wgene. Walenwa Gonani wgene. Walenwa Giliyachi wgene.