Lukas 2:4-22

⁴Yosep puughu tooni ivot ila to kinik David. Tauvene igham Maria, livaa tau tisiigho pani na, ve yesuru tipul nugh Nasaret tau igheen ila taan sirivu to Galilaia na, ve tilaagh tila peria taan sirivu to Yudea. Ra malmalizi tila tivot nugh to kinik David, eeza Betelem. Leso tighur ezazi. Saawe tana, Maria i aapo.

⁶Tilepleep ta sewe, ve Maria saawe tooni to popaaŋ ivot.

⁷Tauvene ipoop naatu aidaaba, ve ikaukauu pa uuli, ve ipagheena igheen ila ŋgai niazi to ghanghaniiŋ. Yes tileep ta sewe pasaa, ruum to loomba tisov tivoniir.

⁸Mboŋ tana, ŋginiiŋa siriv to sipsip tileep izi nugh Betelem ziige, ve tiŋginŋgin sipsip toozi.

⁹Malau mako, aŋela to Ŋeer Tiina izilam gha iyooz ila naghozi, ve Ŋeer Tiina mbonari isul livutin zi. Tauvene roiŋ tiina kat igham zi.

¹⁰Eemon aŋela tawe isaav pazi ighe: “Yam aroi sov. Alooŋ. Yau nalam to napaesia vaaru poia payam. Vaaru poia tane pale igham tamtamon tisov lolozi poia le poia kat.

¹¹Pasaa, mboŋ aazne, Uleeŋa tsiam, tiina ipoopa izi nugh to David wa. I Mesia, ve Tiina tsiam.

¹²Gabua tane pale itotoia payam: Ala, pale aghita marani ee tau tikaukauu pa uuli, ve tipagheena igheen ila ŋgai niazi to ghanghaniiŋ.”

¹³Malau mako aŋela ndiŋndiŋ ndiŋndiŋ to nugh sambam timeke tizilam, gha tilup zi tomania aŋela tana, ve tipait Maaron eeza tighe:

¹⁴“Tapait Maaron tau ileep saaŋa le saaŋa kat na eeza pa tapiri ve poia tooni. Mboŋ aazne, luuma to Maaron izilam taan. Tauvene yes tau Maaron loolo poia pazi, ene pale luuma tooni izaa toozi ve tileep poi.”

¹⁵Yes aŋela tipul zi, ve timuul tizala pa sambam, ra yes ŋginiiŋa to sipsip tana tivasavo zi tighe: “Aiyo, taburig, ve tala pa Betelem. Leso taghita gabua tau Ŋeer Tiina ipaesia pait ne.”

¹⁶Tauvene tilaan rekia tila, ve tindeeŋ Maria yesuru Yosep, ve marani tana. I ighengheen ila ŋgai niazi to ghanghaniiŋ.

¹⁷Tighita le isov, ra tipaesia saveeŋ tau aŋela isavia pazi pa marani tana.

¹⁸Tamtamon tisov tau tilooŋ saveeŋ toozi na, tirur ve tigham ŋgar naol.

¹⁹Ve Maria ikis saveeŋ tana isov igheen ila loolo ve ighamgham ŋgar pani.

²⁰Ra yes ŋginiiŋa to sipsip timuul tila. Tilaghlaagh, ve tipapait Maaron eeza pa gabua naol isov tau tilooŋa ve tighita. Pasaa, gabua tana ivot itaghon duduŋai saveeŋ tau aŋela isavia pazi na.

²¹Tilepleep ve mboŋ liim ve tol ilam ila, ra uraat to ravuuŋ natuzi waaro ivot, ve tiwaat eeza Yesu. Eeza tane, Maria aapo soone, ve aŋela iwaato pataghaaŋ wa.

²²Maria gha Yosep tileep le saawe toozi ivot to tigharaat tauzi le tiŋgalaaŋ muul ila Maaron maata itaghon tutuuŋ to Mose. Ra tigham ŋeer marani tana, ve tizala Yerusalem. Leso tighuru imin Ŋeer Tiina le, itaghon saveeŋ tau tiboode ila Ŋeer Tiina tutuuŋ tooni. Isaav tauvene ighe: “Natmimŋa aidabazŋa, aghur zi tisov timin Maaron le.”